Unāi ngāi bila anngoi nōkna
6
1 Nangni ngāi bila mi khatin a unāi le anngoi nōkna dōn sela,
hava mi hān Pathian mīn thiang ngāi matona rui azēk ranga chōi luia mi dik lui ngāi matona hontin mo ei vadar ngam?
2 Mīn thiang ngāi kēng hi ramual rui azēk u rang ti hi re u mak che mo?
Nangnīn ramual rui lua na zēk thei u ten,
ichang mo rui āsīn tete ngāi ngal nangnīn nei zēk thei u nōk?
3 Koinīn vānpalāi ngāi rui nei ril rang ti hi re u mak che mo?
Hia damsūng rui vāng chu ichang mo nei zēk thei nōk rang?
4 Nangnīn hia damsūng rui lua mana na zēk thei u ten ichang mo kuibingin annuai khīt ati na ei mandon ngāi
rui azēkpu ranga nei ruat u?
5 Nangni nei anzak u na ranga hiva chong hi kei ril kēng.
Unāi le unāi anngoi nōkna asuak le rui azēk ranga nangni kāra mi hian khat ngal om u mak che mo?
6 Tenchu nangni kāra unāi khatin a unāi chunga dorbār ei thō chachak ani na.
Hava ngal ha aiam nōk mi ngāi matona ei la chōi rēt ala ni.
7 Nangni le nangni kāra dorbār ei suak chachak hi na kār u na achuk nōk a om ti na ni mak mo?
Havan tin han a om ten mīn na chung u na asia ei na thō ha tiar ro ba.
Mīn na chung u na milaka na huang u ni ba.
8 Tenchu nangni kēng asia thō chachak na ni u.
Nangni kēng mi huangna thō chachak na ni u.
Hatuka hava ha na unāi ngāi chunga nei la thō rēt u chachak ala ni!
9 Mi dik lui ngāiin Pathian ram lua u nō ni,
ti hi re u mak che mo?
Anhuangnana om ving u tani.
Asik chu hurna tin adōn ngāi,
ramīl anmōk ngāi,
uiare ngāi,
pasal nōti chang ngāi,
pinkua hur ngāi dōra Pathian ram lua thei u nō ni.
10 Hanūk chu marusa ngāi,
huat anham ngāi,
zu nēk ngāi,
chongsa nōk amang ngāi,
mi huang mi phil ngāi dōra Pathian ram lua thei nō u ni.
11 Nangni bila mi senkhat chu han tin han tiana nei om u ani na.
Tenchu Puma Isua Krista raminga le koini na Pathian Ratha lehan anbuala,
ānthianga,
asat anlō kēng na ni u zei.
Hurna le uire rui
12 Alom peia ka ranga dān anthiang zit ani,
tenchu aloma ei mansa kiar ni mak.
Alom peia ka ranga dān anthiang zit ani na,
tenchu itē thuaia a om ni makung.
13 Hatuka nēk sāk hi von ranga ani na,
von hi nēk sāk ranga ani na,
tenchu Pathianin ei pei rit rang ani na.
Taksa hi uiare nei thōpuina ranga ni mak,
tenchu taksa hi Puma ranga kēng.
Hatuka chu Puma hi taksa ranga ani na.
14 Pathianin Puma chu athi nāta ahong mathuia,
koinīm ama ei rātna lehan na hong mathui inti.
15 Na taksa u ngāi ha Krista bāksem kēng ti hi re u mak che mo?
Hanle Krista abāksem chu kei chōia nōti zuar ngāi bāksem lehan kei vānlop rang mo?
Anlop thei nō ni.
16 Tukareng nōti zuar le avānlop chu ama lehan taksa pumkhat kēng ei changpui u ti re u mak che mo?
Asik chu Lekhabu ānthiangin ei ti:
“Anni ngāi ha pumkhat kēng
ei chang ani u zei,”
(Anp.2:24 )
18 Uiare nāta ankhāi u ro.
Miringin āsia ei thō atei atei ngāi chu ataksa apanga kiar ani na,
tenchu uiare sika āsia thō chu ama ataksa len lehan āsia ei thōpui ani na.
19 Na taksa u ha na sūng u na a om,
Pathian kōm āta nei man u Ratha Ānthiang in ānthiang kēng ei chang ti re u mak che mo?
Na ninga na ta ni u mak che na.
20 Asik chu man le anchōk kēng na ni zei.
Hava sika han Pathian ta,
na taksa u le na ratha lehan Pathian manpāk u ro.