Inneina rui lehan ankhīna
7
1 Unāi ngāi,
hiva hi dān āriat ngāi ranga chong kei ril.
Mi angkhat pei chunga adam sūng chu dānin achunga rui ei ril thei kēng ti hi riat u mak che mo?
2 Asik chu ruathar adōn nupang aruathar adam sūng chu dān sika aruathar kōma ānkhit ani na.
Tenchu aruathar athī sua ten,
aruathar ruia dān āta āzōk kēng ani zei.
3 Havan tin dēn han aruathar ala adama ruathar atei alāk ten ama chu mīn uiare thō ei ti rang ani na.
Tenchu aruathar athī sua ten dān āta āzōk ani na.
Hatuka ruathar atei avalākām nisela mīn uiare ti lāi nō ni.
4 Hasika han ka unāi ngāi,
thīna nāta ahong ānthui rēt Krista ataksa zāra dān lampanga chu āthī sua na ni u zeia.
Hasika han mi ta kēng na ni u zei ti anga om u ro.
Hantin han Pathian ranga mara dōn u ro.
5 Taksa ningneina thuaia na om lāi han koini ngāi na taksa angkhakhata hin āsia ningōlna tin rēng ei hong rāt ani na,
thīna ten pei mara ānsuak ranga.
Dān ei rātna taka āsia ningōlnām ei hong suak ani na.
6 Atun chu dān āta āzōk sua kēng na ni zei,
anakhit āta āthī sua kēng na ni zei.
Havan tin han machin lāia horop maruana ānziak ang ni lāi mak,
tenchu Ratha Ānthianga athara Pathian dorbō adom u rei.
Āsia thōna le Dān ādui
7 Hanle imo nei ti rang?
Dān hi āsia thōna mo ani zei?
Ni pial mak.
Āsia thō hi imo,
hava ha dān om nō sela chu koiin hong riat nō ning.
Hanūk chu dānin:
“Mi ta ningōl nō ro,”
ti chong hi na ril nō sela chu,
ningōlna hi imo ani ti kei hong riat nōk rang ani na.
8 Tenchu āsia thōna hān hava chongpēk taka han mun amana āsia ningōlna tin rēng ka malunga ei hong lūt ani na.
Asik chu dān abui ten āsia thō rui um āthī ani na.
9 Mān lāi han chu dān abuia adam ka ni na,
tenchu chongpēk ahong asuak āta chu āsia thōna chu ei hong dam rēt ani na.
Tenchu koi chu āthī sua kēng ka ni zei.
10 Damna apēk thei chongpēk ngēt ha koi ka ranga chu thīna kēng ei chang ti anlang phāta.
11 Asik chu hintin hin ani na,
āsia thōnān chongpēk amanga mun amana ei na hong huang,
hava lehan ei hong that ani na.
12 Hava sika han dān chu ānthiang,
chongpēk um ānthianga,
hanūk chu hava ha ādik le āsa
ani na.
13 Hano ten asa neinun ha ka ranga thīna mo ei chang ani zei?
Ni pial mak.
Tenchu āsia thō chu āsia thō dēn kēng ei manlang theina ranga hava asa amanga han ka ranga thīna ei hong suak viak ani na.
Hantin han āsia thō chu chongpēk amanga āsia thōna lama ei manlang riam ani na.
14 Asik chu dān hi ratha lam kēng ei rakōk ti nei riat ani na,
tenchu koi chu taksa lama mi ka ni.
Āsia thōna suaka ānzuar sua kēng ka ni zei.
15 Asik chu kei thō hi kei riat chachak nōk ani na.
Hanūk chu āthō rang kei zōt ha kei thō chachak nōk.
Tenchu kei matīr ha kēng kei thō viak chachak.
16 Tenchu kei zōt nōk ha ka thō chachak le dān chu asa kēng ati na kei pom ani na.
17 Atuna hiva ding muna kei la thō chian hi chu koi ni lāi makunga āthō tenchu koia āsia a omtit ha kēng āthō chachak ani zei.
18 Asik chu koi ka taksāna hin āsa neinun itē om mak ti ka riata.
Asik chu koiin sin āsa thō rang ka zōtām nisela sin āsa thōtheina lampui mu makunga.
19 Sin āsa thō ranga kei zōt ha kei thōthei chachak nōk,
tenchu sin āsia thō rang kei zōt nōk ha kei thō chachak.
20 Atuna kei zōt nōk zāt kei thō chachaka hin koi ni lāi makung āthō chachak tenchu koia a om āsia ha kēng āthō chachak ani zei.
21 Hava sika han atun chu sin āsa āthō rang ka zōt tikle pei āsia chu ka kōma ahong a om len chachak ka riata.
22 Asik chu koi ka sūngrīl tataka Pathian dān chu kei phām ani na.
23 Tenchu ka taksa ngāi angkhakhata hin om dān atei ka hong man rēta.
Hava ha koi ka malunga dān lehin āndui chian ani na.
Hatuka ka taksa angkhakhata āsia a om dānin ei na khita ei na maruai ani na.
24 Vān aduai miring khak pei ka ni zei!
Hiva āthi thei taksa nāta tu mo anahuai thei rang?
25 Tenchu koini na Puma Isua Krista zāra Pathian kōma rāisān chong ka mantung theia.
Hasik han koi chu ka sūngrīla Pathian dān kēng dorbō kei dom,
tenchu ka taksāna chu āsia thōna dān kēng dorbō kei dom.