Krista ei anthuirētna
15
1 Unāi ngāi,
atun chu na kōm u na thang ahui khat kei na manthei u ha nangnīn na lei poma nei anding u na ani na.
Hava thang ahui rui ha kei
na manthei rēt zōt u ani na.
2 Hatuka hava thang ahui lehan na kōm u na chong kei ril ha adettita na dōn u ten,
sandama a om na ni u zei.
Hava ha ani nōk ten nei iam u na akorong kēng ani zei.
3 Asik chu koiin hava kei man ha na kōm u nām rui alian khīt anga kei na manlōn rēt u ani na.
Hava ha ani zei,
Pathian Lekhabūna anziak anga Krista chu koini āsia nei thō sika athī,
hanūk chu thāna anphūma.
4 Pathian Lekhabūna anziak anga,
nīnthum changna nikhuana ahong anthui rēta.
5 Hankēng Peter kōm ahong anlanga,
hava suale Sōmleianni ngāi kōm anlanga.
6 Hankēng razarangā nēka atam unāi ngāi kōm anlanga.
Hava ngāi bila ātam chu atun tena ala dam u,
senkhat chu āthi a om u zeia.
7 Hava suale Jakob akōm anlanga,
hatuka aloma kuitīr ngāi dōra kōmām anlanga.
8 Hatuka nukhōna mi nūk khīta koi ahun nōka nāi anzir ang ka kōmām anlanga.
9 Koi chu kuitīr ngāi bila asīn khīt ka ni na,
kuitīr ati na raming anphua rua ngal ni makung.
Asik chu Pathian kuibing ansinsak ka ni na.
10 Tenchu Pathian alungkhamna zāra kei hong ni sua chu kei ni ani zei.
Ka ranga alungkhamna ei na pēk ha akorong manchang makung.
Asik chu kuitīr ngāi lim bila aliak antak chunga sin athō ka ni.
Hanum nisela hava ha koi ni makung athō tenchu ka kōma om Pathian lungkhamna kēng athō.
11 Hasik han koi kei ril mo ani ole amānīn ei ril mo ani,
hava ha koinīn nei ril ani na,
hatuka hava ha nangnīn nei iam u ani na.
Āthi ngāi anthuirētna
12 Tenchu Krista chu āthī ngāi bil āta anthuirēt ati na chong anril anten ichanga mo na kār u na mi senkhakhatin anthuirētna om lāi mak ei la ti u?
13 Āthī ngāi anthuirētna a om nōk ten Krista āthi āta anthuirēt mak.
14 Krista anthuirēt nōk ten,
koinīn chong nei ril ngāi akorong,
nangni nei iam u nām akorong ani na.
15 Hava rong ha la ni mak,
Krista chu Pathianin amathuirēt ti hi Pathian ruia koinīn mi kōma nei manriat ha Pathian ruia nei manriat ha milaka nei manlō kēng na ni zei.
Tenchu Pathianin Krista amathuirēt nōk ten,
āthī ngāi um anthuirētna om mak.
16 Asik chu āthī ngāi anthuirēt u nōk ten Kristām anthuirēt mak.
17 Hatuka chu Krista anthuirēt nōk ten,
nangni nei iam u na ha akorong ani na.
Atun tena asia nei thō u ngāia a om kēng na la ni u.
18 Hava sika han Kristana alei athī sua ngāi um abui u lāi ani na.
19 Hiva damsūng rang duaia Krista nei sabei aniten,
mi tin ranga koini ravān abuia anlō inti.
20 Tenchu Krista chu āthī ngāi bil āta ataktaka anthuirēt ani na.
Ama chu āthī ngāi bil āta anthuirēt atontīr khīt ani na.
21 Miring khat sika thīna ei hong om anga miring khat sika thīna nāta anthuirētnām ei hong om ani na.
22 Asik chu Adama aloma miring dōra ei thī anga Kristana aloma miring dōra ei dam rēt rang ani na.
23 Tenchu tukareng adōntena ei anthui rang:
Mānsa khīta arapa mānsa Krista,
hava suale ami ngāi dōra ama ahong tik le anthuirēt unti.
24 Hankēng hava tika han aloma ruirilna ngāi dōra,
ningneina ngāi dōra,
thōtheina ngāi dōra apei zit suale Pa Pathian kuta aram chu abetōk tik le hun ei hekna chu hong suak inti.
25 Asik chu arāldui ngāi dōra akepha thuai asiak zit māseng,
amān rui ei la ril ngēt rang ani na.
26 Arāldui ei hekna chu thīna ani na,
hava hām ei lān pei rang ani na.
27 Asik chu,
“Amān alom peia akepha thuaia asiak zit māseng,”
(Sām 8:6 )
ti chong ani na.
Tenchu “alom peia ama thuaia asiak,”
ti chonga hin Krista thuaia alom peia āsiakpu Pathian chu anchel ni mak ti chong hi anthiang vanga anlanga.
28 Alom peia Pathianin athuaia asiak zit ten,
Ama Nāi Pasal um nisela aloma athuaia āsiak zit Pathian thuaia a om ti na ani na.
Pathian chu alom peia aloma ani zit ei ni theina ranga.
29 Hanūk rēt chu,
āthī ngāi anthuirētna abui anten,
āthī ngāi sika baptisma alāk ngāi le imo ei chang u rang?
Hanūk chu āthī ngāi anthuirēt u lāi nōk ten ichanga mo mīn baptisma ei lāk u?
30 Koini ngāi na ranga ichanga mo dārkār kipa rathatākna dingmuna nei om chian?
31 Koini na Puma Krista Isuana nei anlianpui zāra khomāk kei ansam ani zei:
Nikhuan tina āthī kēng ka ni.
32 Ephesi khuana ramsa ngāi le kei andui ha miring rang duaia nisela,
ka ranga imo ei nemna?
Āthī ngāi anthuirēt u nōk ten,
“Hong u ro,
ne u rei,
sa u rei,
Asik chu nangtūka athī rang
kēng na ni,”
(Isa.22:13 )
34 Om adik athō ranga na malung manhar rēt u ta ro,
āsia thō mong u ta ro.
Asik chu nangni ngāi bila senkhatin Pathian ruia riatna dōn lui na om u na.
Hiva chong hi nangni nei anzak u na ranga kei ril kēng.
Anthuirētna taksa
35 Tenchu mi senkhatin:
“Āthi ngāi hontin mo ei anthuirēt u rang?
Hong zāt taksa le mo ei hong suak u rang?”
36 Āmo tham kēng na ni u!
Nangnīn nei tu u tak ha athi nōk anten hong dam rēt thei ngāi mak.
37 Nangin na tu lāi han akung a omsa ha tu u mak che na.
Tenchu aru angkhatdak kēng nei tu ani na,
hava ha gōm sachi ani thei,
hano ten angkhat pei chimuru ani thei.
38 Tenchu Pathianin ei mansūk anga akung ei om dān rang ei sin ani na.
Amān achi ang taka akung om dān um ei pēk ani na.
39 Mē dōra hi munkhat ni zit mak.
Asik chu miring mē om dān ateia,
sake manli mē om dān ateia,
ngā mē om dān ateia,
hanūk chu vā mēm ateia.
40 Chungvān taksa a om a,
ramual taksa a om a.
Chungvān taksa ei sa ateia,
ramual taksa ei sām ateia.
41 Anī ei ēlna ra-āng ateia,
thā ei ēlna ra-āng ateia,
ārsi ei ēlna ra-āng um ateia.
Ārsi ngāi um angkhat āta angkhat ei ēlna ra-āng ateia.
42 Athī ngāi anthuirētna hām havan tin ang han ei hong om rang ani na.
Asiat thei taksana antu hi siat thei luia ahong anthuirēt rang ani na.
43 Mumāk akāia antu ha,
anlianna lehan anthuirēt inti.
Āchuaia antu ha arāta anthuirēt inti.
44 Ramual taksana antu ha,
ratha taksana anthuirēt inti.
Ramual taksa a om ten,
ratha taksām a om ani na.
45 Lekhabu Ānthianga hintin hin anziaka:
“Miring mānsa Adam chu
phūk adōn ahong achanga.”
(Anp.2:7 )
Tenchu nukhōna Adam chu damna apēk thei ratha ahong achanga.
46 Mānsana chu ratha lam ni mak ahong bak,
tenchu taksa lam kēng ahong mānsa,
ratha lam chu nukhōna ahong ani na.
47 Mānsana miring chu philvut āta ahong ani na,
tenchu nukhōna miring chu Puma kōma chungvān āta ahong ani na.
48 Phila miring ngāi chu phila mi ang ansin,
chungvān miring ngāi chu chungvāna mi anga ansin ani u na.
49 Phila ansin miring nei phua anga,
chungvāna miring aphuana om inti.
50 Parual ngāi,
na kōm u na hiva hi kei na ril u,
taksa le thisenin Pathian ram lua thei nō ni.
Hanūk chu achuai thei neinun hīn chuai thei lui neinun lua thei nō ni.
51 Rangāi u ro,
chongrīl anthup khat na ril u ka ti:
Koini na loma hin athi kiar rang ni mak me,
tenchu na loma anthūl kiar rang kēng na ni.
52 Hava ha chomo khata,
mit khaprip kongkāra,
ahekna totorōt antum rasa anring tik le hava ha hong om inti.
Asik chu totorōt antum tik le aloma athī ngāi dōra chuai thei lui ranga anthui kiar untia,
hatuka koinīm anthūl kiara om inti.
53 Asik chu hiva achuai thei hīn chuai thei lui lehan anthuama om ei nāng,
hanūk chu athī thei hīn thī thei lui lehan anthuama om ei nāng ani na.
54 Hasika han achuai thei hīn chuai thei lui lehin anthuama om tik chu Lekhabūna anziaka chong hi hong kip inti:
“Zuina hān thīna chu
avol sua zei,”
(Isa.25:8 )
ati na.
55 “O thīna,
ho mo na tūr?
O thānkhur,
ho mo nei
zuina?”
(Hos.13:14 )
56 Thīna tūr chu āsia ani na,
hanūk chu āsia sin thōtheina chu dān hi ani na.
57 Tenchu koini na Puma Isua Krista zāra zuina ana pēkpu Pathian kōma anpākna om rase.
58 Hasik han ka parual madit ngāi,
angīrtita om u ro,
Itēn sōk na mancha u nō rase.
Puma sin athō chunga apumpuia anpēka om chian u ro.
Asik chu Puma ranga nei pōng u na akorong ni mak ti hi na riat u na.