Ramīl anmōkna
muna dāli andar
8
1 Atun chu ramīl biakna muna dāli andar ruia chong chu hiva ani na.
Na lom renga riatna na dōn ti nei anriat chip ani
na.
Tenchu riatnān borāi thōna amasuaka,
tenchu anditnān mi satna kēng ei masuak.
2 Tukareng riatna ka dōn kiar zei ati na anbe theia tenchu ei riat rang anga atun tena la riat lui ala ni na.
3 Tenchu tukareng Pathian andit tak chu Pathianin ei riat mi ani na.
4 Atun chu ramīl ngāi kōma andar nēk sāk ruia kei ti chu hiva ani na.
Maniapūra ramīl ngāi hi itē ni mak.
Hatuka Pathian chu angkhat dak rong nōk chu atei om lāi mak ti hi na loma nei riat ani na.
5 Asik chu anvāna mo ni rase,
maniapūra mo ni rase,
mīn ei ti u anga pathian ngāi a ti na raming anphua hi ātampa ani na.
Hanūk chu puma anti hīm ātampa ani na.
6 Hanum nisela koini na ranga Pathian chu angkhatdak ani na,
Ama chu Pa ani na.
Ama nāta alom peia ahong om kiar ani na.
Koinīm ama sika om na ni na.
Hanūk rēt chu Puma chu angkhatdak ani na,
Ama chu Isua Krista ani na.
Ama sika aloma a om ani na,
koinīm ama sika om na ni na.
7 Tenchu hiva riatna hi mi dōrān nei kiar mak.
Senkhat chu ramīl abiakna malung ei la dōn sika atun tena ramīl biakna muna dāli andar anga ei sāk u.
Hasika han amāni siat le sa riatna ei dōn u ei rāt nōk sika ei annim u chachak.
8 Tenchu nēksākin Pathian kōma apom ruana ei na sin ni mak.
Hava ha na sāk ngalām itē ei satna om mak,
na sāk ngal nōkām itē ei siatna om mak.
9 Tenchu anrēng u ro!
Hava nei zōt anga nei omna lehan iamna tianga rāt lui ngāi ranga akhār chang ving ta ni.
10 Nang chu riatna adōn sua na ni na,
tenchu siat le sa riatna tianga rāt lui mi tu khatin mo ramīl biakna ina ansuta nei nēk le nei sāk na mu sela ha siat le sa riatna tianga rāt lui mi ha ramīl biakna muna dāli andar ha sāk ngam nō ni mo?
11 Na parual rāt lui tak ranga Krista ei hong thi ha,
nang nei riatna lehan hava na parual chu ei siāta ei anpei rang ani na.
12 Havan tin han na parual u ngāi chunga āsia nei thō u na amāni siat le sa riatna rāt lui ha nei vit u chachaka hin Krista chunga āsia thō nei chang u.
13 Hasika han nēksāk sika ka parual ei ankhārna aniten,
ka parual ei ankhār lāi nōkna ranga me sāk pial lāi nō ning.