Ratha Ānthiang
abōrsāng pēk ngāi
12
1 Unāi ngāi,
ratha lama bōrsāng tin reng ruia riat luia nei om u rang hi zōt makunga.
2 Nam atei na ni u lāi han hontin mo mīn ei na ruai u na chong thei lui Pathian ramil ngāi tianga nei kai u ha na riat u na.
3 Hiva sika hin kei na manthei u ani zei tutēn Pathian rathān ei maruaia chong arila:
“Isua chu khomāk atung kēng,”
ti thei ngāi mak.
Hanūk rēt chu tutēn Ratha Ānthiangin ei maruai nōka chong arila:
“Isua chu Puma kēng,”
ti thei ngāi mak.
4 Ratha bōrsāng pēk ngāi atei chip ani na,
tenchu Ratha chu angkhat.
5 Hasōndom lampui atei chipa tenchu Puma chu angkhat ani na.
6 Sinthō dān lampui um atei chipa tenchu Pathian angkhat ani na.
Aman mi tin tak chunga alom peia sin anthōpu ani na.
7 Tenchu mi tin tak chunga Ratha Ānthiang ei hong anlang hi mi tin satna ranga anpēk ani na.
8 Asik chu hava Ratha lehan angkhat kōma hianna chong apēka.
Hanūk chu hava Ratha lehan angkhat kōma riatna chong apēka.
9 Hanūk chu hava Ratha le den angkhat kōma iamna apēka.
Hanūk chu hava Ratha den han mindam theina bōrsāng apēka.
10 Hanūk chu angkhat kōma tichang abui sin thōtheina apēka.
Angkhat kōma deari chong ril theina apēka.
Angkhat kōma ratha ngāi ariat theina apēka.
Hanūk chu angkhat kōm rēta chong atei ril theina apēka.
Hanūk chu angkhat kōma chong riat lui anvār theina apēka.
11 Hava ngāi dōra ha Ratha angkhatin mun khata ei thō kiar ani na.
Ama ei zōt tak chunga hava bōrsāng ngāi ha asang asanga ei pēk chip ani na.
Taksa pumkhata abāksem ngāi
12 Taksa hi pumkhat ani na tenchu abāksem ngāi chu ātampa ani na.
Taksa bāksem ngāi hi ātampa ani nam alom u na taksa pumkhat ani na.
Kristana chu havan tin den ani na.
13 Koini ngāi Jihudi mo,
Grik mo,
suak mo suak nōk mo na loma taksa pumkhata Ratha angkhat le baptis anpēk kiar na ni na.
Hanūk chu Ratha ngkhat āta na loma ei na man nēk zit ani na.
14 Asik chu taksan bāksem angkhat dak ni mak ei dōn,
tenchu ātampa ani na.
15 Asik chu ke hin koi chu kut ni makung.,
hasik han taksa abāksem ni makung ti ngal sela taksa bāksem ni lui ni mak.
16 Hanūk chu kuar hin,
koi chu mit ni makung,
hasik han taksa bāksem in makung ti ngal sela taksa bāksem ni lui ni mak.
17 Taksa pumpui hi mit ni zit sela hong le mo nei rangai rang?
Hanūk rēt chu taksa pumpui
hi kuar ni zit sela hong le mo nei marim rang?
18 Tenchu Pathianin taksa bāksem ngai hi ama ei zōt taka amun chipa ei makhop ani na.
19 Hanūk chu alom pumpuia abāksem ngāi dōrām angkhat chang kiar sela taksa le hon tiang mo ei om rang?
20 Atun chu abāksem ātampa,
tenchu taksa chu angkhat ani na.
21 Mit han kut kōma,
nang chu na nang makung ti thei mak.
Lu han ke kōma,
nang chu na nang makung ti thei mak.
22 Taktaka chu,
taksana abāksem ngai bila chak lui nei ti khīt ha kēng,
ei nāng ātam uala.
23 Taksa bāksem ngāi bila aphām nōk rua ati na nei be ngāi ha kēng,
achālaka nei phām khīt ani na.
Na taksa bāksema anhui lui nei ti ngāi ha kēng aliaktena nei manliang ual ani na.
24 Taksa bāksem anhui sua ngāi chu anliang nang mak.
Pathianin taksa bāksem ngāi hi ansuk thathapa ei makhop ani na.
Abāksem aphām nōk rua nei ti ngāi ha kēng aliak uala aphām ruana ei sin ani na.
25 Taksa hi ansen ngāi mak,
abāksem ngāi ha anrual chianga ei tēng u rang ani na.
26 Asik chu abāksem khatin ana riat ten,
aloma abāksem ngāi dōrān ama bila ana ei riatpui ani na.
Hanūk chu abāksem khatin anpākna aman ten aloma ama bila rāi ei san ani na.
27 Nangni ngāi hi Krista taksa na ni u hatuka hava taksana abāksem ngāi chip ha nangni na ni u na.
28 Pathianin senkhat chu kuibing ngāi kara angkhatnana chu kuitira,
anninana chu deari chong ril theina,
anthumnana chu mimchuna āsiaka.
Hava suale bōrsāng atei atei ngāi,
tichang abui sin thōtheina,
min dam theina bōrsāng,
mi san theina bōrsāng,
mi ruai theina bōrsāng le chong atei ril theina bōrsāng apēka.
29 Aloma kuitir zit mo?
Aloma deari zit mo?
Aloma mīnchū zit mo?
Aloma tichang abui sinthō zit mo?
30 Aloma mīndam theina bōrsāng aman zit mo?
Aloma chong atei aril thei zit mo?
Aloma riat lui chong anvār thei zit mo?
Nangnīn bōrsāng alian khīt ngāi aman ranga phām sabak u ro.
31 Atun chu hava ngāi nēka asa khīt na man musa ka ti.