Tukareng ama a iam tak
10
1 Unāi ngāi,
ka malunga kei zōtna le Pathian kōma amāni ranga ka bōrzongna chu Israel ngāi sandamna ei man thei u na rang hi ani na.
2 Pathian lampanga atep annēl u ti chu koi lenin ama ruia kei riatpui u ani na.
Tenchu hava ha riatna ang taka ni mak.
3 Asik chu Pathian āta dikna riat luia hanūk chu amānīn athetheia dikna andet ranga ei val u sika han Pathian dikna kōma anphal u mak.
4 Tukareng aiam takin dikna ei man thei u na ranga Krista chu dān ei ankīmna ani na.
5 Dān ang taka ei zōm sika dikna asuak rui chu Mosīn hintin hin amaziaka:
“Havan tina azōm miring
tak chu hava ngāi
lehan dam rase,”
(Lev.18:5 )
ati na.
6 Tenchu iamna nāta dikna āsuak chu hintin hin ati na:
“Na malungsūnga tu mo
anvāna akal rang?”
(Dān.30:12 )
hava tina chu,
Krista chu thuai tianga ansum,
ti na ani na.
7 Hanūk chu,
“Tu mo khurvīng anthūka
avachum rang?”
(Dān.30:13 )
hava ti na chu Krista thīna nāta chunga ankhal,
ti na ani na.
8 Tenchu Pathian lekhabūna hintin hin ti mak mo?
“Hava chong ha na kōla a om
ani na.
Hava ha na mūr le na malunga
a om kēng,”
(Dān.30:14 )
ati na.
Hiva tak hi iamna chong koinīn chong nei ril chachak ha ani na.
9 Asik chu nangin na mūr le Isua chu Puma ati na na puanga,
hatuka na malung le ama chu āthi ngāi bil āta Pathianin ei mathui ti na iam ten,
sandama om na ti.
10 Asik chu nang na malung lehan nei iama adik nei anlō ani na,
hatuka nang na mūr lehan nei puanga sandama nei om ani na.
11 Asik chu Lekhabu ānthianga ei ti:
“Tukareng ama aiam tak chu mualphui ansak pial nō ni,”
(Isa.28:16 )
ti anziak ani na.
12 Jihudi mi le Grik mi kāra itē ei teina om mak,
asik chu Puma khat ha lokōna Puma ani na.
Ama āpāi ngāi dōra chunga achālaka lungkhamna apēk.
13 Asik chu Lekhabu ānthianga ei ti:
“Tukareng Puma raminga apāi tak chu sandama om inti,”
(Joel 2:32 )
ti anziak ani na.
14 Hanle hontin mo amānīn ei iam u nōk kōma ei pāi u rang?
Hanūk chu hontin mo achong ngal ei rangāi u nōk kōma ei iam u rang?
Chong arilpu abuia hontin mo ei rangāi u rang?
15 Hanūk chu antīr khat abuin hontin mo chong ei varil rang?
Asik chu Lekhabu ānthianga anziak:
“Anngoina thang ahui ahong
achōi ngāi le
rāisānna thang ahui aril
ngāI ke chu Ituk mo
ei anhui so!”
(Isa.52:7 )
ati na.
16 Tenchu alom u na thang ahui pom kiar u mak.
Hasik han deari Isaian ei ti:
“Puma,
koini na chong ril
ngāi tu mo ana iam pe
ani u zei?”
(Isa.53:1 )
ati na.
17 Hasika han iamna chu chong anril ei rangāi āta honga suak ani na,
hatuka hava chong anngāi ha Pathian chong āta ahong ani na.
18 Tenchu kei ti chu:
Amānīn rangāi tatak u mak mo?
Anngāi chu arangāi ngēt u.
Asik chu:
“Arōl u ngāi chu ramual
pumpuia avān thang kēng
ani zei,
Hanūk chu achong u ngāi
maniapūr kōlkil ten pei
kēng ei anring ani zei,”
(Sām 19:4 )
ti ani na.
19 Tenchu ti rēt ka ti:
Israel mi ngāiin riat tatak thei u mak mo?
Māna han Mosīn ati na:
“Nam ati na antel lui ngāi
amanga khāmaret na
manthō ka ti,
Riatna dōn lui nam ngāi
amanga taksitna manphiang
ka ti,”
(Dān.32:21 )
Pumān ati na.
20 Nukhōna Isaian arāng sabaka ati na:
“Koi na ravān lui ngāiin ana
man u zei.
Koi anathūn nōk ngāi kōma
ka ninga kei anlang ani
zei,”
(Isa.65:1 )
ati na.
21 Tenchu Israel mi ngāi rang Pumān ati na:
“Hē tel lui nam ngāi le
amakhal antak nam ngāi
ranga anikhuan tin pei ka
kut kei phar chian,”
(Isa.65:2 )
ati na.