Anditna
13
1 Miring chong le vānpalāi ngāi chong ngala chong ril thei inlāng anditna ka nei nōk ten dār maring papei mo soirāng maring papei ang mo chang ka ti.
2 Deari chong ril theina ngal nei inlāng hanūk chu chong rīl anthup ngāi dōra le hianna chong tin dōra ngal riat thei inlāng,
mual anthot theina rang khop pei iamna kip dōn thei inlāng,
anditna ka nei nōk ten itē ni makunga.
3 Anriang ngāi vāina ranga ka nei ka nung dōra ngal pēk zit inlāng,
ahāl ranga ka taksa ngal phal diai inlāng,
anditna ka nei nōk ten itē kei man rang om mak.
4 Anditna chu dūk adiara,
anditna chu lungkhamna adōna,
anditna chu khāmaret dōn mak,
anditna chu borāi thō mak,
anditna chu aninga anlianna dōn mak.
5 Anditna chu om dik luia om mak,
anditna chu huat anham mak,
anditna chu ataksi len mak,
anditna chu āsia lama mandon khumtit mak.
6 Anditna chu adik nōkna lama rāimansān mak tenchu chongtak lama kēng arāi ei mansānpui.
7 Anditna chu aloma adiar zita,
aloma aiam zita,
alom pei chunga asabei zita,
alom peia atiar zita.
8 Anditna chu hek ngāi mak.
Tenchu deari chong ril theina chu ei la hek rang,
chong ateia chong ril theinām ei la hek rang.
Riat theinām ei la bui rang.
9 Asik chu koinīn kip luia nei riat ani na,
kip lui dēna deari chong ril tneina nei ril ani na.
10 Tenchu ei kipna ahong asuak tik chu hava kip luina ha ei lānpei rang.
11 Nāipang ka ni lāi han,
nāipang anga chong kei ril,
nāipang anga kei mandon,
nāipang anga malung kei vong ani na.
Atun chu ulian ka honga chang zeia,
nāipang malung vong ka mathān zei.
12 Atun chu anthiang sadim luia dapōna an en anga nei mu ani na,
tenchu nangkan chu māisua antonga ama chu nei la vamu rang.
Atun chu kip luia kei riat ani na,
nangkan chu akipa ei na la riat rang koi um akipa ama chu kei variat rang ani na.
13 Atun chu iamna,
ansabeina,
anditna hiva anthum ngāi hi adiara a omtit rang ani na.
Hiva ngāi bila alian khīt chu anditna hi ani na.