Uiare sika ansūr nupang rui
8
1 Hatuka Isua chu Maruan muala han avakala.
2 Zīnga chu Pathian biak ina avalūt rēta.
Hatuka mi dōra akōma ahong u na,
hankēng ama chu ansuta akōm u na amanchūna.
3 Hatuka Dān mīnchū ngāi le Pharisi ngāiin nupang khat uiare sika ānsūr chu ama kōma aruai u na,
amalāi u taka amanding u na.
4 Hatuka Isua kōma:
“Mīnchūpu,
hiva nupang hi uiare lāi taka ansūr ani na.
5 Dān buna chu,
Mosīn hiva zāt mi hi chu lung adēnga āthat ranga chong ana pēka.
Nangin le imo na ti?”
ati u na.
6 Hiva chong hi ama ei mansina,
āsia ei manlō thei u na ranga ei ti u kēng.
Tenchu Isua chu anbūna akut chal le phil amaziaka.
7 Han tin han ei rakel rerēt u sika ama chu chung tiang atanga amāni kōma:
“Nangni bila āsia thō ngāi lui takin lung dēng mānsa rase,”
ati na.
8 Hatuka ama chu anbūna akut chal le dēn phil amaziak rēta.
9 Hatuka amānīn achong ril ariat u na aninga siat le sa riatnān āsia amanlō u na,
ulian len āta anphuta nāipang ten pei angkhat angkhata asuaka asē zit u.
Havan tin han Isua rong athei daka nupang amalāi u taka ei manding u lehan amāk u na.
10 Hankēng Isua chung tiang atang rēta nupang athei daka om rong nōk chu tutē ei mu om lāi mak.
Hatuka akōma ati na:
“Nupang,
āsia anān lō ngāi ha hon mo ei om u ani zei?
Tutēn lung anadēng om u mak mo?”
ati na.
11 Hatuka chu nupangin:
“Puma,
tutē āsia anānlō ngāi om u lāi mak,”
ati na.
Isuan akōma:
“Hano ten,
koi um āsia na manlō makung.
Tenchu sē tānla,
atun āta chu āsia vathō lāi nō ro,”
ati na.
Isua chu maniapūr ra-āng
12 Isuan amāni ngāi kōma chong aril rēta:
“Koi hi maniapūr ra-āng ka ni.
Tukareng ka nūk azī tak chu azīng kāra kal chōi lāi nō ni.
Tenchu damna ra-āng man inti,”
ati na.
13 Tenchu Pharisi ngāiin akōma:
“Nang na ninga nei anriatna kēng nei anril hile,
hasik han na ninga nei anriatna hi ādik ni mak,”
ati u na.
14 Isuan amāni kōma:
“Ka ninga kei anriatna kei anril aninām,
ka ninga kei anriatna hi ādik kēng.
Asik chu kei hong anthokna le kei sēna rang riat u mak che.
Tenchu koiin hon nāta mo kei hong hanūk chu hon mo kei sē rang hava ha ka riata.
15 Nangnīn taksana kēng rui nei ril u chachak,
koin chu tutē rui kei ril om mak.
16 Tenchu mi rui ka rilām nisela,
ka rui rilna chu ādik kēng.
Asik chu ka theia om ni makunga,
koi anatīrpu Pa chu ka bila om ani na.
17 Hanūk chu nangni na Dān bunām,
mi annīn ei riatpuina chu ādik kēng ti na ānziak ani na.
18 Ka ninga koi hi kei anriatna ārilpu ka ni zei.
Hanūk chu Pa anatīrpu hām ka rui ana riatpui ani zei,”
ati na amasanga.
19 Hankēng amāni hān:
“Na Pa chu hon mo ei om?”
ati u na.
Isuan amasanga:
“Nangnīn koi hīm na riat u mak che,
ka Pa hām riat u mak che na.
Koi nei na riat u nisela chu ka Pa hām nei riat u rang nīnti,”
ati na amasanga.
20 Pathian biak ina amanchū lāi han Isuan hiva chong ngāi hi nuam pēk sum siakna muna han ei ril ani na.
Asik chu ahun ei la suak nōk sika tutēn ama chu asūr om mak.
21 Hanūk chu Isuan amāni kōma aril rēta:
“Koi chu asē rang ka ni zei,
nangnīn na rok u na tia hatuka āsia nei thō u ngāia han thī u na ti.
Kei sē na taka nangnīn hong thei u nō ta ni,”
ati na.
22 Hatuka Jihudi ngāiin:
“ ‘Kei sē na taka nangni hong thei u nō ta ni,’
ei ti na hi aninga ānthat rang ei anti na mo tāk?”
ati u na.
23 Hankēng amān akōm u na:
“Nangni chu hi thuai tiang āta āsuak kēng na ni u,
koi chu chung tiang āta āsuak kēng ka ni.
Nangni chu hi maniapūr āta āsuak na ni u,
koi chu hi maniapūr āta āsuak ni makung.
24 Hasika han na kōm u na kei na ti u chu āsia nei thō u na ngāia thī u na ti.
Hatuka,
‘Ama ha koi hi ka ni zei,
kei anti ha nana iam u nōk ten,
āsia nei thō u na ngāia nei thī u rang,’ ”
ati na.
25 Hatuka amānīn akōma:
“Nang hi tu mo na ni?”
ati na amakhal u na.
Isuan amasanga:
“Hong zāt mo aphut len āta kei na ril u ha hava ang tak ha ka ni zei.
26 Nangni ngāi ruia ati rua le rui aril rua tampa ka dōna.
Hanum nisela anatīrpu chu ādik tak ani na.
Ama kōma kei riat ngāi dōra hi maniapūr kōma kei ril,”
ati na.
27 Amān akōm u na Pa rui kēng ei ril ti hi riat thei u mak.
28 Hasika han Isuan akōm u na:
“Koi Miring Nāi Pasal hi chung tianga antāra ka om tika ama ha koi ka ni zei ti hi la riat u na ti.
Hatuka koi ka ning bārchana itē kei thō om mak,
tenchu Pain ei na manchū anga kei ril chachak ti hi la riat u na ti.
29 Anatīrpu chu ka bila a om ani na.
Pain ka thei daka na māk mak.
Asik chu ama ei zōt athō chachak kēng ka ni,”
ati na.
30 Hankēng amān hiva chong ei ril ngāi ariat u na mi tampān ama a iam u na.
Abraham achi ngāi
31 Hasika han Isuan ama a iam Jihudi ngāi kōma:
“Nangnīn kei na manchū u anga na om u ten ka zolāi tatak na ni u zei.
32 Hatuka chongtak chu riat u na tia,
hava chongtak ngēt hān suak āta na mazōk unti,”
ati na.
33 Hatuka amānīn akōma:
“Koini chu Abraham achi kēng na ni,
tutē suaka la om ngāi mak me.
Nangin hontin mo,
‘Suak āta zōk u na ti,’
nei na ti?”
ati na amasang u na.
34 Isuan amasanga:
“Taktaka,
kei na ril ani u zei,
tukareng āsia sin athō tak chu,
āsia suak kēng ei chang.
35 Suak hi kumkhua sōta ina om chian ngāi mak,
Miring Nāi Pasal koi chu kumkhua sōta a om rang kēng ka ni.
36 Hasika han koi Nāi Pasalin ka na mazōk u ten āzōk tatak chang u na ti.
37 Abraham achi na ni u ti ka na riat u,
tenchu ka chong na malung u na mun ei man nōk sika ana thatna nei rok u.
38 Ka chong ril ngāi Pa kōma kei mu ha kēng kei ril.
Nangnīm na pa u ngāi kōma nei mu u ha kēng nei thō u chachak,”
ati na
39 Hatuka amānīn akōma amasang u na:
“Koini na pa chu Abraham kēng,”
ati u na.
Hankēng Isuan akōm u na:
“Abraham anāi na ni u ten,
Abraham asin dēn kēng nei thō u rang.
40 Tenchu atun hin koi,
Pathian kōm āta chongtak ariata nangni kōma ana rilpu u hi nangnīn ana that ranga nei na val u.
Abrahamin chu hantin han thō ngāi mak.
41 Nangni chu na pa u sin kēng nei thō u hile,”
ati na.
Hatuka amānīn akōma ati u na:
“Pa angkhat dak rong kēng nei dōn,
ama chu Pathian len ha ani zei.
Koi ni hi pa andang lui nāi ni mak me,”
ati u na.
Diabol āta āsuak nāi ngāi
42 Hatuka Isuan amāni kōma:
“Pathian chu na Pa u nisela nangnīn nei na dit u rang ani na.
Asik chu amān ei na hong tīr ka ni na.
Pathian kōm āta āhong ka ni na,
ka ninga āhong ni makung.
43 Ichanga mo ka chong ril ngāi nei riat thei u nōk?
Asik chu,
ka chong ril ngāi hi rangāi thei u mak che na.
44 Nangni chu na pa u diabol āta āsuak kēng na ni u.
Na pa u ning ōl zāt āthō kēng nei zōt u.
Ama chu aphut āta mi thatpu ani na.
Atak chunga chongtak reng ei bui sika ama chu chongtak tianga mi ni mak.
Ama chu milak athei le milakpa ei ni sika hin milak chong ei rila hin ama atheia ta kēng ei ril.
45 Tenchu chongtak kei na ril u sika kēng nei na iam u nōk ani zei.
46 Nangni bila tu mo koi hi mi salui ati na āsia anān lō thei rang na ni u?
Chongtak ka na ril u nām ichanga mo nangnīn nei na iam u nōk?
47 Pathian āta āsuak chu Pathian chong kēng arangāi ngāi.
Hasik tak han Pathian āta āsuak nei ni u nōk sika ka chong rangāi u mak che,”
ati na.
Isuan aninga rui anril
48 Hatuka Jihudi ngāiin akōma:
“Samari mi le raluain ei sūr kēng nei ti ha ādik ni mak mo?”
ati na ei masang u.
49 Isuan akōm u na:
“Raluain ei na sūr ni makung.
Tenchu ka Pa anlian kēng ka ni na,
nangnīn ēlsēl nei na thō u.
50 Koi ka ninga anlianna ānrok ni makung,
tenchu ānrokpu le rui ārilpu chu angkhat a om.
51 Taktaka kei na ril ani u zei,
tukareng ka chong ātel tak chu thīna mēl reng mu lāi nō ni,”
ati na.
52 Hatuka Jihudi ngāiin:
“Atun lam chu raluain ei na sūr tatak kēng ti hi nana riat zei.
Abraham athī sua zeia,
deari
ngāi um athī u zeia.
Nangin:
‘Tukareng ka chong ātel tak chu thīna reng tem lāi nō ni,’
nei ti.
53 Koini na chipui Abraham āthī sua nēka ālian mo na ni?
Deari ngāi um athī u zeia.
Hanle tu mo nei anti?”
ati u na.
54 Isuan akōm u na:
“Ka ninga kei ānlian nisela chu kei ānlianna hi akorong kēng.
Koini na Pathian ati na nangnīn arui nei ril u tak ha koi anānlian ka Pa ani zei.
55 Nangnīn ama chu riat u mak che na,
koi chu ama ka riata.
Ama chu riat makung kei ti nisela nangni ngāi anga milak athei chang ka ti.
Tenchu ama chu ka riata,
achong um ka tela.
56 Nangni na pa Abrahamin ka nikhua āmu ranga ei phām sabak ani na.
Hatuka chu amu na achān arāi asāna,”
ati na.
57 Hatuka Jihudi ngāiin akōma:
“Nang na kum ha kum sōmrangā ngal la kāi luia Abraham nei mu mo?”
ati u na.