Israel nam anniang ngāi
11
1 Kei ti chu,
hano ten Pathianin ami ngāi dōra chu ei khāi ti na mo ani zei?
Ni pial mak.
Asik chu koi len hi Israel mi,
Abraham achi le Benjamin nama mi ka ni na.
2 Pathianin aphamān āta ami riat zēt ngāi chu ei khāi ni mak.
Elija ruia Lekhabu ānthiangin hong zāt mo ei ti ha riat u mak che mo?
Amān Israel mi ngāi chunga Pathian kōma hintin hin adāi arila:
3 “Puma,
nang na deari
dōra athat u zei.
Nang na māichām dōra
amasiam u zei.
Koi rong hi annianga om
ka ni zei.
Koi um ana that ranga
aval u zei,”
ati na.
4 Tenchu akōma Pathianin imo ei masang ha?
“Baal Pathian matona
amankhūk bil lui mi asāng
sari pei koi ka ranga kei
siak ala om kēng,”
(1 Rng.19:18 )
ati pe na.
5 Havan tin ang han atun taka hunam nisela lungkhamna sika anthang anniang chu alakte kēng.
6 Hatuka hava ha lungkhamna sika aniten,
asin thō sika ni lāi mak.
Hava lungkhamna ha lungkhamna ni lāi mak.
Tenchu asin thō sika aniten hava lungkhamna ni lāi mak.
Hava asin thō ha asin thō ni lāi mak.
7 Hanle hontin mo ani zei?
Israel mi ngāiin takasāta ei ravān ha man u mak,
tenchu Pathianin ei thang ngāi kēng aman.
Atei ngāiin malung amankhir u na.
8 Lekhabu ānthianga anziak anga han:
“Pathianin amāni kōma
malung sētna apēka,
Mu thei nōkna ranga mit
apēka,
Riat thei nōkna ranga kuar
apēka,
Avian ten pei ala ni,”
ati na.
9 Hatuka David um ati na:
“Amāni bu nēkna mun chu
ankhitna le chāngte chang
rase,
Anbana lung le phuba lākna
chang rase.
10 Amānīn ei mu thei u nōkna
ranga amit u zīng pe rase,
Hatuka aruang u chu ankul pe
chian rase,”
(Sām 69:22,23 )
ati na.
Thing kolom anthō le ankhīna
11 Kei ti rēt chu:
Hanle amāni ei anba u ha anthui rēt thei u lāi lui rang mo?
Ni pial mak.
Tenchu amānīn ei masial u sika nam atei ngāi ranga sandamna ei hong om ani zei,
Israel ngāi thang ei anthuai theina ranga.
12 Amānīn ei masial u sika maniapūr ranga aneina,
hatuka amānīn ei machān u sika nam atei ngāi aneina ani zei ten,
amāni anzui kiar u tik vāng chu ituk ātam mo nei chang rang
ani na.
13 Atun chu nangni Jentail ngāi kōma chong kei ril rēt ani zei,
Jentail ngāi kōma kuitīr kei ni sika hin hiva haso le dorbo kei dom hi kei lianpui ani na.
14 Taksa lama ka phung ngāi thang kei manthuai zāma amāni bila senkhat lua chu sandama kei man thei u na ranga kei lianpui.
15 Asik chu Pathianin amāni ei pom nōkna tak ha maniapūr ranga anngoina ahong achang ten,
Pathianin amāni ngāi apom tik vāng chu thīna nāta damna rong nōk chu atei imo a om rang?
16 Bu arapa mānsa andar ānthiang aniten,
bu apumpui ānthiang ani na.
Hatuka thing kung abul ānthiang aniten,
abāk ngāi um ānthiang ani na.
17 Tenchu abāk ngāi senkhat chu kolom anthō ranga ankhiaka a om kēng ani zei.
Nang rama maruan chiak na ni ngalām nisela amāni lehan kolom anthō anga abāk le anzom kēng na ni zei.
Havan tin han atun chu amāni bila maruan kung āta razung le arathi anzūppui na ni u ani zei.
18 Hava sika han abāk ngāi chunga borāi thō nō ro.
Borāi na thō ving anten:
Nang ni mak arazung asūrtita om,
tenchu arazung kēng nang anasūrtit ti ha retit ro.
19 Tenchu nangin kolom anthō rang ngala Pathianin ei na khiak kēng ka ni do,
na ti theia.
20 Nei ti ha adik ani chu ani,
amāni chu ei iam u nōk sika ankhiak ani u na.
Hatuka nang chu iamna sika anding kēng na ni.
Ansānga anbe nō tānla achi ro.
21 Asik chu Pathianin abāk tatak ngāi lua mana hōi mak,
nang vāng chu na hōi pial nō ni.
22 Hasika han Pathian ei singzia le ei rāngzia ha mandon ro.
Ama chu nūk ankei ngāi ranga arāng ani na,
tenchu ama singna chunga nān betōk u ten,
nangni ranga Pathian ei singna chu ahong anlanga.
Hano ten nang um nisela ankhiaka om in na ti.
23 Hanum nisela amāni ngāi ha aiam nōka ala omtit u ten,
amānīm kolom anthō anga Pathianin manzom unti.
Asik chu Pathianin amāni ngāi kolom anthō anga amanzom rēt thei ani na.
24 Asik chu anzom thei lui,
nang rama maruan kung lua mana ei na tuka rahuana maruan kung āsa lehan kolom anthō anga ana manzom thei ten,
Pathianin abāk tatak ngāi vāng chu alāka maruan kung tataka ana manzom tik chu ituk mo ei ni thei rang ani na.
Israel nam dōra
sandama om inti
25 Unāi ngāi,
hiva chongrīl anthup rui hi nei riat u ranga kei zōt ani na.
Hano ten na ninga ahian nān ti viak thei u ngāi.
Hiva hi chongrīl anthup chu ani:
Jentail ngāi ranga kipna ahong asuak māseng chu Israel nam chu malung ankhīrna bāk khat man unti.
26 Nukhōna chu havan tin dēn han aloma Israel nam dōra sandama om int.
Lekhabu ānthianga anziak anga:
“Zion āta ratanpu chu hong
intia,
Jakob achi nāta Pathian biak
nōkna dōra chu hong khāi
inti.
27 Hatuka amāni ngāi āsia ei
thō u ngāi dōra ka pei suale
hiva hi amāni kōma dān kei
khitna athar rang chu ani na.”
28 Thang ahui tianga na chōi ten nangni na ranga amāni ngāi chu na rāldui,
tenchu Pathian ruatsa tianga na chōi ten na chipui ranga Pathian maditna ani na.
29 Asik chu Pathian neinun pēk lungkhamna ngāi dōra le amān ei kuina hi anlet ngāi mak.
30 Tian lāi han Pathian hē tel luia nei om u,
tenchu atun amāni hē tel nōk sika lungkhamna nei chang u.
31 Havan tin dēn
han amānīm nisela atun chu hē tel luia ei om u,
nangnīn lungkhamna nei chang u anga amānīm lungkhamna ei chang thei u na ranga.
32 Pathianin loko tak chunga alungkhamna ei manlang theina ranga Israel ngāi alom u na hē tel nōkna thuaia ei siak zit kēng ani zei.
Pathian anpākna chongkam
33 O!
Pathian riatna ei
anchong zia le ei hianna
zia chu anthūk ba!
Aruirilna ngāi um asūt sua
zāt ni mak!
Hanūk chu alampui ngāi
um athūna ariat sua zāt
ni mak!
34 Asik chu:
“Tu mo Puma malung ariat
thei ala ni?
Tu mo ama huangvār asak
ala ni?”
(Isa. 40:13 )
35 “Tu mo rathūl aman rēt
ranga Pathian kōma
hongte mo apēk mānsa
ala ni?”
(Job 41:11 )
36 Asik chu alom peia ama kōm āta le ama sika le ama ranga kiar ani na.
Ama kōma anlianna
tāituan tāituana om rase!
Amen.