Anzir āta mit achō
Isuan amandam
9
1 Hatuka Isua chu amaton lam ei pan balam han anzir len āta mit achō khat hi antongpuia.
2 Azolāi ngāiin akōma:
“Rabbi,
amit achō zēta ei anzir hi tu masiala mo ei ni rang?
Hiva mi hi mo ei ni rang,
ole anu le apa mo?”
ati na arakel u na.
3 Hatuka Isuan amasanga:
“Hiva mi hīn āsia thō mak,
anu le apa ngāi um thō mak.
Tenchu ama tak chunga Pathian sin thō ei anlang theina ranga kēng.
4 Sūn ani lāi hin ana tīrpu sin kēng athō kei nāng.
Zān ahong ani rang ani zei,
hava tika tutēn sin thōthei ngāi mak.
5 Maniapūra ka om sūng hin maniapūr ra-āng ka ni,”
ati na.
6 Hiva ngāi aril suale phil amachila hatuka machil lehan phil amaphoka.
Hatuka philpok chu achōpu mita akhua pe na.
7 Hatuka mit achō kōma:
“Silōm bīla son sē tān varasūk ro,”
ati na.
Silōm ti na chu,
“Ātīr,”
ti na ani na.
Hatuka ama chu asēna
ei varasūka,
amit avāra ei hong kīr rēt.
8 Hatuka chu ama akhua mi ngāi le machīna amit ei cho āmu ngāiin ati u na:
“Hiva mi hi ānsut chiana kut adō chachak ha ni mak mo?”
ati u na.
9 Mi senkhatin chu:
“Hiva mi tak hi ani zei,”
ati u na.
Tenchu mi senkhatin:
“Ni mak,
ama āphua zek ngal mi tei khat kēng,”
ati u na.
Hatuka chu amān:
“Hava mi tak ha koi hi ka ni u zei,”
ati na.
10 Hatuka chu amāni hān akōma:
“Hontin mo na mit ei vār rēt?”
ati u na.
11 Hankēng amān akōm u na:
“Isua ei ti u mi khatin philpok asina ka mita ana khua pe na.
Hatuka:
‘Silōm bīla son sē tānla varasūk ro,’
ei na ti.
Hankēng ka sē na ka varasūk le chu ka mit ei hong vār rēt ani zei,”
ati na.
12 Hatuka chu amānīn akōma:
“Hava mi ha hon mo ei om?”
ati u na.
Amān:
“Riat makung,”
ati na.
Pharisi ngāiin amit
ei vārna athūn u
13 Hatuka machīna amit avār rētpu chu Pharisi ngāi kōma aruai u na.
14 Isuan philpok ei sina amit ei man vār pe na nikhua ha Jihudi ngāi pōngansa nikhua ani na.
15 Hasika han Pharisi ngāiin ama kōma:
“Hontin mo na mit ei hong vār rēt?”
ati na arakel rēt u na.
Amān akōm u na:
“Ka mita philpok akhuana ka varasūk le chu kei hong mu rēt thei ani zei,”
ati na.
16 Hatuka Pharisi ngāi senkhatin:
“Hiva mi hi Pathian āta āhong ni thei nō ni.
Asik chu pōngansa nikhua ngal ser mak,”
ati u na.
Hanūk senkhatin chu:
“Hontin mo āsia thō miringin hiva zāt sinsiana ngāi ei thōthei rang?”
ati u na.
Hasika han amāni le amāni kāra ansenna ahong suaka.
17 Hatuka amit achōpu kōm dēna:
“Ama ha nangin le tu mo na ti?
Asik chu na mit ei na man vār pe kēng hale,”
ati rēt u na.
Amān akōm u na:
“Deari khat ani,”
ati na.
18 Hanum nisela Jihudi ngāiin amit avār rētpa anu le apa avamankui u māseng chu amit achō zēta āta ei hong vār rēt rui ha la iam thei u mak.
19 Hatuka anu le apa kōma:
“Hiva mi hi anzir len āta amit achō zēt,
na nāi pasal nei ti u ha mo?
Hanle atun hontin mo ei hong mu rēt thei?”
ati na arakel u na.
20 Anu le apa hān:
“Ama hi koini na nāi pasal ani ti,
na riat.
Anzir āta amit achō zēt um na riat.
21 Tenchu atun hontin mo ei hong mu rēt thei,
hava chu riat mak me.
Hanūk chu tu mo amit anvār pe hava hām riat mak me.
Ama rakel u ro,
ulian kēng ani zei.
Amān arui chu ril chak ni,”
ati na amasang u na.
22 Asik chu anu le apa hān Jihudi ngāi ei chi u sika kēng havan tina chong ei ril u.
Asik chu Jihudi ngāiin aphāmān āta chong ei anrual u chu,
tukareng Isua rang Krista ati na āpom tak chu ankhōmna in āta ei masuak u rang ei anti u ani na.
23 Hasika han kēng anu le apa hān:
“Ulian kēng ani zei,
ama rakel u ro,”
ei ti u na.
24 Hanūk chu amit achōpu chu voi anni changna avamankui rēt u na.
Amānīn akōma:
“Pathian kōma kēng anlianna nei pēk rang,
hava miring ha chu mi salui ati na koinīn na riat,”
ati u na.
25 Hatuka amān:
“Mi salui ei ni le ni nōk itē riat makung.
Tenchu kei riat khat chu,
machīn lāi han mit achō ka ni na,
atun chu ka hong mu thei zei,”
ati na amasanga.
26 Hatuka amānīn akōma:
“Na chunga hong mo ei na thō pe?
Hontin mo na mit achō ei manvār rēt?”
ati na arakel rēt u na.
27 Hatuka amān akōm u na:
“Machin bet han ka na ril sua u zei hale,
rangāi zōt u mak che na.
Ichang mo āriat ranga nei zōt rerēt u?
Nangnīm ama zolāi achang ranga mo nei zōt u?”
ati na amasanga.
28 Hasika han amānīn māimōk asak khap u na:
“Nang kēng ama zolāi na ni hile.
Koini chu Mosi zolāi kēng na ni.
29 Pathianin Mosi kōma kēng chong aril ati na nei riat.
Tenchu hiva mi hi hovan āta ahong anthok mo riat mak me,”
ati u na.
30 Hatuka chu hava mi hān akōm u na:
“Hava tak ha ro ansinsiana zāt ei omna ani zei!
Nangnīn hovan āta āhong mo ati na na riat u nōk ām amān ka mit ei na manvār pe ani zei.
31 Tenchu Pathianin mi salui ngāi chong rangāi pe mak ati na nei riat.
Hanum nisela tukareng Pathian andon mīn ama ei zōt zāt sin athō ten Pathianin arangāi pe na.
32 Ramual ansin āta tutēn anzir lena amit achō ānvār rēt thei la riat ngāi mak me.
33 Hiva mi hi Pathian āta āhong ni nō sela amān itē thōthei nō ni,”
ati na amasanga.
34 Hankēng amānīn akōma:
“Nang hi na pumpuia āsia thō zēta ahong anzir kēng na ni hile.
Nangin kēng koini ngāi anānchū rang nei zōt?”
ati pe u na.
Hatuka ama chu ankhōmna in āta ei masuak u.
Ratha mit achō ngāi rui
35 Isuan ama chu ei masuak u ti ariat le avāntongpuia,
akōma:
“Pathian Nāi Pasal hi na iam mo?”
ati na.
36 Amān akōma:
“Puma,
ama chu tu mo ei ni kei iam theina ranga na manthei ta?”
ati na amasanga.
37 Isuan akōma:
“Nei mu sua ani zei hile,
koi atuna na kōma anachongpui hi ka ni zei,”
ati na.
38 Hatuka amān:
“Puma,
ka iam zei,”
ati na.
Hatuka ama chu amōka.
39 Hankēng Isuan:
“Rui aril ranga hi maniapūra āhong ka ni.
Mit achō ngāi amit ei vār theina ranga le amit avār ngāi amit ei cho theina ranga āhong ka ni,”
ati na.
40 Hatuka Pharisi senkhat ama bila om ngāiin hava achong ril ngāi ariat u na.
Hasika han amānīn:
“Hanle koini hi mit achō mo na ni zei?”
ati u na.
41 Isuan akōm u na:
“Mit achō na ni u ten āsia thō sika āsia anlō u nō ta ni.
Tenchu atun koinīn na mu thei hile nei ti u sika han āsia dēna nei om u ani zei,”
ati na.