11
1 Krista omdān kei zī anga nangnīm ka omdān na zī u ro.
Pathian biak
ankhōma omdān anhui
2 Nangnīn kongtin peia nei na riattit u sika ka na manpāk u.
Hanūk chu rui kei na manchū u ngāi dōra na kōm u na kei na betōk u anga nei la sūrtit u sika ka na manpāk u.
3 Tenchu nei riat u ranga kei zōt chu hiva hi ani,
pasal lu chu Krista ani na.
Nupang lu chu pasal ani na.
Hatuka Krista lu chu Pathian ani na.
4 Tukareng pasal alu ankhum chunga bōr azong,
deari anga Pathian chong aril chu ama aninga alusīp mualphui asak ani na.
5 Hanūk chu tukareng nupang alu akhum luia bōr azong,
deari anga Pathian chong aril chu ama aninga alusīp mualphui asak ani na.
Asik chu hava ha ama ranga alu anvui ang kēng ei chang.
6 Nupang alu akhum lui chu asam manchēp rase.
Tenchu nupangin asam anchēp,
anvui ei anzakpui aniten,
alu akhum rase.
7 Asik chu pasal ngāi hi Pathian ei anphuana le ei anlianna ei ni sika alu ei makhu rang ni mak.
Tenchu nupang chu pasal ei anliana ani na.
8 Asik chu pasal chu nupang āta ansin ni mak,
tenchu pasal
āta nupang kēng ansin ani na.
9 Pathianin nupang ranga pasal ei sin ni mak,
tenchu pasal ranga kēng nupang ansin ani na.
10 Hasika han vānpalāi ngāi
sika nupangin pasal ningneina ei andangna rang alu akhum rase.
11 Hanum nisela Pumana nupang hi pasal āta tei mak,
pasal um nupang āta tei mak.
12 Asik chu pasal āta nupang ei ansin anga nupang āta pasal um anzir ani na.
Tenchu aloma Pathian āta ahong asuak zit ani na.
13 Nangni na ning len mandon u ta!
Nupangin alu khum luia Pathian kōma bōr azong hi anhui mo?
14 Pasalin sam asei ahōi ten hava ha ama ranga anzakna kēng ti hi na ompa ngāi ngalin ei na manthei ni mak mo?
15 Tenchu nupangin sam asei ahōi ten,
hava ha ama ranga anpākna ni mak mo?
Tenchu nupangin sam asei ahōi ten,
ama ranga hava ha anpākna ni mak mo?
Asik chu asam chu ama ankhūna ranga ei pēk ani na.
16 Tenchu hiva ruia mi khat peiin ankhalna adōn rang ti sela koini kāra chu hava ang dān dōn mak me na.
Pathian kuibing ngāi kār ām dōn u mak.
Puma zāndui
17 Tenchu atun hiva ngāi suale na kōm u na chong kei na pēk u rang hin na manpāk zōt u makunga.
Asik chu nei ankhōm u chachak hi nei sat riam u na rang nēka hin nei siat riam u na rang kēng nei ankhōm u chachak.
18 Mānsa khīta chu,
kuibing pumpui nān khōm u chachak lehan na kār u na ansenna a om babang ti hi ka riata.
Hava ha ituk ten mo chu ani ti ka iama.
19 Na kār u na Pathianin ei pom mi taktak ngāi ei anlang theina ranga adik nōk chu ei hong om rang ngal kēng.
20 Hatuka chu mun khata ankhōm ranga nei hong u chachaka hin Puma zāndui anruala sa u chachak mak che.
21 Asik chu asāk ranga na hong u le mi mamāna na theia zāndui asāk ranga nei val u chachak ani na.
Hasik han senkhat anchām anrāla ei om,
senkhat anri anhāia ei om ani na.
22 Hava ngāi ha hong mo asik?
Nēk le sāk athōna ranga inlui dōn u mak che mo?
Hano tenchu Pathian kuibing mo nei poisak u nōka abui ngāi ranga mualphui asak mo na ni u?
Na kōm u na hong chong mo kei ril rang?
Havan tin han nangni na manpāk thei u ning mo?
Na manpāk thei u nō ning.
23 Na kōm u na anchūna kei na manlōn u ha Puma kōm āta kei man ani na.
Havan tin han Puma Isua ansur rang zāna han ruti alāka.
24 Rāsānna amantung suale akhiaka:
“Hiva hi ka taksa nangni ranga anpēk ani na.
La u tānla sa u ro.
Nei na riattitna ranga hiva hi thō u chachak ro,”
ati na.
25 Havan tin han zāndui ansāk sua u le khuri alaka:
“Hiva khurina ka thisen hi dān khit athara kēng,
hiva hi na buang u kip nei na riattit u na ranga thō u chachak ro,”
ati na.
26 Asik chu hiva ruti na sak u kip le hiva khuri na buang u kip pei ama ahong rēt māseng Puma thīna rui nei puang u ani na.
27 Hasika han tukareng asāk rua ni luia hiva ruti asāk le Puma khuri abuang tak chu Puma taksa le athisen achunga ei chul rang.
28 Hasika han min aninga an en bak rase,
hava suale ha ruti chu ei sāka khuri ha buang rase.
29 Tukareng asāk le anēk tak chu Puma taksa omzia anthūktak re luia asāk anēk chu achunga āsia anlōna ranga ei sāk le ei nēk ani na.
30 Hava sik tak han nangni bila mi tamtak chu ei chuaia ana ei pha u.
Senkhat chu athim ei om ani na.
31 Tenchu na thetheia asa dima andon thei ila chu na chunga āsia nei anlō nōk rang ani na.
32 Hanum nisela āsia nei anlō hi ramual ranga āsia nei anlō nōkna ranga Puma ei na rakokna kēng.