Chong atei chong ril
theina le a omzia ril theina
14
1 Anditna chu razūltit u ro.
Ratha lam bōrsāng ngāi aman ranga taksat u ro.
Deari chong ril theina rang vāng aniten,
taksat riam u ro.
2 Asik chu chong ateia achong ngāi chu miring kōma achong ni u mak,
tenchu Pathian kōma chong aril u kēng.
Hava ngāi ha tutēn ariat thei om mak,
ama chu ratha hān ei maruaia chongrīl anthup rui kēng ei ril.
3 Tukareng deari anga chong aril chu mi ei dom theina rang le lungngamna le phūkdāina apēk ranga kēng chong ei ril.
4 Chong ateia achong ngāi chu amāni atheia ei andingna ranga kēng ei ril.
Tenchu deari anga chong aril ngāi chu kuibing ei adom theina ranga kēng ei ril.
5 Na lom u na chong ateia chong aril ranga kei na zōt u ani na,
tenchu hava nēka deari anga chong aril thei ranga kei na la zōt sabak u ani na.
Asik chu kuibing andingna ranga chong ateia chong arilpu ha a omzia ariat thei nōk ten,
deari anga chong arilpu chu hava nāi nēka alian ani na.
6 Atun unāi ngāi,
na kōm u na ahonga chong atei ngala hong chong inlāng,
tenchu nangni na kōma Pathian chongpēk,
riat theina,
deari chong ril theina,
anchūna chong ngāi ka ril nōk ten nangni na ranga imo ei nemna?
7 Theilia le chongpereng ngāi anga phūk dōn lui maring rasa dōn ngāi um āk diktak asūr nōk ten theilia le chongperengin imo ei pir hontin mo nei riat thei rang?
8 Totorōt maring um andang phit nōk ten,
tu mo ansina rāl anduina muna asē rang?
9 Havan tin ang han nangnīm na mūr le ariat abei chong na ril u nōk ten,
imo nei ril ha mīn hontin mo ei riat thei rang?
Akoronga chong aril papei ang ni nō ta ni mo?
10 Maniapūra hin maring rasa ātampa a om theia tenchu angkhatte ngal a omzia bui om mak.
11 Hava maring rasa khat a omzia ha koiin ka riat nōk ten ka kōma chong arilpu chu ram atei mi ei chang ani na,
amām ka kōm āta ram atei mi dēn ei chang ani na.
12 Havan tin anga nangnīm ratha lama bōrsāng ngāi aman ranga tak nei sat u anga kuibing ei anding theina ranga hava nēka aman riam ranga pūt u ro.
13 Hasika han chong ateia chongpu chu a omzia ei ril theina ranga bōr zong rase.
14 Chong ateia bōr kei zong aniten,
ka ratha ha kēng bōr azong ani zei.
Tenchu kei riatna chu akorong chang inti.
15 Hanle havan tin han aniten,
hontin mo kei thō rang?
Ratha lehan bōr zong ka ti,
riatna lehan um bōr zong ka ti.
Ratha lehan la thō ka ti,
riatna lehan um la thō ka ti.
16 Hano tenchu nangin rathāna bōrsāng nei zong ha la re lui muna a om ngaiin hontin mo rāisān chong nei mantung han ‘Amen’,
alei ti thei rang?
Asik chu na chong ateia chong nei ril ha riat thei mak.
17 Nangin chu adik sabaka rāisān chong nei mantung ani theia,
tenchu mi tei chu manding thei lāi mak che.
18 Nangni ngāi nēka hin chong atei chong kei thei ual sika hin ka Pathian kōma rāsānna ka mantunga.
19 Tenchu kuibing ngāi ankhōmna muna chongkam asāng sōm ka ril nēk ten mi tei ngāi anchūna kei pēk theina ranga chongkam rangā bak ril ka ti.
20 Unāi ngāi,
nāipang omdān anga mandon chōi u nō tānla āsia lampanga chu nāite sender omdān anga om u ro.
Tenchu andonna lampanga chu puiting omdān anga om u ro.
21 Dānbuna anziaka:
Pumān ei ti,
“Chong ateia chong arilmiring
amanga chong ka ti,
Hanūk chu Jentail ngāi mūr
amanga hiva nam ngāi
kōma chong ril ka ti,
Hanum nisela amānīn ka
chong rangāi u nō ni,”
ati na.
Chong atei sinsiana
22 Hasika han chong ateia chong aril hi aiam ngāi ranga ni mak,
tenchu aiam nōk ranga sinsiana ani na.
Hanūk chu deari anga chong ril theina hi aiam nōk ngāi ranga sinsiana ni mak,
tenchu aiam ngāi ranga ani na.
23 Kuibing pumpuia mi ngāi dōra mun khata nānkhōm u chachak le chong ateia chong ril zit u tānla la riat lui mi senkhat mo,
aiam nōk mi senkhat mo nei ankhōm u na muna hong lūt sela amānīn achāng na ti u nō ni mo?
24 Tenchu na lom u na deari anga chong ril zit u tānla,
hatuka la re lui mi senkhat mo,
aiam nōk mi senkhat mo hong lūt sela achong riatna hān āsia ei thō ngāi hong manpuang inti,
achong riat hān āsia manlōnti.
25 Hatuka amalunga anthup dōra hong anlang pe zit inti.
Hatuka chu anbok laka Pathian chu amōk intia,
Pathian chu na kār u na a om tatak kēng ati na hong puang inti.
Pathian biakna dān anhui
26 Unāi ngāi,
hontin mo nei la ti rang?
Nangni ngāi nānchun u chachak le anpākna la adōn mo a om,
mīnchū theina adōn mo a om,
chong ateia chong aril theina adōn mo a om,
chongpēk adōn mo a om,
hanūk chu a omzia aril theina adōn mo a om ha,
hava ngāi dōra ha kuibing andingna rang kiar ni rase.
27 Angkhat peiin chong ateia chong aril rang ati ten,
anni mo ole ātam tiang anthum tenin ril u rase.
Angkhatin chong ril rase hanūk atei angkhatin a omzia ril rase.
28 Hatuka a omzia aril thei abui ten kuibinga adāireka om rase.
Ama le ama chu Pathian le rong han chong u rase.
29 Hanūk chu deari anga chong aril ngāi chu anni nōk ten anthumin mo chong ril u rase.
Atei loko ngāi chu lei mandang u rase.
30 Tenchu havana akōla ansut ngāi bila mi angkhat kōma aril theina chong aman ten mān alei ansapu chu dāireka om rase.
31 Asik chu lokō anchūna ei man theina rang le loko lungngamna ei theina ranga nangnīn angkhat angkhata deari anga chong ha ril u ro.
32 Deari ngāi ratha chu deari ngāi racham taka kēng ei om u.
33 Pathian chu anpōnna Pathian ni mak,
tenchu anngoina Pathian ani na.
Havan tin han mīnthiang ngāi kuibing tina ei om anga om rase.
34 Na nupang u ngāi chu kuibing sūnga adāireka om u rase.
Amāni chu chong aril ranga anphal ni u mak.
Dānbuna ei ti anga:
Amāni chu hē tela om u rase,
ti chong a om ani na.
35 Amāni bila angkhat peiin ei riat zōt a om ten,
aruathar u ngāi kōm ina rakel u rase.
Asik chu kuibing sūnga nupang achong hi anzakna a om ani na.
36 Pathian chong hi nangni kōma rong mo ei hong tung?
Hanūk chu nangni kōm āta rong mo ei suak?
37 Mi angkhat peiin deari khat mo ka ni ole ratha mi khat mo ka ni anti ten,
na kōm u na lekha kei maziak ngāi hi Puma nāta chongpēk kēng ti hi re u rase.
38 Tenchu mi angkhat peiin ariat nōk ten amām riat luia om rase.