Iamna mara
5
1 Hasika han iamna zāra Pathianin asat ei na manlō sika hin koini na Puma Isua Krista zāra Pathian le anngoina nei man ani na.
2 Hanūk chu ama sik dēna iamna sika hiva lungkhamnana alūt theina nei chang ani na,
hava ha koini nei andingnām ani na.
Hasika han hong u ro,
Pathian anlianna ansabei chunga rāi mansān u rei.
3 Tenchu hava rong ni mak,
antakna chungām borāina dōn u rei.
Asik chu antaknān dūkdiarna ei masuak ti hi nei
rua ei masuak ani na.
5 Ratha Ānthiang koini na kōma anpēk lehan Pathian anditna chu koini malung sūnga ei hong tam ani na.
Hava sika ansabeina hān mualphui na sak mak.
6 Koini ngāi ranak dōn luia na om lāia ahun taka Krista chu Pathian biak lui ngāi ranga ei hong thi.
7 Midik khat rathūla mi angkhat anni athi ving rang a om theia,
tenchu mi āsa khat rathūla chu mi senkhat athi rang angam om inti.
8 Tenchu Pathianin koini ranga ei na ditna chu hintin hin ei hong manlang ani na.
Koini mi salui na ni lāia Krista chu koini rathūla ei hong thī ani na.
9 Hasika han atun chu Krista thisena asat ei na manlō sika taksitna ahong atung rang āta ituk ātam mo Pathianin ei na mazōk rang ani na.
10 Pathian rāldui na ni lāi tak han anāi pasal ei hong thīna lehan Pathianin ama le koini chu ei na manngoi ani na.
Hava sika han ama le koini ei na manngoi sika ituk ātam mo ama damna lehan nei zōk rang ani na.
11 Hava rong la ni mak,
tenchu atuna koini na Puma Isua Krista zāra anngoina nei man sika hin Pathian chunga borāi thōna dōn u rei.
Adam sika thīna
Krista sika damna
12 Hivan tin hin mi khat dak sika āsia chu maniapūra ei hong lūt ani na,
hatuka hava āsia sika thīna ei hong lūt ani zei.
Hava sik tak han aloma mi tin chunga thīna ei anthek ani na,
asik chu aloma āsia thō kiar kēng ani zei.
13 Dān a om mān āta āsia chu maniapūra a om kēng.
Tenchu dān abui ten hava āsia ha ansūr ngal pial nō ni.
14 Hanum nisela Adam ahun len āta Mosi ahun ten pei chu Adamin dān ei khēl anga āsia athō ngal u nōkām mi tin tak chunga thīnān rui ei hong ril ani na.
Hiva taka hin Adam chu ala hong rangpu khat lehan ei hong mankhīna ani na.
15 Tenchu lungkhamna ānpēk chu masial athō lehan ankhī rua ni mak.
Asik chu mi khat dakin dān ei khēl sika mi tamtak ei thī ani na.
Tenchu hava nēka han Pathian lungkhamna le miring khat,
Isua Krista zāra man abuia ānpēk lungkhamna chu mi tamtak chunga ituk mo aliama ei om ani na.
16 Hatuka lungkhamna ānpēk chu mi khat masial ei thō anga ni mak.
Asik chu mi khatin dān ei khēl sika āsia anlōna ranga ruirilna chu ei hong suak ani na.
Tenchu masial tamtak sika asat anlōna ranga lungkhamna man abuia ānpēk chu ei hong anlang ani na.
17 Asik chu mi khat masial sika hava mi khat amanga thīnān rui ei ril ani na.
Havan tin dēn han lungkhamna liam le dikna tamtak alō ngāi chunga mi khat Isua Krista zāra ituk ātam damna lehan mo amānīn rui ei ril u rang ani na.
18 Hava sika han mi khat masial sika aloma mi tin tak chunga āsia anlōna ei hong suak ani na.
Havan tin dēn han mi dik khat sin thō zāra mi tin tak chunga damna ranga asat anlōna ei hong suak rēt ani na.
19 Hanūk rēt chu mi khat hē tel nōk sika mi tamtak āsia ei chang u ani na.
Havan tin ang dēn han mi khat hē tel sika mi tamtak adik ei anlō ani na.
20 Dān hē khēlna chu ei pung tirna ranga dān chu ei hong suak ani na.
Tenchu āsia thō ei pung tirna muna kēng lungkhamnām aliama ei pung riam ani na.
21 Asik khīt chu āsia thōna hīn thīna āpēk theina ranga rui ei
ril anga,
lungkhamnān dikna amanga tāituan damna ranga koini na Puma Isua Krista zāra han rui ei ril ani na.