Ratha zāra damna
8
1 Hasika han atun chu Krista Isuana a om ngāi dōra chunga āsia anlōna itē reng om lāi mak.
Asik chu taksa dān anga ni lāi mak,
tenchu Ratha dān anga kēng kal ei chōi u ani zei.
2 Asik chu Krista Isuana a om damna Ratha dān lehan koi chu āsia thōna le thīna dān āta ei na mazōk kēng ka ni zei.
3 Taksa chu ei rāt nōk sika dānin ei thōthei nōk ha Pathianin ei hong thō ani na.
Ama a Nāi Pasal ngēt ha masial abui taksa mēl anputa,
āsia thō sika anbōlna rang anga ei hong tīra hin āthī thei taksa lehan āsia thōna chu ei hong ratan ani na.
4 Asik chu koini ngāi nunchanga Pathian lampanga dān ngāi dōra ei kip theina ranga le koini na taksa ei zōt anga ni mak,
tenchu Ratha ei zōt anga kal nei chōi theina ranga ei hong tīr
ani na.
5 Asik chu taksa zōt dāna a om ngāi chu taksa ruia kēng malung ei pēk u.
Tenchu Ratha zōt dāna a om ngāi chu Ratha ruia kēng malung ei pēk u.
6 Asik chu taksa rīlruput chu thīna ani na,
tenchu Ratha rīlruput chu damna le phūkdāina ani.
7 Asik chu taksān ei pūt chu Pathian le āndui ani na,
hivan tina rīlruput ngāi chu Pathian dān zēk anga lēng u mak,
lēng um tatak thei u mak.
8 Hanūk chu taksa zōt dāna a om ngāi chu Pathian rāi mansān thei u mak.
9 Tenchu Pathian Ratha chu nangni sūngrīla ei hong om sika han taksa mi ni u lāi mak chena,
Ratha zōt dāna om kēng na ni u zei.
Tenchu tukareng Krista Ratha dōn lui tak chu Krista mi ni mak.
10 Tenchu Krista chu nangni sūngrīla a om ei ni sika han āsia thō sika na taksa u chu athi sua kēng ani zei.
Hanum nisela Ratha chu adik ei anlō
sika han damna ei dōn ani na.
11 Pathianin athi ngāi bil āta Isua chu ei hong mathui ani na.
Hatuka hava Pathian Ratha ha nangni ngāi sūngrīla a om ani na.
Hasika han athi ngāi bil āta Krista ahong anthui rētpu Ratha ha nangni ngāi kōma a om ten hava Ratha zāra athi thei na taksa u ha athara hong dam rēt inti.
12 Hava sika han unāi ngāi,
āntāng kēng na ni,
tenchu taksa zōt dāna a om ranga taksa kōma antāng ni mak me.
13 Asik chu taksa zōt dāna nei om u sika han nei thi ngēt u rang ani na.
Tenchu taksa sin thō ngāi dōra aloma Ratha zāra nei that zit u sika han dam un na ti.
14 Asik chu Pathian Ratha le anruai ngāi dōra chu Pathian nāi ani u na.
15 Asik chu nangnīn anchi rētna ranga suak changna ratha ni mak nei man u,
tenchu anāi manchangna Ratha kēng nei man u.
Hava Ratha ngēt lehan koinīn “Abba,”
ati na nei pāi ani na.
16 Ama aninga Ratha le koini ngāi ratha lehan Pathian nāi nei chang ti hi ei na manriat ani na.
17 Hasika han atun chu nāi nei ni sika han dōng aluapu na ni zei.
Hatuka Pathian āta dōng aluapui nei ni sika hin Krista bila dōng aluapu na ni zei.
Havan tin han ama bila antak nei tiarpui sika han ama bila anliannam chang inti.
Anlianna ala hong anlang rang
18 Atun hun lāi taka antakna koinīn nei tiar hi chu nangkana anlianna koini na ranga ala hong anlang rang le chu ankhi rua ngal ni mak.
19 Asik chu alom peia ansin ngāi dōrān Pathian nāi ngāi ei hong anlang u na ranga anhūi chunga alei mangang u kēng ani zei.
20 Asik chu ansin ngāi dōra hi anzuia ei la om u nōkna ranga amān ei siak kiar ani na.
Hava ansin ngāi ha amāni ei zōt ang taka ni mak tenchu ama ei zōt ang taka asinpu hān ei man om ani na.
21 Tenchu ansin ngāi ngēt um nisela Pathianin āsiat thei suak āta azōka,
Pathian nāi ngāi ranga anlianna zōknana alūt ranga ei mangang chian ani na.
22 Asik chu ansin ngāi dōra aloma atun ten pei hin anruala ankhēk le anruala nāiha anga antak atiar kēng ani u zei,
ti hi nei riat ani na.
23 Hava duai ha ni mak,
tenchu koini Ratha mara mānsa āman ngāi um nisela na sūngrīl tianga nei ankūi ani na.
Hatuka koinīn anāi changna rang le na taksa ratanna chu nei ngāk chian ani na.
24 Asik chu ansabei sika hin sandamna nei man ani na.
Tenchu mita mu thei ansabei chu sabei ni thei mak.
Asik chu mita ei mu thei chu ichanga mo nei la sabei chian rang ala ni?
25 Tenchu mita nei mu thei nōk na sabei ten adiar chunga nei ngāk chian rang ani na.
26 Havan tin han Ratha chu koini ngāi nei rāt nōkna tina ei na hong san ani na.
Asik chu bōr nei zong rang anga azong ha koinīn riat mak me.
Tenchu Ratha hān arilna chang abuia ankūia koini rathūla niai ei na thō pe chian ani na.
27 Asik chu Pathianin sūngrīl dōra aloma asun chit thein Ratha malung vong chu imo,
amān ariata.
Asik chu amān Pathian zōt dān ang taka mīn thiang ngāi ranga niai ei zong pe ani na.
Arāt nēka ārāt khīt
28 Asik chu Pathian andit ngāi le amān ei mansūk ang taka ei kui ngāi ranga alom peia anrual chianga amāni ei sa thei u na ranga Pathian sin thō kēng ti nei riat ani na.
29 Aphamān āta amān alei riat zēt ngāi chu,
ama anāi pasal mēlruang anput ranga aphamān āta alei ruat zēt kēng.
Asik chu unāi ātampa kāra ama chu nāi atontīr mānsa ti ei chang theina ranga.
30 Aphamān āta amān alei ruat zēt ngāi chu amān ei kui um len ani na.
Hatuka amān ei kui ngāi chu adik um ei manlō len ani na.
Hanūk rēt chu adik ei manlō ngāi chu ei manlian um len ani na.
31 Hiva chunga hin imo nei ti rang?
Asik chu Pathian koini na tianga akop ten tu mo koini anadui thei rang?
32 Pathianin anāi pasal len manar thak luia koini ngāi na loma ranga ei hong betōk ani na,
hasika han ama bila alom peia phal taka na hong pe kiar nō ni mo?
33 Pathian ami ruat ngāi chunga tu mo āsiat anlō thei rang?
Asik chu Pathian lenin adik ei manlō ani na.
34 Tu mo āsiat aril thei rang?
Krista chu ahong athīna,
tenchu ahong anthui um rēt zeia.
Atun hin ama chu Pathian chang tianga avaom zeia,
hanūk chu koini ngāi rathūla niai ei thō ani na.
35 Krista anditna nāta hong zāt mo anān sen thei rang?
Antakin mo?
Lunghāngin mo?
Pēngsōmnān mo?
Māitāmin mo?
Sāikorongin mo?
Anchinān mo?
Khendāiin mo ei na mansen thei rang?
36 Lekhabu ānthianga anziak anga:
“Nang na sika sūn asōt anthat
ranga anga nei om.
Anthat ranga bera anga ānbe
kēng na ni zei,”
(Sām 44:22 )
ti ani na.
37 Tenchu hiva ngāi dōra chunga koini anānditpu zāra ārāt khīt nēka ārāt sabaka nei om ani na.
38 Asik chu anchang maia kei iam ani na,
thīna mo,
damna mo,
vānpalāi ngāi mo,
anlalna ngāi dōra mo,
thōtheina ngāi mo,
atuna huna a omsa ngāi mo,
nangkan huna ala honga om rang ngāi mo.
39 Ansāng lam mo,
anthūk lam mo,
atei ansin ngāi dōrān koini na Puma Krista Isuana a om Pathian maditna nāta itē rengin na mansen thei mak.