Inneina rui
7
1 Nangnīn ka kōma lekha nei hong maziak u rui ha hiva hi ani na.
Pasalin nupang ei lāk nōk rang hi āsa ani na.
2 Tenchu uiare anchi tuara hin pasal ngāiin nungāk dōn chip u rase.
Hatuka nupang ngāi um ruathar dōn chip u rase.
3 Pasalin anungāk kōma anditna chu pe rase,
han tin dēn han nupangin um aruathar kōma anditna chu pe rase.
4 Nupang ataksa chu ama atheia ta rang duai ni mak,
tenchu aruathar tām ani na.
Hantin dēn han pasal um ataksa ha atheia ta rang duai ni mak,
tenchu anungāk tām ani na.
5 Nangni ngāi bu ngoia le bōr azonga nei anpēk thei u na ranga anngoi chunga hun atōmte ranga chu nān sen thei u.
Hava rong nōk chu atei itē renga ansen u nō ro.
Anrēng thei nōkna sika soitānin ansinnana ei ruai u nōkna ranga nukhōna munkhat chang rēt u ro.
6 Hiva chong ngāi hi chongpēk anga kei na ril u ni mak,
tenchu phalna sika kei na ril u kēng.
7 Mi dōra hi koi ka ang kiar ni zit sela chu kei zōt ani na.
Tenchu mi tinin Pathian kōm āta bōrpēk atei chip hi nei man ani na,
angkhatin angkhat zāt,
ateīn atei zāt ei man ani na.
8 Atuna kei ril hi innei lui ngāi le arōng ngāi ranga ani na:
Koi kei om anga hin innei luia om u sela chu amāni ranga asa.
9 Tenchu aninga anrung theina adōn u nōk ten,
innei u rase,
asik chu ning ōlna dōn sika athep achār nēk ten inanei sa ual inti.
10 Inanei sua ngāi ranga hiva chongpēk hi kei pēk u:
Nupangin aruathar le ansen thak nō rase.
Hiva hi koi ka chongpēk ni mak,
tenchu Puma chongpēk kēng.
11 Hatuka amān ansenpui ving ten,
ruathar la rēt lāi nō rase.
Hano ten aruathar dēn le anlop rēt rase.
Pasal um nisela anungāk māk nō rase.
12 Atei ngāi ranga hiva hi koiin kei ti,
tenchu Puma ni mak:
Unāi khat peiin aiam nōk nungāk dōn sela hatuka hava nupang ha ama bila om rang azōt ten,
māk thak nō rase.
13 Hatuka nupang um aiam nōk ruathar dōn sela hatuka hava pasal ha ama bila om rang azōt ten,
apasal māk thak nō rase.
14 Asik chu aiam nōk pasal ha anungāk aiam zāra ānthiang kēng ani zei.
Hatuka aiam nōk nupang um aruathar aiam zāra ānthiang kēng ani zei.
Hava ha ni nō sela chu na nāi u ngāi ha ānthiang lui ei ni u rang ani na,
tenchu ānthiang kēng ani u na.
15 Hanum nisela hava aiam nōk tak ha ansen ranga azōt ten,
ansen rase.
Havan tina ding muna chu parual aiam ha mo sarzuar aiam ha mo ankhita om u lāi mak.
Pathianin anngoi riama om rang kēng ei na kui.
16 Nang nupang,
na ruathar chu na mazōk ving um thei kēng hale?
Hanūk chu nang pasal,
nang um na nungāk chu na mazōk ving um thei kēng hale?
17 Ani chu ni ta rase,
Pathianin mi tin ranga ei mansūk ang le Pumān mi tin ranga ei pāi ang han om chip u rase.
Hivan tina chongpēk hi kuibing tina ranga kei pēk ani na.
18 Pathianin tukareng serantan suana ei kui mo a om ving ha?
Ama chu serantanna pei lāi nō rase.
Hanūk chu serantan luia ei pāi mo a om?
Ama chu serantan lāi nō rase.
19 Serantan hi itē ni mak,
serantan lui him itē ni mak.
Tenchu Pathian chongpēk atel rong hi kēng abul khīt.
20 Tukareng Pathianin apāi lāia ei om dān anga om chip rase.
21 Suak na chang lāia ankui mo na ni ha?
Hava ha mandon chian lāi nō ro.
Tenchu azōk theina hēr a om ten,
azōkna pūt ro.
22 Asik chu suak achang lāia Pathianin ei pāi mi chu Pumāna zōkna aman sua kēng ani zei.
Havan tin dēn han zōkna aman suana Pathianin ei kui chu Krista ranga suak achang ani na.
23 Man le anchōk kēng na ni u,
hasika han miring ranga suak chang u lāi nō ro.
24 Ka unāi ngāi,
tukareng Pathianin akui lāia ei om u a anga Pathian kōma om chip u rase.
25 Tenchu atun hin nungākte ānthiang innei lui ngāi ranga Puma kōm āta itē chongpēk man makung.
Hanum nisela Puma alungkham muna zāra aiamrua kei ni theina ranga koi ka ninga ka mandon kēng kei hong ril ani na.
26 Asik chu atuna hun hi antak ani na,
hasik han nei om anga nei om chip u rang hi asa ti kei mandon ani na.
27 Inanei sika ankhita anōk mo na ni ha?
Ansenna arok nō ro.
Hanūk chu inanei sika ankhit āta azōk mo na ni ha?
Inanei rēt ranga arok nō ro.
28 Tenchu inanei sua na ni ten āsia thō u mak chena.
Nungākte ānthiang um in ei nei ha aranga āsia thō ni mak.
Tenchu havan tina mi ngāi kēng taksa tianga atēng u rang.
Tenchu hava ha nei tēng u nōka anān zōk u ranga kei zōt ani na.
29 Unāi ngāi,
na kōm u na kei ril zōt chu hiva hi ani:
Hun hi abongte kēng ani zei,
hasika han atun āta nungāk adōn ngāiin nungāk dōn lui anga om u rase.
30 Hanūk chu achap ngāi um achap nōk anga,
rāiasān ngāi um rāisān lui anga,
anchōk thei ngāi um kut korong anga om u rase.
31 Hi maniapūra nei nunga anmang ngāi um aliak ātama anmang u nō rase.
Asik chu hi maniapūr ei om dān hi anpeia asē rang ani zei.
32 Andonna dōn luia nei om u rang hi kei na zōt u ani na.
Asik chu innei lui miring chu Puma rong rāi ei mansān theina ranga Puma rui kēng ei mandon ani na.
33 Tenchu innei sua miring chu hi damsūng rui kēng ei mandon.
Anungāk rāi ei mansān theina ranga hi damsūng rui kēng ei mandon.
34 Tenchu in anei sua nupang le nungākte ānthiang chu munkhat ni mak.
Nungākte ānthiang in la nei lui mi chu ataksa le aratha Puma ranga anthiang vanga ei siak theina ranga Puma rui kēng ei mandon.
Tenchu in anei sua nupang chu aruathar rāi ei mansān theina ranga hi damsūng rui kēng ei mandon.
35 Hiva chong ngāi hi nangni nei sat thei u na ranga kei ril kēng,
chāngtena nei ankhit u ranga kei na ril u ni mak.
Tenchu om dān adika nei lēng thei u na rang le malung angkhata Puma haso nei adom thei na ranga kei na ril u kēng.
36 Tukhatīn mo anāi nungākte ānthiang anga ei dōn dik mak ati na amandona,
hanūk chu ainneina rang hun um ahun zei ti andonna adōn ten,
amān ei zōt anga dōn rase.
Asik chu nungākte anga ānthiangin in ei nei rang ha ama ranga āsia ni mak.
37 Hanum nisela anāng ngēt kēng ti sika ni mak,
tenchu malung adettita ama ei zōt anga nungākte anga ānthiang chu anrungtit thei ranga ansin ten,
hava ual ha aranga asa ani zei.
38 Havan tin han anāi nungākte anga ānthiang in ei mannei chu asa ani na.
Tenchu inanei nōkpu ual ha hava nēka asa ala ni na.
39 Nupang chu aruathar adam kār pei chu dānin ei khita om ani na.
Tenchu aruathar athi sua aniten,
ama chu azōk ani zeia,
ama ei zōt anga ruathar alāk rēt theia.
Tenchu Pumana om mi ngēt ni rase.
40 Tenchu koi ka mandon chu hintin hin ani na,
ama atheia ei om anga om thei sela chu ravān asa chang inti.