Melita ram ei suak u na rui
28
1 Hatuka azōk kiar u na tānga avakal sua u le hava mualanlān raming ha Melita kēng ti ariat u na.
2 Hava muna aram mi a om ngāiin achālaka lungkham ana mu sabak u na.
Alom u na ana phām u na.
Kei ti na asik chu hava lāi han rua ei chul chian le hanūk chu ei dāi sika moi ana thō pe u na.
3 Hatuka Paul chu thing raput khat pei avarasuanga moia ahong buka.
Hatuka moi alum sika han asūng āta sokinching khat ahong asuaka akuta amachuk pe khapa.
4 Hatuka hava muna aram mi a om ngāiin akuta marūl ei anzēl amu u na amāni le amāni achong u na:
“Hiva mi hi mi that ngēta ahong pei ei ni rang.
Asik chu tipuilian āta ahong azōk hiaiām nisela,
phuba lākpu hān adam ranga mazōk lāi mak,”
ati u na.
5 Tenchu amān akut āta marūl chu moia athing raka itē achanga anre mak.
6 Hanum nisela amāni hān chu anthing pentia anlāiseka thi rak inti ti ha ei iam u ani na.
Asōt miaia a en chiana angāk u na itē chang pe lāi mak ti ariat u na mandon atei achōi viak rēt u na.
Amānīn:
“Ama chu Pathian khat pei chu ani zei,”
ati u na.
7 Hava ram kōla mualanlāna khua ulian khatin ram adōna,
araming Publia ani na.
Ama hān koini ngāi ana phām sabaka a
ina nīnthum pei ana manriaka.
8 Hava lāi han Publia apa chu rāitun le ēksen atonga azāl chian ani na.
Hatuka ama avaen ranga Paul chu asūnga avalūta.
Bōr avazong suale hava mi achunga akut abānga adam lena.
9 Havan tin han athō suale chu hava mualanlāna a om atei ala om ana ngāi akōma ahong u na,
Paulin alei mandam kiara.
10 Hava nam ngāi hān lampui tina alom peia lalchi ana thō u na.
Hatuka rakuangpuia anvei ranga athara nānsin rēt le chu koini nei nāng dōra chu rakuangpuia ana hong siak pe u na.
Rom khopuia ei tungna rui
11 Hatuka tha anthum suale Aleksandria khuana rakuangpuia na hong anveia.
Hava rakuangpui hān anlāp theina andangna Parual Anphīr Pathian ramīl adōna.
Hava rakuangpui ha nūdin hun lāia
chu hava mualanlāna ei mang u chachak ani na.
12 Hatuka Surakos khuana na hong anbena hava han nīnthum na om a.
13 Havan āta nān lēng chiana Rhegiom khuana na vatunga.
Hatuka zīng khuavāra sim thīnthi ahonga,
nīnni changna nikhua han chu Puteoli khuana na vatunga.
14 Hava khuana han unāi ngāi senkhat nān tongpuia.
Amāni bila ni sari a om ranga ana mathēm u na.
Havan tin han Rom khopui chu nei vapan thei ani na.
15 Rom khopui āta unāi ngāiin koini na thang alei riat u na Appia Bazār le Khualbūk Anthum tenpei alana koini ana lei hong zong u na.
Paulin amāni ngāi chu amu na Pathian kōm rāisān chong aman tunga lungngamna apēka.
Rom khuana ei om rui
16 Hatuka Rom khopui sūnga na tung suale sipai raza aruaipun ankhum ngāi chu sipai omna ina aruaia sipai ruaitu khat kōma abetōka.
Tenchu Paul chu athei daka sipai arungpu le a om ranga sipai raza aruaipun phalna apēka.
17 Hatuka nīnthum suale Paulin hava muna a om Jihudi nam ngāi bila ruaitu ual ngāi chu akōma akui kiara.
Hatuka ahong ankhōm kiar u le amāni kōma:
“Parual le unāi ngāi,
koini na nam le ankal hanūk chu koini na chipui ngāi om dān andui itē kei thō om mak.
Hanum nisela Jihudi ngāiin Jerusalem khopuia ei na sūr u na Rom mi ngāi kuta ei na betōk u ani na.
18 Hatuka Rom mi ngāiin achālaka anaradēk u na,
kei thīna rang khop itē masial man u mak anān zōk rang ei zōt u ani na.
19 Tenchu Jihudi ngāiin koi ei na mansūr khakhak u sika han Kaisar ruirilna kōma ahong andar kei nāng ani zei.
Ka nam ngāi chunga itē ansialna rang chong dōn makung.
20 Hava sika han nangni ngāi anān mupuia ana chongpui u ranga kei na mathēm u.
Hiva zīngzir le kei ankhitna chu Israel ngāiin ei mangang u sika kēng,”
ati na.
21 Hatuka amāni ngāiin Paul akōma:
“Judia ram āta tutēn ahonga na ruia lekha ana honga pēk om u mak,
hanūk chu unāi ngāi bilām tutē ahonga na siat itē ahong aril la om mak.
22 Tenchu nang na mūr ngēt āta hava pōl ngāi ruia imo nei mandon ariat rang na zōt.
Asik chu mi tin mūra hava pōl rui āsiat aril sabak u,”
ati u na.
23 Hatuka ama ranga nikhua angkhat aruat u na,
hava nikhua taka han ama ei tungna ina han mi tamtak ahē anngāi ranga asē u na.
Hava han zīng len āta zān ei zīng ten pei,
amāni kōma Pathian ram rui chu marit ansuan sabaka aman riata.
Mosi dānbu len āta aphuta deari ngāi lekhabu ten peia Isua aruia anril ngāi dōra aman riata.
24 Hava ngāi achong rila han senkhat chu aman nuama tenchu senkhat chu iam thei u mak.
25 Amāni le amāni kāra ngal chong anrual thei u mak.
Hatuka Paulin hiva ei hekna chong khat dak aril suale asē rang ati u na.
Paul achong ril chu hiva hi ani na:
“Ratha Ānthiangin anthiang vanga deari Isaia amanga koini na chipui ngāi kōma hiva hi alei ril sua sa ani na.
26 Asik chu Isaian:
‘Hiva nam ngāi kōma sē
tānla varil ro.
Nangnīn anngāia rangāi
un na ti tenchu,
nangnīn
riat pial thei u nō ta ni.
Amuna mu un na ti tenchu,
nangnīn mu pial thei u nō
ta ni.
27 Asik chu hiva nam ngāi
malung chu itē re lui aīt
kēng ani zei.
Akuar le ei rangāi u tenchu
antak chunga kēng ani
u zei.
Amit u ngāi um amansīng
u zei.
Ni nō sela chu amit le mu untia,
Akuar le rangāi untia,
Amalung le vār untia,
Amalung u hong makhīr u na
ka lei mandam thei rang
ani,’
ati na.
28 Hasika han nei riat u ranga kei zōt chu hiva sandamna hi Pathianin Jentail ngāi kōma ei hong tīr ani ti hi ani na.
Hava tak ha amānīn rangāi unti,”
ati na.
29 Hatuka hiva chong ngāi aril suale Jihudi ngāi achālaka ankhal chunga alom u na achīn zit u na.