Bera enpu le abera ngāi
10
1 “Taktaka kei na ril ani u zei,
tukareng bera suakkhāra lūt luia atei tianga ākala alūt tak chu marūsa le misuam ngāi kēng.
2 Tukareng suakkhār taka ālūt chu bera ngāi aenpu ani na.
3 Suakkhār angākpuin aranga suakkhār alei malong pe.
Hanūk chu bera ngāiin arōl ariat u na.
Abera ngāi raming chipa apāia ei maruai chachak.
4 Ama abera ngāi amasuak suale amān maton ansana lam ama ruaia.
Ama arōl ei riat u sika anūk azī u na.
5 Amānīn mi tei nūk vazī u ngāi mak.
Tenchu akōm u nāta kēng ei rot u rang.
Asik chu mi tei
rōl chu riat thei u mak,”
ati na.
6 Isuan hiva ankhīna chong hi amāni kōma arila.
Hanum nisela amāni kōma hong zāt mo ei ril ha riat thei u mak.
7 Hasika han Isuan amāni kōma ati rēta:
“Taktaka,
kei na ril ani u zei,
koi hi bera ngāi suakkhār ka ni zei.
8 Ka matona alei ahong ngāi dōra chu marūsa le misuam ngāi kēng.
Tenchu bera ngāiin arōl rangāi pe u mak.
9 Koi hi suakkhār ka ni zei.
Tukareng koia hin ālūt chu zōk hiaia om inti.
Ama chu lūt inti suak inti,
hanūk chu ei sāk rang um man inti.
10 Marūsa chu ānru rang le mi āthat rang hanūk chu ānsiat rang duaia kēng ei hong.
Koi chu damna ei man thei u na ranga,
damna manalu ei man thei u na ranga āhong ka ni.
11 Koi hi bera enpu āsa ka ni.
Koi bera enpu āsa hīn bera ngāi rathūla kei damna kei phal kēng.
12 Anlō mi chu bera enpu tak ni mak,
bera ngāi um ama ta ei ni nōk sika ngelang ei hong amu le amāk raka ārot kēng.
Hatuka ngelang hān bera ngāi chu
ahong apeta anchēn raka amāka.
13 Anlō mi ei ni sika bera ngāi ranga mandon mak tenchu ārot chachak kēng.
14 Koi hi bera enpu āsa ka ni.
Ka bera ngāi chu ka riata,
hatuka ka ta ngāiin um ana riat u na.
15 Pain ei na riat anga kom Pa ka riata.
Hatuka bera ngāi rathūla kei damna hi kei phal kēng.
16 Hiva bera rakul sūnga ni lui bera atei ātampa ka la dōna,
amānīm kei la hong ruai rang ala ni.
Amānīn ka rōl riat untia.
Havan tin han amāni chu bera rual khat chang untia a enpu khata om unti.
17 Kei damna hi kei phal sika hin ka Pain ei na madit,
asik chu kei damna kei lāk rēt theina ranga ani na.
18 Tutēn kei damna hi anpot thei rang om mak,
ka ninga kei phal kēng.
Aphal ranga ningneina ka dōna,
alāk rēt ranga ningneinām ka dōna.
Hiva athō ranga chong ei na pēk hi ka Pa kōma kei man,”
ati na.
19 Hiva chong ngāi sika hin Jihudi ngāi kāra ansenna ahong asuak rēta.
20 Tenchu mi tamtakin chu:
“Raluain ei sūra āchāngin ei thō kēng ani zei,
ichanga mo ama chong nei rangāi u?”
ati u na.
21 Senkhatin chu:
“Hiva chong ngāi hi raluain ei sūr chong ril ni mak.
Raluain mit achō mo amanvār thei ngāi?”
ati u na.
Jihudi ngāiin Isua iam mak
22 Jerusalem khopuia Andarna pānta a om lāi tak ani na.
Hava lāi tak han nūdin zoro ani na.
23 Hatuka Isua chu Pathian biak ina Solomon atuamāia han ahong achei avacheia.
24 Hatuka Jihudi ngāi chu aravēla ahong ānbūm u na,
akōma:
“Ituk ten asōt mo koini na malung hi aring konga nei na la siak rang?
Krista nei anti aniten,
anthiang vanga na ril ta ro,”
ati u na.
25 Isuan amasanga:
“Ka na ril sua u zei hale,
iam u mak che na.
Ka Pa raminga sin kei thō ngāi hīn ka rui arila anriatpu ani na.
26 Hasika han kei na ti u anga,
ka bera ngāi bila mi nei ni u nōk sika na iam u mak che.
27 Ka bera ngāiin chu ka rōl ariat u na,
koi um amāni ka riata ka nūk ei na zī u ani na.
28 Amāni kōma tāituan damna ka pēka.
Tāituana pei anchang u lāi nō ni.
Tutēn ka kut āta anānpot thei om lāi nō ni.
29 Amāni chu ka kōma anāpēkpu ka Pa chu alom pei chunga ālian khīt ani na.
Tutēn ka Pa kut āta na pot thei u nō ni.
30 Pa le koi chu angkhat kēng na ni,”
ati na amasanga.
31 Hasika han Jihudi ngāiin ama ei dēngna rang lung arūt rēt u na.
32 Isuan amāni kōma amasanga:
“Ka Pa kōm āta sin āsa tamtak kei na man mu u,
hanle hava ngāi bila hova kei thō sika mo lung le ana dēng rang nei ti u?”
ati na.
33 Hatuka Jihudi ngāiin amasang u na:
“Sin āsa nei thō sika lung le anadēng rang nei na ti ni mak.
Tenchu Pathian nei ril siat sika,
le miring na ni chunga Pathian nei anti sika kēng,”
ati u na.
34 Isuan amāni kōma:
“Nangni ngāi na dānbu
u na han:
‘Nangni hi pathian ngāi na ni
u,
kei na ti u,’
(Sām 82:6 )
ati na ānziak ni mak mo?”
ati na amasanga.
35 “Pathian chong ei hong tungna mi ngāi rang ha amān ‘Pathian ngāi’ ati theia.
Asik chu Pathian Lekhabūna chong chu tutēn ansiat thei om mak.
36 Pain koi ei na manthianga maniapūra ei na hong tīr ka ni.
Hano ten:
‘Pathian Nāi Pasal ka ni,’
kei anti sika mo Pathian aril siat nei na ti u?
37 Ka Pa sin kei thō nōk nisela chu na iam u nō ro.
38 Tenchu kei thō sika hin,
koi nana iam u nōk ām ka sin thō chu iam u ro.
Pa chu ka kōma a om,
koi um Pa kōma kei om ti nei riata nei iam thei u na ranga,”
ati na.
39 Hasika han ama chu āsūr ranga aval rēt u na.
Hanum nisela amāni kut āta chu ei zōk ani na.
40 Hatuka ama chu Jordan dung varāla Johanin māna mi baptisma ei pēk chachakna muna asēna,
hava muna han avaom chiana.
41 Hankēng akōma mi tampa ahong u na:
“Johanin sinsiana itē ei thō om mak.
Tenchu Johanin hiva mi ruia ei ril ngāi dōra ha ādik zit kēng hile,”
ati u na.
42 Hatuka hava muna mi tampān ama chu ei iam ani u zeia.