Chubuk in pāntana Isua āsē
7
1 Hava suale Isua chu Galili ram dāma avacheia.
Jihudi ngāiin ama chu athat rang ei rok u sika Judia rama chu achei rang zōt lāi mak.
2 Tenchu atun hin Jihudi ngāi Chubuk in pānta chu ahong anāi zeia.
3 Hatuka chu aparual ngāiin akōma:
“Hivan āta suak tānla Judia rama sē ro,
sova son na zolāi ngāiin um na sin thō ngāi mu u rase.
4 Tutēn aninga raming anthang rang āzōtin maruka itē sin ei thō om ngāi mak.
Hava ngāi ha nei thō tatak ani anten,
maniapūr mi kōma manlang ta ro,”
ati u na.
5 Asik chu aparual ngāi ngalin ama chunga iam u mak.
6 Hatuka Isuan amāni kōm:
“Ka hun la hong suak mak,
tenchu nangni ngāi hun chu a om babang kēng.
7 Maniapūrin nangni chu na mumāk u nō ni,
koi chu na mumāk inti.
Asik chu asin thō u ngāi dōra hi āsia ani ti kei manriat ani na.
8 Nangni pei hiva pāntana sē u ro,
koi chu hiva pāntana la sē nō ning,
asik chu ka hun la hong suak mak,”
ati na.
9 Hatuka amāni kōm hava chong ngāi aril suale ama chu Galili rama ala om chiana.
10 Tenchu aparual ngāi pāntana asē sua u le amām mipui riat luia,
maruk anga asēna.
11 Hatuka Jihudi ngāiin ama chu pānta lāi han ārok u na:
“Hon tiang mo ei om ani zei?”
ati u na.
12 Hatuka mipui kāra ama ruia achiar sabak u na.
Mi senkhatin chu:
“Mi āsa khat chu ani,”
ati u na.
Mi senkhatin chu:
“Ni mak,
mi huang babang khat kēng,”
ati u na.
13 Tenchu Jihudi ngāi ei chi u sika tutēn ama ruia mipui riat ranga ril ngam u mak.
Pānta nikhua
Isuan mi amanchū
14 Pānta nikhua arīl liai lāi tak han Isua chu Pathian biak ina asēna mipui avamanchūna.
15 Hatuka Jihudi ngāiin:
“Hiva miring lekha ngal anchūna dōn ngāi lui hīn hontin mo Pathian Lekhabu ei pore thei?”
ati na aboi ei mandong u.
16 Tenchu Isuan amāni kōma amasanga:
“Koi ka mi manchūna hi ka ta ni mak,
anātīrpu ta kēng.
17 Tukareng ama ei zōt zāt āthō zōt tak chu,
kei manchūna hi Pathian āta asuak mo ole koi ka ning āta asuak mo,
riat thei inti.
18 Tukareng aning ranga chong āril chu,
aninga anlianna ānrok kēng.
Tenchu anatīrpu ei anlianna ānrok chu,
chongtak mi kēng.
Ama chunga chu dik nōkna reng om mak.
19 Nangni kōma Mosīn dān ei na pēk u ni mak mo?
Hanum nisela hava dān ha tutēn zī u mak che na.
Hanle ichanga mo nangnīn ana that ranga nei na pūt u?”
ati na.
20 Hatuka mipui hān amasanga:
“Diabolin ei sūr kēng hile,
tu mo nang ana that ranga anān rok?”
ati u na.
21 Isuan akōm u na amasanga:
“Sin khat kei thō sika hin na lom u na boi nei mandong u.
22 Asik chu Mosīn sertanna dān ana pēk u na.
Hava ha na chipui u ngāi āta asuak kēng.
Tenchu Mosi nāta asuak ni mak.
Hatuka nangnīn pōngansa nikhuana pasal ser ha nei mantan u.
23 Mosi dān nei masiat u nōkna ranga nangnīn pōngansa nikhua nām pasal ser nei mantan u ani na.
Hanle koiin pōngansa nikhuana mi khat kei mandam vang sika mo ka chunga na tak nei mansi u?
24 Na mita nei mu u anga rui ril u nō tānla adik taka rui ril u ro,”
ati na.
Isua hi Krista mo?
25 Hatuka Jerusalem khopuia mi senkhat ngāiin:
“Hiva mi hi ni mak mo āthat ranga ei pūt chian u?
26 En u ta,
mipui riata chong ei rila,
tutēn ankōk om u mak.
Ama so Krista tatak kēng ani ti ruaitu ngāiin ei riat ngēt u mo ani zei?
27 Hanum nisela ama ei hong anthokna chu na riat,
tenchu Krista ahong tika chu ama ei hong anthokna tutēn ariat om nō ni,”
ati u na.
28 Hasika han Isuan Pathian biak ina amanchū lāi tak han ankhēka:
“Nangnīn koi chu nei na riat u,
kei hong anthoknām nei na riat u.
Tenchu koi ka rachama āhong ni makung,
ana tīrpu chu ādik ani na,
ama chu nangnīn riat u mak che na.
29 Koi chu ama ka riat,
asik chu ama kōm āta ahong ka ni na,
ama kēng ana honga tīr,”
ati na.
30 Hasika han ama chu mīn āsūr ranga aval u na,
tenchu achunga tutēn kut anlāng ngam u mak,
ahun ei la hong suak nōk sika.
31 Hatuka mipui bila tamtakin ama chu a iam u na:
“Krista ahong tika hiva mīn sinsiana ei thō ngāi nēka atam amān sinsiana la hong thō ni mo?”
ati u na.
32 Hatuka Pharisi ngāiin ama ruia mipui ei chiar sabaka ei chong ariat u na.
Hatuka chāizūng ulian ngāi le Pharisi ngāi ama avān sūr ranga mi sūr ngāi atīr
u na.
33 Hatuka Isuan amāni kōma:
“Atuna hun sūng hin alakte na bil u na la om ka ti,
tenchu anātīrpu kōma ā sērēt rang ka ni zei.
34 Hava tika nangnīn na ravān u na ti tenchu na tok u nō ta ni.
Kei omna tak um hong thei u nō ta ni,”
ati na.
35 Hatuka Jihudi ngāi amāni le amāni achong u na:
“Koinīn nei mu thei nōk ranga hiva mi hi hon tiang mo ei sē rang ani zei?
Jentail ngāi bila Jihudi nam antheka om ngāi kōma mo ei sē rang ani zei?
Jentail ngāi ei vamanchū rang?
36 ‘Nangnīn na rok u na ti,
na tok u nō ta ni,
kei omna tak um hong thei u nō ta ni,’
ei ti hi hong ei ti na mo?”
ati u na.
37 Khohui ahek rang nikhua,
nikhua lian khīt nikhua han Isua andinga,
ankhēka:
“Tukareng atī ānrāl tak chu ka kōma hong nēk rase.
38 Koi ana iam tak chu,
Pathian Lekhabūna anziak anga:
‘Asūngrīl āta tī adam dung chu luang inti,’
ei ti,”
ati na.
39 Hiva hi ama a iam ngāiin anrapa Ratha ei man len u rang rui kēng ei ril.
Asik chu Pathianin Isua anliana ei la siak nōk sika a iam ngāi chunga Ratha Ānthiang ha la hong pēk mak.
40 Hatuka mipui bila senkhatin hava chong ariat u na:
“Taktaka,
ama hi deari ha ani zei,”
ati u na.
41 Hatuka senkhatin:
“Ama hi Krista ani zei,”
ati rēt u na.
Tenchu senkhatin:
“Hontin mo ei ni thei rang?
Galili ram āta Krista hontin mo ei suak thei rang?
42 En u ta,
Krista chu David achi nāta,
David ei omna Betlehem khua nāta kēng ei hong suak rang ti ha Pathian Lekhabuin ei ril ni mak mo?”
ati u na.
43 Havan tin han ama sika mipui kāra ansenna ei suak ani na.
44 Hatuka amāni bila mi senkhatin āsūr rang azōt u na,
hanum nisela ama chunga tutēn kut anlāng ngam om u mak.
Jihudi ruaitu
ngāiin Isua iam mak
45 Hankēng mi sūr ngāi ha chāizūng ulian ngāi le Pharisi ngāi kōma ahong akīr u na.
Hatuka amānīn alei rakel u na:
“Ichanga mo nei hong ruai thei u nōk?”
ati u na.
46 Hatuka mi sūr ngāiin amasang u na:
“Hiva miringin chong ei ril anga tutēn chong aril la om ngāi mak,”
ati u na.
47 Pharisi ngāiin akōm u na:
“Hano ten,
nangnīm ana lei huang u mo ani zei?
48 En u ta,
ruaitu ngāi le Pharisi ngāi bila
mi ama a iam mo a om zei?
49 Tenchu hava mipui ngāi itē dān riat lui ngāi chu khomāk ātung u rang kēng,”
ati u na.
50 Hatuka chu amāni ngāi bila mi khat araming Nikodem a om a.
Ama ha aphāmāna Isua kōma zāna āhongpu ha amāni bila ānchel ani na.
51 Amān akōm u na:
“Koini na dān anga ama amūr ngēta achong le asin thō ngāi riat bak luia koinīn mi rui mo na ril thei?”
ati na.
52 Amānīn akōma:
“Nang um Galili ram āta mo na ni hi?
Hong thūn tān enta,
Galili ram āta deari tutē āsuak la om ngāi mak,”
ati na amasang u na.
53 Hatuka angkhakhata a in chipa asē kiar
u na.