Iamna lama
āchak le āchak nōk
14
1 Iamna tianga āchak nōk tak chu itē malung songankharna ruia ankhal luia pom u ro.
2 Mi senkhatin alom peia asāk thei kiarna iamna adōna,
tenchu iamna tianga achak nōk ha chu moiramasi duai āsāk ani na.
3 Aloma asāk thei kiar hān hava asāk thei nōk ha ēlsēl thō nō rase.
Hatuka asāk thei nōkin asāk thei kiar chunga ruiril nō rase,
asik chu amām Pathianin ei pom kēng.
4 Nang tu mo na ni mi tei suak chunga rui nei ril?
Hava suak ha anding mo achul mo apumān en bo ni.
Tenchu ama chu andinga om inti,
asik chu Pathianin andinga asiaktit theia.
5 Mi senkhatin nikhua khat hi nikhua atei ngāi ranga ānthiang uala abena.
Hatuka mi senkhatin nikhua dōra aloma anrual chianga abena.
Tenchu mi tinin aninga amalunga asa ati na ei mandon anga mandon chip rase.
6 Nikhua atel ngāi chu Puma sika atel ani u na.
Hatuka nikhua atel nōk ngāi um Puma sika ei tel u nōk ani na.
Hatuka alom peia asāk ngāi chu Puma sika asāk ani u na,
asik chu Pathian kōma rāisānna ei mantung ani na.
Hanūk chu sāk alōi ngāi chu Puma sika alōi ani u na,
asik chu amām Pathian kōma rāisānna ei mantung ani na.
7 Asik chu koini ngāi kāra tutē na ning ranga adam om mak me na,
hanūk chu tutē na ning ranga athīm om mak me na.
8 Na dam ten,
Puma sika adam,
na thi ten,
Puma sika athi na ni na.
Hasika han na dam mo na thi mo,
Puma ta kiar na ni na.
9 Hava sik tak han Krista chu āthi le ādam ngāi Puma ei ni rit theina ranga ama chu ei hong thīna ei anthuia ei hong dam rēt ani na.
10 Tenchu nang ichanga mo na parual chunga rui nei ril?
Hanūk chu ichang ngal mo na parual chunga elsēl nei thō?
Asik chu na lom renga Krista ruirilna chōmphāng matona nei vān ding kiar rang ani na.
11 Asik chu Lekhabu ānthianga anziak ani na:
“Pumān ei ti,
Ka makunga mankhūk
dōra ei lān bil rang.
Pathian kōma malei dōra ei
lān puang rang,
ti hi ka khomāk ansam
ani zei,”
(Isa.45:23 )
ati na.
12 Hasika han koinīn na lom renga Pathian kōma na rui nei pēk chip rang ani na.
13 Hasik han koinīn angkhatin angkhat rui anril u lāi nō rei,
tenchu na parual kal chōina ranga anbana le ankhārna hongte mo āsiak hi dik mak ati na mandon u ro.
14 Adik taka chu aloma ānthiang kiar kēng ti hi Puma Isuana angam laka kei hong riat theina ani na.
Hatuka ānthiang nōk ati na andon kōma chu ama rang duaia kēng hava ha ānthiang nōk ani na.
15 Na nēk na sāk sika na parual malung ana ten,
nang chu anditna thuaia alēng ni lāi mak che na.
Ama sika Krista ei hong thīna chu na nēk na sāk sika na parual masiat nō ro.
16 Nang na ranga asa ati na nei mandon ha mīn āsiat ril nō rase.
17 Pathian ram chu nēk le sāk rui ni mak,
tenchu Ratha Ānthianga dikna le phūkdāina le rāisānna kēng.
18 Havan tina Krista haso le dorbo andom tak chu Pathianin ei pom rua le miring mit muna lalchi thō ruana atung kēng.
19 Hasik han phūkdāina ansuak thei le nei ansōn theina ranga ansanna ngāi ha azī ranga pūt u rei.
20 Nēk sāk sika Pathian sin thō chu masiat u nō ro.
Aloma ānthiang kiar chu ani,
tenchu anēk le asāk sika mi senkhat ei anbana achang ten,
hava ānēk le āsāk ha ama ranga ādik nōk ani zei.
21 Me sāk sika mo zu nēk sika mo ole angkhat pei sika mo na parual ei anbana le malung ei nana le ei chuaina achang ten,
nei sāk nei nēk nōk ha na ranga asa.