Isuan tichang abuikhapa azolāi ngāi ngā tam ei mansūr rui
21
1 Hava ngāi suale Tiberia tīndīl varāla Isua chu azolāi ngāi kōma ahong anlang rēta.
2 Hivan tin hin ama chu ei hong anlangna ani na.
Simon Peter,
Thoma,
mīn Didumo ei ti,
Galili rama Kana khuana Nathaniel,
Zabedai anāi pasal anni ngāi le azolāi atei anni ngāi ha mun khata a om ani u na.
3 Simon Peterin amāni kōma:
“Koi chu ngā sūr dēna āsē rang ka ni zei,”
ati na.
Amānīm akōma:
“Koinīm nang na bila nei hong rang,”
ati u na.
Hatuka asuak u na rakuanga avachuang len u na.
Tenchu hava zāna han itē man u mak.
4 Hatuka khua ahong avār suale Isua chu tīndīl rakhama ahong āndinga.
Hanum nisela zolāi ngāiin ama ha Isua ani ati na riat thei u mak.
5 Isuan akōm u na:
“Nāi ngāi,
asāk rua hongte mo nei dōn u mo om?”
ati na.
Amāni hān akōma:
“Dōn mak me hile,”
ati na amasang u na.
6 Hatuka Isuan akōm u na:
“Rakuang chang tianga na lēn dēng u ro,
ngā man u na ti,”
ati na.
Hankēng adēng u na.
Hatuka ngā ha ei tam sabak sika han lēn nuk thei u lāi mak.
7 Isuan ei madit azolāi khatin Peter kōma:
“Sova so Puma kēng ani zei sole,”
ati na.
Hatuka Puma ani ti Simon Peterin ei riat le akultāi atianga tīn dīla avān tōma.
Asik chu ama ha puan bom lui ani na.
8 Tenchu zolāi atei ngāi chu rakuang asīnte lehan lēna ngā ei keia ei hong pan tir u.
Tāngkōl āta ankār zet mak,
mitar sōm akua dām nīnti ei ankār.
9 Hatuka tāng kōla avakal u le hava han moi raēka moi akop amu u na hanūk chu achunga ruti pēk le ngā ānruisa a om a.
10 Isuan akōm u na:
“Atuna na ngā man u nāta alakte hong chōi u ta,”
ati na.
11 Hatuka Simon Peter chu tāng tiang lēn avanuka.
Hava han ngā lianpa ngāi chian raza khat sōm rangā anthum a om ani na.
Hava dōr pei ngā ātamām nisela lēn chu achet rang ti mak.
12 Isuan akōm u na:
“Hong u tānla,
hong sa u ta ro,”
ati na.
Tenchu zolāi ngāi bila tutēn akōma:
“Tu mo na ni?”
ati na ānkel ngam om u mak.
Puma ati na chu ariat u zeia.
13 Hatuka Isua chu ahonga ruti pēk alāka amāni kōma apēka.
Ngā hām hantin dēn han apēka.
14 Isua āthī bil āta anthui suana hiva hi azolāi ngāi kōma
ei anlang voi anthumna ani na.
Isuan Peter kōma
athara chong apēk
15 Hatuka ruti asāk sua u le Isuan Simon Peter kōma:
“Simon,
Jona nāi pasal,
hiva ngāi nēka hin na na dit tatak mo?”
ati na.
Simonin akōma:
“O,
Puma,
kei na ditna chu nangin na riat,”
ati na.
Isuan akōma:
“Ka berate ngāi hi vāi ro,”
ati na.
16 Isuan voi annina akōma:
“Simon,
Jona nāi pasal,
nangin na na dit tatak mo?”
ati rēta.
Simonin akōma:
“O,
Puma kei na ditna chu nangin na riat hale,”
ati na.
Isuan akōma:
“Ka bera ngāi hi rung ro,”
ati na.
17 Isuan voi anthumna akōma:
“Simon,
Jona nāi pasal,
nangin na na dit mo?”
ati na.
Isuan voi anthumna akōma:
“Nangin na na dit mo?”
ati na ei rakel sika Peter amalung anngūi pena.
Amān Isua kōma:
“Puma nangin aloma na riat zit.
Kei na ditna chu nang kēng ariat na ni,”
ati na.
Isuan akōma:
“Ka bera ngāi vāi ro,”
ati na.
18 Isuan:
“Taktaka kei na ti ani zei,
na vāng lāi han na ninga na kōng na khita.
Hatuka nei zōtna tiang taka na cheia.
Tenchu na tar sua tika chu na kut alānga mīn na kōng na khit inti.
Hatuka chu nang nei zōt nōkna tiang taka na ruai unti,”
ati na.
19 Hivan tina chong ei ril hi,
Peter chu hontin zia thīna le mo Pathian ei man lian rang ti Isuan akōma ei man theina ani na.
Hiva hi akōma ati suale:
“Ka nūk na hong zī ro,”
ati na.
Isua azolāi madit khat rui
20 Hatuka Peter chu anhoia,
Isua azolāi maditin amāni nūk ei hong zī amu na.
Ama hi zāndui anēkpui u lāia Isua arōpsuama anboia:
“Puma,
nang anān betōk rangpu ha tu mo?”
ati pe ha ani na.
21 Peterin ama ei mu le Isua kōma:
“Puma,
hava mi hale imo
ei ni rang?”
ati na.
22 Isuan akōma:
“Ka hong rēt māseng pei ama chu ei dama a om chian theia,
han tin han kei zōt aniten.
Hava sika han nang chu hava han imo nei kopna rang ei nāng?
Nang chu ka nūk pei na hong zī ro,”
ati na.
23 Hasika han hava zolāi chu thī pial lāi nō ni ati na chong ha unāi ngāi kāra antheka.
Tenchu Isuan ama chu thī pial lāi nō ni,
ati na akōma ti mak.
Tenchu:
“Ka hong rēt māseng pei ama chu ei dama a om chian theia,
hantin han kei zōt aniten.
Hava sika han nang chu hava han imo nei kopna rang ei nāng?”
Hava chong kēng amān akōma ei ti pe ani na.
24 Koi hava azolāi ngēt hīn hiva rui ngāi dōra ariatpui ka ni na.
Hanūk chu koi hi hava rui ngāi dōra ānziakpu ka ni na.
Koiin kei hong riatpuina hi ādik ani ati na koinīn na loma nei riatpui ani zei.
25 Isuan sin ei thō atei atei ātampa ala om a.
Hava ngāi dōra ha asang asanga ānziak zit rang nisela aloma lekhabu anziak rang zia chu maniapūr ngalin achāk sua ranga iam makung.
Amen.