Pentikos nikhuana Ratha Ānthiang ahong atung
2
1 Hatuka Pentikos nikhua honga suak han,
alom u na malung khat achōia munkhata ankhom u na.
2 Hankēng anlāiseka anvān āta thīnthi anrumpan ei
sēm anga rasa ahong a oma ei ansut u na in ha asip mata.
3 Hatuka maleite ngāi moi anga akōm u na ahong anlanga.
Hava ngāi ha ansem rak le chu achung u na akop chipa.
4 Hatuka alom u na Ratha Ānthiangin amanbit u na,
Rathān chong ril theina ei pēk anga chong ateteia chong aril aphut u na.
5 Hava lāi han Jihudi nam ngāi hi Jerusalem khopuia om lāi tak ani u na.
Hava ngāi ha Pathian andon mi,
ramuala khotin vānnuaia nam tin kār āta ahong ani u na.
6 Hankēng hava rasa ariat u lehan mipui ahong anbūma,
amalung u anbuai u na.
Asik chu asang asanga achong u chipa achonga ei anriat u ani na.
7 Hasika han alom u na aboi adonga ati na chang re u mak:
“En u ta,
sova achong ngāi so alom u na Galili rama mi zit chu ni u mak sole?
8 Hanle hontin mo koinīn na loma nei anpiangpui chong anga nei riat chip thei hile?
9 Parthai,
Medai,
Elamatāi nam,
Mesapotamia rama om,
Judia rama om,
Kappadokia rama om,
Ponto rama om le
Asia rama om ngāi na ni na.
10 Phrugia rama om,
Pamphulia rama om,
Aigupta rama om,
Kurini khua ravēl dāma Libia rama om ngāi na ni na.
Senkhat chu Rom khopui āta khual achang na ni na.
Hanūk chu Jihudi nam le Jihudi zāt lūt ngāi na ni na.
11 Tenchu Pathian asinthō lianpa ngāi rui ei ril u hin koinīn na chong chipa na lei riat thei hile,”
ati u na.
12 Hasika han alom u na aboi adonga ati na chang re u mak.
“Hiva hong mo a omzia tāk!”
ati na ankel ansiat u na.
13 Tenchu senkhatin mani ēro athō u na zu thara anri u kēng ati u na.
Mipui kōma Peter achong ril
14 Tenchu Peter sōmleikhat kuitīr ngāi lehan andinga hē anringpana ankhēka akōm u na:
“Jihudi le Jerusalem khopuia a om ngāi dōra hiva hi nei riat u ranga kei zōt,
asa dima ka chong rangāi u ro.
15 Nangnīn nei mandon u chu hiva ngāi hi zu anri kēng tenchu anri u mak.
Asik chu atun hin zīng dār akua bak kēng ala ni.
16 Tenchu hiva ngāi hi deari Joelin chong ei ril ha ei hong kipna kēng ani zei.
17 Hintin hin Pathianin ati na:
‘Nikhua ahong ahek tika chu
hintin hin nīntia,
Miring dōra chunga ka Ratha
chu hong lei ka ti.
Hava tika na nāi pasal u
ngāi le na nāi nupang
u ngāiin deari anga
chong ril unti.
Ruathar ngāiin anrālna
mu unti.
Atar ngāiin ramang mu untia.
18 Hanūk chu hava tika han
ka suak pasal le ka suak
nupang ngāi chunga ka
Ratha chu hong lei ka ti,
Amānīn deari anga chong
ril unti.
19 Hanūk rēt chu chung
tiang anvāna tichang abui
sin ngāi le thuai tiang phil
chunga sinsiana ngāi na
man mu u ka ting.
Sinsiana ngāi chu thisen,
Moi le moikhu rahang ngāi
ani na.
20 Hava tika ani manzīng
ka tinga,
Tha chu thisena manchang
ka ting.
Puma nikhua lian le anthang
khīt ahong asuak māseng
hiva ngāi hi ei om rang
ani na.
21 Hatuka hintin hin ei ni rang
ani na,
Tukareng Puma raming apāi
tak chu sandama om inti,”
(Joel 2:28-32 )
ati na.
22 Israela mi ngāi hiva ka chong ril hi rangāi u ro.
Nangni ranga Nazaret Isua hi Pathian mi thang ani na,
ama amanga nangni kāra Pathianin sin thōtheina,
tichang abui sin le sinsiana ngāi ei hong manlang ani na.
Hava ha nangni ngāiin nei riat ngēt u ani na.
23 Pathianin rui ei masūk zēt le aphamāna ei riat zēt anga nangni kuta ei anbetōka,
nangnīn dān abui ngāi kuta krosa atāra athat ranga nei betōk u.
24 Ama ngēt ha Pathianin thīna natna āta amazōka ei mathui rēt ani na.
Asik chu ama chu thinān ei mantian thei zāt ni mak.
25 Davidām nisela ama rui ngēt hi hintin hin arila:
“Puma chu ka makunga
anlanga ka mu chiana.
Ama chu ka chang tianga om
chian ei ni sika itēn na
manpōn nō ni.
26 Hasika han ka malung
sūng rāi asāna,
Ka malein amanpāka,
Ka taksa hīm nisela anngama
pōngansana om inti.
27 Asik chu nangin ka ratha
chu athi ngāi khuana na
māk pe nō ta ni.
Na Mi Ānthiang ei chuai rang
um phal nō ta ni.
28 Nangin damna lampui nei
na man riata,
Na makunga rāisānna le abita
nei na siak,”
(Sām 16:8-11 )
ati na.
29 Peterin chong ala ril chiana:
“Unāi ngāi le loko ngāi,
koini na chipui David arui anngam panga na kōm u na,
na ril u ka ti.
Ama chu athīna anphūm sua zeia,
athān mun um avian ten peia koini ngāi kāra ala om a.
30 David chu deari khat ei ni sika,
Pathianin akōma chong ei tina khomāk ei ansam chu ariattita.
Ama achi thāk āta miring khat hong anzir inti,
arēng chōmphānga ansut ranga achongtin ha ama Krista ngēt ha ani na.
31 David chu aphamān āta alei mu zēt le Pathianin ei mathui rēt rang ti hām alei ril zēt ani na.
Pathianin aratha chu athi ngāi khuana māk pe mak,
ataksām ei chuai man mu mak.
32 Hiva Isua ngēt hi Pathianin amathui rēt zei,
hava ha koini na loma ariatpui hi na ni zei.
33 Hasika han Pathian chang kut tianga ansut ranga ansāng khīta āsiaka.
Hanūk chu Pa kōm āta Ratha Ānthiang chongtin ei man ha atun hin ei hong lei ani na.
Hava ha nangnīn nei mu le kuara nei riat u ani na.
34 Asik chu David chu anvāna kal mak.
Tenchu ama apumin hiva chong hi arila:
‘Tāituan Pumān,
ka Puma
kōma ati na,
Ka chang kut tianga ansut ro.
35 Na rāldui ngāi chu na kepha
siakna ka manchang māseng
ansut ro,’
(Sām 110:1 )
ati na.
36 Hasika Israel sūngkuana mi ngāi dōrān riat ngēt rase.
Nangnīn nei tār u Isua ngēt ha Pathianin Puma le Krista ei manchang rit ani zei,”
ati na.
37 Hava chong ha mipui ngāiin ariat u na amalung u seipēr le anvit ang ani u na.
Hankēng amānīn Peter le hanūk kuitīr atei ngāi kōma:
“Unāi ngāi le loko ngāi,
imo nei thō rang ani zei?”
ati u na.
38 Peterin akōm u na:
“Na malung mansīr u ro,
āsia nei thō u ngāi anduala nei om theina ranga Isua Krista raminga baptis la u ro.
Hatuka Ratha Ānthiang ei na pēk u ha man un na ti.
39 Asik chu achongtin ha nangni le nangni na nāi u ngāi rang ani na.
Hanūk chu aloma rāla a om ngāi le Puma koini na Pathianin ei kui ngāi dōra rang um ani,”
ati na.
40 Hava suale chong atei ātampa le amanchūna,
amanriata:
“Atun taka hiva ruala mi diklui ngāi āta azōkna thō u ro,”
ati na.
41 Hatuka ama achong ngāi chu rāisān taka apom dōra chu baptis alāk u na.
Hava nikhua sūng len han miring asāng anthum dām abil u na ansōna.
Aiam ngāi munkhata anlopna
42 Hantin han kuitīr ngāi anchūna le unāi ngāi anlopna lehan a om u chachaka.
Hanūk chu ruti ankhiaka,
bōr azonga ei om u ani na.
43 Hatuka mi tin malunga Pathian anchina adōn u na.
Kuitīr ngāiin tichang abui sin ngāi le sinsiana tamtak athō u na.
44 Aiam ngāi dōra chu mun khata a om u na,
neinun sampār dōra chu loko ta ranga mun khata āsiak u na.
45 Amun u ngāi le ei dōn u ngāi dōra azuar u na ei nāng u chip anga anrual chiachianga ansem u chachaka.
46 Hatuka anikhuan tina malung mun khata Pathian biak ina anchun u chachaka.
Hanūk chu in lam tianga ruti ankhiaka rāisān le aphāma bu nēk u chachaka.
47 Havan tin han Pathian amanpāk u na,
mi tin mit muna andit aruaia ei om u chachak ani na.
Han tina sandama a om
ngāi chu anikhuan tina Pumān kuibinga aman sōn tir u na.