Anbōlna dam
12
1 Unāi ngāi,
hava sika han Pathian riangvāimuna tin reng lehin kei na mathēm ani u zei,
na taksa u ngāi chip anbōlna adama,
ānthianga le Pathianin ei pom dāli anga andar u ro.
Hava tak ha nangni na ranga ansūk Pathian biakna dorbōndom chu ani.
2 Hi maniapūr ei om dān anga anlet u nō ro,
tenchu na malung u anthara anthūl u ro.
Hankēng hong zāt mo Pathian zōt dān ngāi ha asa le ei pom zāt le akip chu thiar thāk thei un na ti.
3 Ka tak chunga Pathian lungkhamna anpēk anga na lom u ranga kei na ti ani u zei,
nang nei ni rang tuk nēka ansānga na ninga andonna tutēn dōn nō rase.
Tenchu Pathianin akōma iamna ei pēk zotor anga aninga andonna dik dōn rase.
4 Asik chu taksa pumkhata hin abāksem tamtak a om a,
tenchu hava ngāi asin thō chu mun khat ni zit mak.
5 Havan tin ang han koini hi ātampa na ni,
tenchu Kristana pumkhat kēng na ni.
Angkhat angkhat aloma anzom kiar kēng.
6 Pathianin alungkhamna ei na pēk anga bōrpēk atetei ei na pēk chip ani na.
Hava bōrpēk ha deari chong rilna aniten,
iamna nei dōn tuk le mang u rei.
7 Hava ha hasōndom tianga aniten,
hasōndoma mang u rei.
Hatuka anchūna tianga aniten,
anchūnana mang u rei.
8 Hava ha lungngam ansakna aniten,
lungngam asaka anmang rase.
Pēkna tianga aniten,
manpām luia pe rase.
Hatuka ruaitu tianga aniten,
aphām chunga thō rase.
Lungkhamna tianga aniten,
rāisān taka lungkham mu rase.
Sūng suakpui anditna
9 Anditna chu atak ni rase.
Asa nōk chu mumāk tatak u ro.
Asa chu koptit u ro.
10 Sūng suakpui anditna lehan lungkham anmun lōm u ro.
Lalchi thōna konga nang na nēka mi tei ha uliana be u ro.
11 Sin āsa thōna konga han andōk nō tānla ratha lama na āk mathui u ro,
Puma haso chu adom u ro.
12 Ansabeina nei dōna hin na rāi mansān u ro.
Antaknana hin diar zām u ro.
Bōr azonga om chian u ro.
13 Mīn thiang ngāi dangandana neinun ansempui u ro.
Khual antung dorbōndom lama tep annēl u ro.
14 Pēngsōm ana thō ngāi chunga bōrsāng pe u ro,
bōrsāng pe tān khomāk sam u nō ro.
15 Rāi ansān ngāi kōma rāi mansānpui u ro.
Achap ngāi kōma chappui u ro.
16 Mandon munkhat achōi ni chip u ro.
Chongpāk ansal u nō tān,
tenchu ding mun annuai mi ngāi bila anlop u ro.
Na ninga ahian anlō u nō ro.
17 Tutēn masial rathūla masial dēn le ratha thuan u nō ro.
Mi tin mit muna asa tina anlang sin āsa ha thō u ro.
18 Athei ten,
nangnīn nei pha thei zotor u miring dōra le anngoia om ranga val u ro.
19 Kei madit ngāi o,
na ning u na phuba la u nō ro,
tenchu Pathian taksitna ranga mun pial u ro.
Asik chu Lekhabūna anziak:
“Phuba lāk rang chu koi kēng ka ni.
Koiin ratha thuan ka ti,
hiva hi Pumān ei ti,”
(Dān.32:35 )
ati na.
20 Hava sika han,
“Na rāldui avon anchām ten,
bu manne ro,
Ati anrāl ten,
tī manne ro.
Asik chu havan tin han na
thō ten,
Alu sīpa moi raēk anlingpa nei
buk pe kēng ani zei.”
21 Asa nōkin nangni ngāi na mandōk u nō rase tenchu asa lehan asa nōk chu mandōk u ro.