Lazar ei thīna rui
11
1 Hatuka mi angkhat araming Lazar,
Bethani khuana a om ha ādam nōk ani na.
Hava khua ha Mari le azuarpui Marthi omna khua ani na.
2 Hiva Mari ngētin marim ahui sariak Puma ake na akhuana asamle āhui pe ha ani na.
Ama achāpa Lazar ha ādam nōk ani na.
3 Hasika han asarnu ngāiin Isua kōma:
“Puma,
nangin nei madit ha dam mak,”
ati na mi atīr u na.
4 Tenchu Isuan hava ha ariata:
“Hiva ei dam nōk hi thīna rang khopa ni mak.
Tenchu Pathian ei anlianna rang kēng.
Hiva lehin,
Pathian Nāi Pasal chu ei na manlian theina ranga kēng,”
ati na.
5 Marthi le azuarpuinu hanūk chu Lazar ngāi ha Isuan ei madit ani na.
6 Hankēng Isuan dam mak ati na ariat suanām ei omna dēn han nīnni ala omsa na.
7 Hava suale chu azolāi ngāi kōma:
“Tho ta,
Judia rama sē rēt u rei,”
ati na.
8 Azolāi ngāiin akōma:
“Rabbi,
matōn len han ro Jihudi ngāiin lungle ana dēnga ana that ranga ei na val u,
atun sova son dēn nei sē rēt rang mo?”
ati u na.
9 Hatuka Isuan amasanga:
“Nikhat sūnga sūn avār dār sōm lei anni ni mak mo ei om?.
Tukareng sūna kal achōi chu anpal ngāi mak.
Asik chu amān maniapūr ra-āng
ei mu sika.
10 Tenchu tukareng zāna kal achōi chu anpal inti.
Asik chu ama kōma han ra-āng ei dōn nōk sika,”
ati na.
11 Amān hiva chong ngāi aril suale amāni kōma:
“Koini na mal Lazar a in zei.
Hanum nisela ama ānthui ranga kei sē rang anāng,”
ati na.
12 Hasik han azolāi ngāiin akōma:
“Puma,
a in aniten hong har rēt bō ni do,”
ati u na.
13 Tenchu Isuān Lazar ei thi rui kēng ei ril.
Hanum nisela amāni hān chu miring a in anga a in ranga ei mandon u ani na.
14 Hasika han Isuan akōm u na anthiang vanga:
“Lazar chu athī kēng ani zei.
15 Tenchu nangni ngāi sika hava han kei om nōk ha ka rāiasān,
nangnīn nei na iam thei u na ranga.
Hanum nisela akōma sē u rei,”
ati na.
16 Hasika han Thoma,
mīn Didumo ei ti u hān azolāi changpui ngāi kōma:
“Tho,
koinīm ama bila āthī ranga sē u rei,”
ati na.
Zuarpui anni ngāi
Isuan lungngam asak
17 Hatuka chu hava mun han asē u na Lazar chu thān khura ni manli alei a om sua chu Isuan avamu na.
18 Bethani khua chu Jerusalem khopui kōl tak ani na.
Hava ei ankār chu kilomitar anthum dām ani na.
19 Hatuka achāpa u thi sika lungngamna asak ranga Jihudi tamtak Mari le Marthi kōma ahong u na.
20 Hankēng Marthi hān Isua ahong zei ti ariat le chu alei vān tongpuia.
Mari chu ina ansuta alei oma.
21 Marthi hān Isua kōma:
“Puma,
hiva hin nei om nisela chu ka chāpa hi thī nō ni ba.
22 Tenchu atun um Pathian kōma nangin nei zong tak chu amān na pēk inti ti ka riat,”
ati na.
23 Isuan akōma:
“Na chāpa chu anthui rēt ranga kēng,”
ati pe na.
24 Hankēng Marthi hān akōma:
“Ani,
nikhua hek tika āthi ngāi anthui rētna nikhua tika chu anthui rēt inti ti ka riat,”
ati na.
25 Hatuka Isuan ama kōma:
“Koi hi anthui rētna le damna ka ni zei.
Tukareng koi ana iam tak chu athi nām dam rēt inti.
26 Hanūk chu tukareng adama ala om koi ana iam tak chu tāituana thī lāi nō ni.
Hiva chong hi na iam mo?”
ati na.
27 Hankēng ama hān akōma:
“O Puma ka iam,
ati na.
Maniapūra āhong rang Krista,
Pathian Nāi Pasal na ni ti ka iam,”
ati na.
28 Hatuka Marthi hān hiva chong ngāi aril suale asēna,
azuarpui Mari chu maruktena avapāia:
“Hiva hin Anānchūpu ahong zei,
amān ana pāi,”
avati na.
29 Hankēng amān hava ha ei riat phingle anrapa anthuia akōma asēna.
30 Hava han Isua chu khuana la hong lūt mak.
Marthi hān ei vān tongpuina
mun dēna alei om chian ani na.
31 Hatuka ama lungngamna asak ranga ain sūnga Jihudi a om ngāi hān Mari anrapa ei anthuia ei suak amu u na anūk avazī u na.
Asik chu thāna avachap ranga asē nīnti ati na ei mandon u.
32 Hatuka Mari chu Isua ei omna muna asēna ei vamu le ake kunga avān boka:
“Puma,
hiva hin nang nei om nisela chu ka chāpa hi thī nō ni ba,”
ati na.
33 Hankēng Isuan Mari le anūk honga zī Jihudi ngāi ei chap amu na,
amām amalung ana riata annuka.
34 Hatuka Isuan:
“Hon tiang mo nei siak u na?”
ati na.
Amānīn akōma:
“Puma,
hong tānla hong en ro,”
ati na amasang u na.
35 Hatuka Isua achap a.
36 Hasika han Jihudi ngāiin:
“Enta,
Amān ei madit sabak kēng sole!”
ati u na.
37 Tenchu mi senkhatin chu:
“Hiva mi hīn mit achō amanvār thei ten hiva mi le ei thī nōkna ranga itē ei thō pe thei om mak mo?”
ati u na.
Lazar athī nāta Isuan amathui
38 Hatuka Isua chu amalung ana riata annuk rēta.
Thān khur tiang avapana,
hava thān ha khurkhang anlāk ani na.
Hatuka hava amatona han lung khat le ānhīp ani na.
39 Hankēng Isuan:
“Lung ha khāi u ta,”
ati na.
Hatuka āthīpu sarnu Marthi hān:
“Puma,
atun ang tena chu āthu rang kēng ani zei,
asik chu ei thīna hi aviana lehin ni manli ani zei,”
ati na.
40 Isuan akōma:
“Na iam anten Pathian ei anlianna hi mu na ti kei na ti ni mak mo?”
ati na.
41 Hatuka āthīpa ei siak u na lung chu akhāi u na.
Isua chung tiang atanga:
“Ka Pa,
ka chong nei na rangāi pe sika na chunga ka rāi asāna.
42 Hanūk chu tāituana ka chong nei na rangāi pe babang kēng ti hīm ka riat.
Hanum nisela ka ravēla mipui ānding ngāi sika nangin nei na tīr ti ei riat thei u na ranga kei ril kēng,”
ati na.
43 Hatuka hiva ngāi aril suale ankhēka:
“Lazar hong suak ro,”
ati na.
44 Hatuka āthīpa chu akut ake athī raliangle anthuam ha ahong asuaka.
Amāisua chu anhuina puan le anthuam ani na.
Hatuka Isuan akōm u na:
“Sūt pe u tānla man sē u ro,”
ati na.
Isua athatna aval u
45 Hasika han Mari kōma Jihudi tamtak āhong ngāiin Isua asin thō amu u na ama chunga ei iam u ani na.
46 Tenchu amāni bila mi senkhat chu Pharisi ngāi kōma asē u na Isua asin thō ngāi aloma avaril u na.
47 Hasika han chāizūng alian ngāi le Pharisi ngāiin ruirilpu ngāi aman chun u na.
Amānīn:
“Hong mo nei thō rang ani zei?
Asik chu hiva mi hīn sinsiana tamtak athō zei hile!
48 Hivan tin hin ama chu na la man thō chian ten mi dōrān ama iam zit unti hile!
Hatuka Rom mi ngāiin na dingmun na pot untia Jihudi koini na nam dōra na lāk kiar unti,”
ati u na.
49 Tenchu amāni bila mi khat araming,
Kaiapha a om a.
Ama ha hava kuma chāizūng ulian khīt āchang ani na.
Amān akōm u na:
“Nangnīn itē nei riat om u mak hile.
50 Nam pumpui anpei nēk ten mipui rathūla mi khat ei thī chu koi ni ranga āsa ni mak mo ti hi mandon u mak che hile,”
ati na.
51 Hava chong ha amān aning āta asuaka ei ti ni mak.
Tenchu hava kum han ama chu chāizūng ulian khīt ei ni sika le hava Jihudi nam ngāi ranga Isua ei la thī rang ruia maton lam rui kēng ei ril.
52 Hava nam ngāi rang ronga ni mak,
tenchu Pathian nāi ngāi mun tina ānthek raka om ngāi dōrām mun khata ei man khōm theina rang Isua chu ei la thī rang ani na.
53 Havan tin han hava nikhua len āta ama thatna rang chong anrual u na.
54 Hasika han Isua chu Jihudi ngāi bila mipui kōma anlangpuma lēng thei lāi mak.
Tenchu havan āta philchār ram kōla khua khat Ephraim ei ti u han asēna.
Hava han azolāi ngāi lehan avaom chiana.
55 Hatuka Jihudi ngāi Zōkna pānta chu ahong anāi zeia.
Hatuka Zōkna pānta aphamān mi tamtak chu dān anga alei ānthiang u na ranga khua tetei āta Jerusalem khopui chu alei pan u ani na.
56 Hava muna han Isua chu aravān u na,
Pathian biak ina anding u na:
“Hong mo nei mandon u ani zei?
Khohuia hin ama chu hong nō ni mo?”
ati u na.
57 Chāizūng ulian ngāi le Pharisi ngāiin ama ei sūr thei u na ranga,
tukareng ama ei omna āriat tak chu ei puang len rang,
ati na chong apēk u na.