Isuan tī nāta
gerepzu amanchang
2
1 Hatuka nīnthum changna nikhua han Galili rama Kana khuana mui ruaina khat a om a.
Hava han Isua anu hām anchela.
2 Hanūk chu Isua bila azolāi ngāi um hava mui ruaina han ānkui ani u na.
3 Hatuka nukhōna gerepzu ansam u le chu Isua anu hān ama kōma:
“Gerepzu ānsam kēng ani u zei,”
avati na.
4 Isuan ama kōma:
“Nupang,
hiva ruia nangin imo nei na manriat ranga a om?
Ka hun la hong suak mak,”
ati na.
5 Hatuka anu hān mi dorbo andom ngāi kōma:
“Amān ei na ti u dōra thō u ro,”
ati na.
6 Hatuka hava han Jihudi ngāi dān anga ānthiangna ranga lung kola aruk ānsut a om a.
Hava han litār sōm ariat āta raza khat seng achāk ani na.
7 Isuan akōm u na:
“Lung kola ngāi tī le manbit u ro,”
ati na.
Hatuka hava ngāi dōra aliam mata aman bit u na.
8 Hatuka amān akōm u na:
“Atun chu havan āta luak lak u tānla mui ruaina nēk sāk ansūkpu kōma chōi u ro,”
ati na.
Hatuka achōi u na.
9 Mui ruaina nēk sāk ansūkpu hān tī gerepzu ei chang ha atema ei suakna riat thei mak.
Tī avaluak ngāi hān chu ariat u na.
Hatuka nēk sāk ansūkpu hān mākpa chu akuia.
10 Ama kōma:
“Mi tukarengin gerepzu āti kēng ei rasua mānsa,
mīn ātam ual anēk sua le kēng āti nōk bet ei rasua rēt ani na.
Tenchu nangin atun tena gerepzu āti nei la dōn chian ala ni,”
ati na.
11 Isuan hiva sinsiana sin ei phutna chu Galili rama Kana khuana ani na.
Hivan tin hin ei anlianna chu ei man langa azolāi ngāiin ei iam u.
Pathian biak in Isuan arathial
12 Hava sua le Kapernaum khuana asēna.
Ama le anu,
anāipa ngāi hanūk chu azolāi ngāi lehan hava han nikhua tōmte avaom u na.
13 Hatuka chu Jihudi ngāi Zōkna pānta ei suakna rang ahong anāi zeia.
Hankēng Isua chu Jerusalem khopuia asēna.
14 Hatuka chu Pathian biak ina serāt ngāi,
bera ngāi,
pharvali āzuar ngāi dōra le sum āthūl ngāi dōra ansut avamu na.
15 Hasika han rīrual le nganu ramoi asina bera le serāt aloma Pathian biak in āta arazūla sum āthūl ngāi sum chu abun pe na ei siak u na tebul ngāi amalet pe zita.
16 Pharvali āzuar ngāi kōma:
“Hiva neinun ngāi dōra hiva mun āta khāi u ro,
ka Pa in hi azuarna le anchōkna muna man chang u nō ro,”
ati na.
17 Hivan tin hin azolāi ngāiin:
“Nang na in sika tep kei annēlna hīn na sāk inti,”
(Sām 69:9 )
ti ānziak ha ahong riat thei u na.
18 Hatuka Jihudi ngāi hān akōma:
“Hiva sin ngāi nei thōna hin hong zāt sinsiana mo nei na man mu thei rang?”
ati na arakel u na.
19 Isuan akōm u na:
“Hiva biak in ānthiang hi masiam u ro,
koin nīnthum sūnga man ding rēt ka ti,”
ati na amasanga.
20 Hatuka Jihudi ngāi hān:
“Hiva biak in ānthiang ansinna rang hin kum sōm manli le kum aruk pei ānāng ani na,
hava ha nangin nīnthum sūnga nei man ding rang mo?”
ati u na.
21 Tenchu ama hān aninga ataksa biak in ānthiang rui kēng ei ril.
22 Hasika han,
thīna nāta anthui rēt suale han,
hiva achong ngāi hi amān alei ril kēng ti azolāi ngāi malunga achui rēta.
Hatuka Pathian Lekhabūna chong le Isua achong ril ngāi a iam u na.
23 Hanūk chu Jerusalem khopuia Zōkna pānta a om lāia sinsiana sin ei thō āmu mi tamtakin ama raminga a iam u na.
24 Tenchu Isua aninga amāni chunga iamna dōn mak,
asik chu amān mi tukareng malung ei riat zit ani na.
25 Miring ruia āriatpui ranga amān tutē ei nāng om mak,
asik chu amān miring sūnga a om chu ariat zita.