Āsia thō sika thīna
Krista sika damna
6
1 Han tin han aniten hong
mo nei ti rang ani zei?
Lungkhamna chu ei pung riam theina ranga mo āsia chu nei thō riam rang ani zei?
2 Ni pial nō ni.
Asik chu koini chu āsia thō rui renga chu āthi sua kēng na ni zei hale,
hontin mo āsia thōna lama nei la om chian rang?
3 Isua Kristana koinīn baptisma nei lāk hi ama ei thīna anga baptisma lāk kēng na ni zei ti hi nei riat ni u mak mo?
4 Asik chu koinīn baptisma nei lāka hin Krista ei thīna bila han thāna ānphūm kēng na ni zei.
Krista chu āthi ngāi bil āta Pā ei anlianna lehan ei mathui rēt anga koinīm nisela damna thara kal chōi rēt u rei.
5 Asik chu ama ei thīna anga ama le munkhat na chang ten,
amān thīna nāta ei ānthui rēt anga ama le angkhat chang inti.
6 Koini na miring marua chu Krista bila han krosa āntār sua kēng ani zei ti ha nei riat ani na.
Hasik han hava pang āsia thō taksa nāta nei zōka āsia thōna suaka nei om lāi nōkna ranga.
7 Asik chu tukareng āthi sua ha chu āsia thō nāta azōk sua kēng ani zei.
8 Krista bila āthi sua na ni ten,
ama bila damna man rēt inti ti hi nei iam ani na.
9 Krista chu āthi ngāi bil āta ahong anthui rēt kēng ani zei ti hi nei riat ani na.
Hasika han ama chu hava pang thī lāi nō ni.
Ama chunga thīnān ningneina dōn pial lāi nō ni.
10 Ama ei thī han āsia thō rui renga chu khēp khat len ranga āthī kēng ani zei.
Tenchu ama kōma damna a om chu Pathian sika adam kēng.
11 Hasika han nangnīm nisela āsia thō ruia chu āthī sua anga,
tenchu koini na Puma Krista Isua zāra Pathian sika adam anga anbelbo u ro.
12 Hasika han āsia ningōlnān ei na mator thei u lāi nōkna ranga āthī thei na taksa u chunga āsian ruiril lāi nō rase.
13 Na taksa u angkhakhat chip hi ādik nōk tianga mangrua anga āsia thōna ranga betōk u nō ro.
Tenchu āthi nāta ānthui rēt anga na thei chip u na Pathian kuta anbetōk u ro.
Hanūk chu na taksa angkhakhat chip hi dikna tianga mangrua anga Pathian kuta anbetōk u ro.
14 Dān thuaia om nei ni u lāi nōk sika han āsian na chung u na ningneina dōn lāi nō rase,
tenchu lungkhamna thuaia om kēng na ni u zei.
Ādik anlō ranga suak
15 Hanle dān thuaia om ni lāi mak mena tenchu lungkhamna thuaia om kēng na ni zei nei ti sika mo āsia nei thō chian rang ani zei?
Ni pial mak.
16 Tukhatin mo mi khat pei achong atel ranga anpēk u tānla,
ama achong nei tel u han ama asuak ni mak mo nei chang u rang ti hi anriat u mak che?
Thīna ranga āsia thōna suak nōk ten,
ādik anlōna ranga Pathian hē tel suak mo angkhat pei chu nei chang u ani na.
17 Tenchu machin lāi han chu āsia thō suak na ni u nām nisela,
anchūna lam ang taka nei anruai u,
malung tataka hē nei tel u sika Pathian kōma rāisānna chong ka mantung.
18 Atun hin chu āsia thō nāta nei zōk u na ādik anlōna suaka kēng nei om ani u zei.
19 Na taksa u ngāi ei rāt nōk sika hin monisi chong anga kei chong ani na.
Asik chu na taksa u angkhakhat dān hē ha akhēl ranga anthiang lui le dān abui suak anga nei anbetōk u ani na.
Havan tin dēn han atun chu na taksa u angkhakhat ha ānthianga om ranga dikna suak anga anbetōk u ro.
20 Āsia thō suaka na om u lāi chu ādik anlōna rui āta chu āzōk na ni u na.
21 Hava lāi han hong mo mara nei man u ha?
Atun chu hava ngāi rui ha ānzakpui ruana nei be ni u zei ni?
ataktaka hava ngāi dōra ei hekna mara chu thīna ani na.
22 Tenchu atun hin chu āsia thō nāta azōk kēng na ni u zei,
hanūk chu Pathian suak achanga anthiangna ranga mara nei man ani u zei.
Hatuka hava ngāi ei ānzuina chu tāituan damna ani na.
23 Asik chu āsia thōnān ei manlō chu thīna,
tenchu Pathian lungkhamna man abuia ānpēk chu koini na Puma Isua Krista zāra tāituan damna ani na.