Bethani khuana
Isua sariak anthi rui
12
1 Hatuka chu Zōkna pānta ni ruk phāmāna Isua chu Bethani khuana ahong atunga.
Hava ha Lazar āthī ei mathuina khua ani na.
2 Hava muna han ama ranga zān ruti sākna aman sūk pe u na.
Marthin nēksāk dorbo ādoma.
Lazar hi ruti ei sāk u na muna ei ansutpui ngāi bila angkhat ani na.
3 Hatuka Marīn litar khat zotor nardi marim ahui aman ālu zāt ahong chōia.
Isua ke ahong khua pe na,
asamle ake ngāi chu ahui pena.
Hava sariak marim ahui hān hava in pumpui marim ahuiin amansip zita.
4 Hatuka chu azolāi ngāi bila angkhat Iskariot Juda,
Simon anāi pasal achonga.
Ama hi Isua ānbetōk rangpu ani na.
5 Amān:
“Hiva sariak marim ahui hi ichanga mo denari razānthuma anzuara anriang ngāi kōma anpēk thei mak mo?”
ati na.
6 Hava chong ha anriang ngāi ranga lung anpōng sika ei ti ni mak.
Tenchu ānru ei ni sika kēng han tin han ei ti.
Asik chu amān sum anvana marsa ha akōma ei dōn ani na.
Hatuka hava marsa nāta sum ha ama ta ranga ei maruka ei lāk chachak ani na.
7 Hatuka Isuan:
“Ama ei zōt pei manthō u ro.
Asik chu nangkana thāna anphūma ka om nikhua tika ranga amān marim ahui alei siak kēng.
8 Anriang ngāi chu na bil u na a om chian u rang ani na,
koi chu na bil u na a om chian rang ni lāi makung,”
ati na.
9 Hatuka Jihudi mipui tamtakin hava han a om ti ariata asē u na.
Isua sika rong ni mak ei sē u,
tenchu āthī āta ei mathui Lazar āmu rangām āsē ani u na.
10 Hava sika han chāizūng ngāiin Lazar um athat ranga malung ansin u na.
11 Asik
chu Jihudi tamtakin achāizūng u ngāi amāka Isua tiang ei iam u sika Lazar um athat rang ei val u.
Zuina lehan Isua
Jerusalem khopui alūt
12 Hava zīngkhua ahong avār suale pāntana asē mipui ngāiin Isua Jerusalem khopuia ei hong rang ti ariat u na.
13 Hasik ha theiletūm bāk anleka ama alei vazong ranga asuak u na.
Hatuka chu ankhēka:
“Hosanna!
Puma raminga Israel ngāi
Rēng āhong chu
bōrsāng tung rase,”
(Sām 118:26 )
ati u na.
14 Hatuka Isuan sakuarparte khat amu na hava chunga achuanga.
Asik chu deari lekhabūna ānziak ang taka āchuk ani na.
15 Amān:
“Zion Sānu,
āchi nō ro.
Enta,
na Rēng chu sakuarparte
chunga achuanga ahong
rang ani zei,”
(Zek.9:9 )
ati na.
16 Hava ngāi ha mānsa chu azolāi ngāiin riat thei u mak.
Tenchu Pathianin Isua amanlian suale Pathian Lekhabūna ei ti anga amalung u na achuia hiva ngāi dōra hi ama chunga ei hong chuk rang kēng ati na ariat u na.
Hantin han mīn ama chunga hava ngāi ha athō u na.
17 Hatuka thān āta Lazar ei pāia ei masuak le hanūk chu āthī nāta amathui lāia abil u na mi tampa a om ngāi len ha āriatpui achang u na.
18 Hava sik tak han mipui chu ama āntongpui rang ei suak u.
Asik chu hiva sinsiana hi amān ei thō ti ariat u na.
19 Hankēng Pharisi ngāiin amāni le amāni hān:
“En u ta!
itē nei thōthei om u mak hile ti hi na mu mo u?
Maniapūr mi dōrān ama anūk azī zit zei sole!”
ati u na.
Isuan ama ei thī rang
rui aphāmān alei ril
20 Hatuka pāntana Pathian abiak ranga ā sēngāi bila han Grik mi senkhat a om u na.
21 Amāni ngāi ha Galili rama Betsaida khuana mi Philip kōma asē u na:
“Ka pu,
Isua āmu rang na zōt,”
avati u na.
22 Hankēng Philip chu asēna Andria kōm avarila.
Hatuka Andria le Philip hān Isua kōm avaril rēt u na.
23 Tenchu Isuan akōm u na:
“Koi Miring Nāi Pasal kei anlianna rang hun ahong asuak kēng ani zei.
24 Taktaka,
kei na ril ani u zei:
‘Gōm ramalte hi phila achula athu nōk anten aramalte tita a om chian kēng.
Tenchu hava ha athī ten ātama ei anra ani.
25 Tukareng ei damna āndit chu machān inti.
Tenchu
hi maniapūra hin ei damna anmumāk chu tāituana damna ranga antīng kēng.
26 Tukareng ka dorbo āndom zōt chu ka nūk na hong zī rase.
Hatuka kei omna taka ka dorbo andom um om inti.
Tukareng ka dorbo āndom tak chu ka Pān manlian inti,’
ati na.
27 Atun hin ka malung rīl anana ka riat,
hong mo kei ti rang?
‘Ka Pa,
hiva hun antak
āta na san ro,’
mo kei ti rang?
Hanum nisela hiva hun rang pial sika hin atuna hun kei la hong suak.
28 Hasik han ka Pa,
na raming chu manlian ro,”
ati na.
Hatuka anvān āta rōl ahong asuaka:
“Ka raming ka manlian sua zei,
athara la manliansa ka ti,”
ati na.
29 Hatuka akōla mipui ānding ngāiin hava hē ha ariat u na khuanri rasa kēng ei ni rang,
ati u na.
Atei ngāiin:
“Vānpalāi khatin ei chongpui kēng ei ni rang,”
ati u na.
30 Isuan amasanga:
“Hiva hē hi koi ka ranga āhong ni mak,
tenchu nangni ranga kēng.
31 Atun hin hi maniapūr ruirilna hun ani zei.
Hatuka chu atun,
hi maniapūr ruirilpu chu Pathianin masuaka pei inti.
32 Hatuka ramual āta chung tiang akala ka om tik chu mi dōra ka tiang rakuai kiar ka ti,”
ati na.
33 Hiva chong ei rila hin ama chu hontin ziana mo ei thīna rang rui kēng ei ril.
34 Mipuīn ama kōma:
“Krista chu tāituana a om chian rang kēng,
ati na kēng Dān lekhabu nāta koinīn nei riat.
Hanle hontin mo nangin:
‘Miring Nāi Pasal hi chung tiang akala la om inti nei ti?’
Hava Miring Nāi Pasal ha tu mo?”
ati na arakel u na.
35 Hatuka Isuan akōm u na:
“Ra-āng hi hun alakte rang duaia na kār u na la om inti.
Ra-āng na nei u lāi hin ra-ānga kal chōi u ta ro.
Azīngin ei na huam u nōkna ranga.
Tukareng azīng kāra kal achōi chu ei sē na rang ti thei lui kēng.
36 Ra-āng na nei u lāi hin ra-āng iam u ta ro.
Ra-āng nāi nei chang thei u na ranga,”
ati na.
Isuan hiva chong ngāi dōra arila,
hava suale amāni bil āta asuaka avānthup vāta.
Jihudi ngāiin
Isua la iam thei u mak
37 Amāni mit muna sinsiana tampa athō nām,
ama chu iam thei u mak.
38 Deari Isaia chong alei hong ril ei kip theina ranga amānīn iam thei u mak.
Asik chu Isaian:
“Puma,
koini na chong ril hi
tu mo ana iam pe?
Tu kōm mo Pumān akut ei
rātnām ei manlang?”
(Isa.53:1 )
ati na.
39 Hiva sik taka hin amānīn ei iam thei u nōkna.
Asik chu Isaian alei hong ril ani na:
40 “Amit u ngāi aman zīng
pe na.
Amalung u ngāi aman īt
pe na.
Amit le ei mu thei u nōkna
ranga.
Amalung le ei riat thei u
nōkna ranga.
Havan tin han ni nō sela chu
hong kīra hong dam rēt unti
hale,”
(Isa.6:10 )
ati na.
41 Isaian hiva chong ngāi ei ril ani na,
asik chu amān Isua ei lianna ei mu na arui ngāi kēng alei ril.
42 Hanum nisela amāni bila ruaitu tamtakin Isua a iam u na.
Tenchu Pharisi ngāi ei chi u sika han anpuang ngam u mak.
Hano tenchu anchunna in āta ei masuak u rang ani na.
43 Asik chu Pathian kōma anlianna nēka miring kōma anlianna āman rang kēng ei zōt ual u.
44 Isuan anringa ankhēka:
“Tukareng koi ana iam chu,
koi ni mak ei na iam,
tenchu anatīrpu a iam kēng.
45 Tukareng koi ana mu chu anatīrpu āmu kēng.
46 Maniapūra ra-āng anga hong ka ni na.
Tukareng koi ana iam tak chu azīng kāra om chian lāi nō ni.
47 Tukareng ka chong anngāia a iam nōk chu,
koiin āsia manlō makunga.
Asik chu maniapūr āsia anlō ranga ni mak tenchu maniapūr āndam ranga āhong ka ni.
48 Tukareng koi ana heng le ka chong ngāi pom lui tak chu ama āsia anlō rang khat a om.
Hiva ka chong suak hīn nikhua hek tika ama āsia ei la manlō rang.
49 Asik chu koi ka ninga chong kei phuana kei ril ni mak.
Tenchu imo kei ril rang le imo kei ti rang hava ruia han Pa anatīrpu hān kēng chong ei na pēk.
50 Hanūk chu amān chong ei na pēk chu tāituana damna kēng ti hi ka riata.
Hasik han ka chong ril ngāi dōra hi Pan ei na ril anga kei ril kēng,”
ati na.