Mi asāng rangā Isuan avāi
6
1 Hava ngāi suale Isua chu Galili tīndīl sontiang varāla,
Tiberi tīndīl ei ti u han asēna.
2 Asik chu āna ngāi chunga sinsiana ei thō ngāi amu u na mipui tamtakin anūk azī u na.
3 Hatuka Isua chu muala avakala hava han azolāi ngāi bila ansuta.
4 Hankēng,
Jihudi ngāi Zōkna pānta khat chu ahong anāi zeia.
5 Isua anhoia,
mipui tamtakin ama tianga ei hong pan alei mu na,
Philip akōm:
“Hiva ngāi ei nēk rang ruti hovan āta mo rachōk u mani?”
ati na.
6 Tenchu hiva chong hi Philip ei mansinna ranga ei rakel kēng,
amān ei thō rang chu ei riatsa kēng.
7 Philip hān amasanga:
“Hi dōra mi ranga alaktete ei chang chip thei u na ranga,
denari razānni man ruti ngal sem ila hun nō ni hile,”
ati na.
8 Azolāi ngāi bila angkhat Simon Peter anāipa Andria hān akōma:
9 “Barli ruti rangā le ngā sīnte ngāi anni ādōn pasal sanāite khat hiva hin a om.
Tenchu hi dōr peia mi tampa kāra hava tete lehan imo ei chang rang?”
ati na.
10 Hatuka Isuan:
“Mipui ngāi pei mansut u ta,”
ati na.
Hava muna han chiak ātampa om ani na.
Hatuka chu pasal ngāi ansut u na ei tam u chu asāng rangā dām ani na.
11 Hatuka Isuan ruti alāka,
rāisān chong aman tung suale azolāi ngāi kōma asema.
Hatuka azolāi ngāi hān ānsut ngāi kōma asem u na.
Havantin ang dēna ngā hām asema ei nāng u dōr pei apēka.
12 Hatuka akhopa abāng sua u le azolāi ngāi kōma:
“Itē ei anpei nōkna ranga amaniangte ngāi dōra mankhōm zit u ro,”
ati na.
13 Hatuka amankhōm u na,
barli ruti rangā āsāk ngāiin ei manniang u ha kok sōmleianni ābit ala rūt u na.
14 Hatuka hava mi ngāi hān Isuan sinsiana sin ei thō amu u na:
“Taktaka,
hiva mi hi maniapūra ahong rang deari kēng ani ngēt zei hile,”
ati u na.
15 Hasika han,
ama chu rēng anchang ranga mipui ahonga ama chu asūra ei ruai khakhak u rang ti Isuan ariata,
ama rong athei daka muala avakala.
Tī chunga Isua kal achōi
16 Hatuka khului ahong asuak le chu azolāi ngāi chu tīndīla avachum u na.
17 Rakuanga achuang u na,
tīndīl son tiang varāla Kapernaum khuana asē u na.
Hatuka zān ahong azīng zeia,
hanum nisela Isua chu akōm u na la hong tung mak.
18 Hava han phāivua ānrikpa ei hong sika tīndīla tīduar ansok anrik riama.
19 Hatuka kilomitar rangā nāta kilomitar aruk ten asē sua u le Isua chu tī chunga kal achōia amu u na.
Rakuang ahong dēp le amānīn alei āchi u na.
20 Tenchu amān akōm u na:
“Koi kēng ka ni,
āchi u nō ro,”
ati na.
21 Hatuka rakuang chunga anchuang ranga azōt u na.
Hatuka rakuang chu ei vatungna rang muna avasuak lena.
22 Zīng khua vār rēta han tīndīl son tiang varāla mipui ānding ngāiin rakuang angkhat dak a om ti ei riat u ani na.
Azolāi ngāi ei chuang u na rakuang rong nōk chu atei om mak.
Hava han Isua chu azolāi ngāi bila rakuanga chuang lui ani na.
Azolāi ngāi rong alei sē u ani na.
23 Hanum nisela Tiberi khua nāta rakuang atetei ngāi ahonga,
Pumān rāisān chong aman tung suale ruti ei sāk u na mun kōla han ahong u na.
24 Hava suale mipui ngāiin Isua le azolāi ngāi hava muna han om u lāi mak ati na ariat u na.
Hasika han amānīm rakuang ngāi chunga achuang u na Kapernaum khua ten pei Isua ānrok ranga asē u na.
Isua hi damna ruti
25 Hatuka amānīn sontiang tī varāla avamu u na:
“Rabbi,
hiva hin hova tika alei hong mo na ni?”
ati u na.
26 Hatuka Isuan akōm u na:
“Taktaka kei na ril ani u zei,
sinsiana ngāi nei mu u sika nei na rok ni u mak,
tenchu,
ruti akhopa nei sāk u sika nei na rok u kēng.
27 Āsiat thei sāk ranga pōng u nō tānla tenchu tāituan damna ten pei ādiar rang sāk,
koi Miring Nāi Pasalin kei pēk sāk sika pōng u ro.
Asik chu Pa Pathianin ei
na mandang sua kēng ka ni zei,”
ati na.
28 Hatuka amānīn akōma:
“Koinīn Pathian sin nei thōthei na ranga,
hong mo nei thō rang?”
ati u na.
29 Isuan akōm u na amasanga:
“Pathian sin chu hiva hi ani,
amān ei hong tīrpu alei iam hi ani,”
ati na.
30 Hatuka amānīn akōma:
“Hong zāt sinsiana mo nei thōna nei mu rang,
hanūk chu hong zāt sin mo nei thōna nei iam rang?
31 Koini na chipui ngāi chu philchār rama manna ei sāk u ani.
Asik chu Lekhabūna anziak anga:
‘Anvān āta amāni ei nēk u
rang ruti ahong pēk,’ ”
ati u na.
32 Hatuka Isuan akōm u na:
“Taktaka kei na ril ani u zei,
anvān āta ruti nei man u ha Mosīn ei na pēk u ni mak,
tenchu anvān āta ka Pa kēng ruti tatak ana pēk u.
33 Pathian ruti chu anvān āta ahong achuma maniapūr kōma damna āpēk hi ani,”
ati na.
34 Hasika han amānīn akōma:
“Puma,
hava ruti ha na pēk babang ro,”
ati u na.
35 Hatuka Isuan akōm u na:
“Koi hi damna ruti ka ni zei.
Ka kōma ahong tak chu avon anchām lāi nō ni,
ana iam tak chu atī anrāl pial lāi nō ni.
36 Hanum nisela kei na ti ani u zei,
nangnīn nei na mu u,
tenchu na iam u mak che na.
37 Pain ei na pēk dōra chu ka kōma hong unti.
Tukareng ka kōma ahong tak chu lei not pial nō ning.
38 Asik chu koi kei zōt āthō ranga ahong ni makung,
tenchu anatīrpu ei zōt āthō ranga anvān āta ahong achum ka ni.
39 Pa anatīrpu ei zōt chu hiva hi ani,
amān ei na pēk ngāi dōra,
angkhatte ngal ei anpei nōka nikhua hek tika kei mathui kiar rēt thei u rang hi ani.
40 Hatuka hiva hi anatīrpu ei zōt chu ani,
tukareng Nāi Pasal āmu,
le āiam tak chu tāituana damna man intia nikhua hek tika chu mathui rēt ka ti,”
ati na.
41 Hatuka chu amān:
“Anvān āta ruti ahong ha koi hi ka ni zei,”
ei ti sika Jihudi ngāi ama chunga asang vung u na.
42 Amānīn:
“Hava nāi ha Joseph anāi pasal Isua ha ni mak mo?
Anu le apa ngāi um na mēl riat ni mak mo?
Atun amān:
‘Anvān āta ahong achum ha ka ni,’
ei ti hi hong ei ti na mo?”
ati u na.
43 Hasika han Isuan akōm u na amasanga:
“Nangni ngāi sang susup u nō ro.
44 Pa anatīrpu rongin atiang akei nōk ten tutē ka kōma āhong thei rang om mak.
Hatuka nikhua hek tika koiin ama chu mathui ka ti.
45 Deari ngāi Lekhabūna:
‘Alom u na Pathian kōm āta
anchūna man unti,’
(Isa.54:13 )
ti ānziak ani na.
Hasika han tukareng Pa chong ariata anchūna āman tak chu ka kōma ahong u.
46 Pathian āta ahong rong nōk chu tutēn Pa hi āmu la om ngāi mak.
Ama rong kēng Pa chu āmu.
47 Taktaka kei na ril ani u zei,
koi ana iam tak chu tāituan damna aman zei.
48 Koi hi hava damna ruti ka ni zei.
49 Na chipui ngāiin philchār rama manna asāk chu asāk u tenchu āthi bang u kēng.
50 Hiva hi anvān āta ruti ahong,
hiva hi mīn ei nēka ei thi lāi nōkna ranga ani.
51 Koi hi hava ruti ādam,
anvān āta ahong achum ha ka ni.
Tukareng hiva ruti hi asāk ten tāituan ranga dam inti.
Maniapūr damna ranga kei pēk rang ruti chu ka taksa hi ani,”
ati na.
52 Hasika han Jihudi ngāi kāra ankhalna asuaka:
“Hiva mi hīn hontin mo ataksa asāk ranga ei na pēk thei rang?”
ati u na.
53 Hatuka Isuan amāni kōma:
“Taktaka kei na ril ani u zei,
koi Miring Nāi Pasal,
ka taksa na sāk u nōka,
ka thisen na buang u nōk ten,
nangnīn damna dōn u mak che.
54 Ka taksa asāka ka thisen ābuang tak chu tāituan damna aman zei.
Hatuka nikhua hek tika ama chu mathui ka ti.
55 Asik chu ka taksa hi sāk tak,
ka thisen hi abuang rua tatak ani na.
56 Ka taksa asāka ka thisen ābuang tak chu koia a om chian ani na,
hatuka koi um ama kōma a om chian ka ni.
57 Pa ādam hān ei na hong tīr ka ni na.
Pa azāra ādam kei ni anga,
tukareng koia ana nēk tak chu koi ka zāra dama om inti.
58 Hiva tak hi anvān āta ahong achum ha ruti ani zei.
Na chipui u ngāiin manna ei sāka ei thī u ang ni mak.
Hiva ruti asāk tak chu tāituana dama om inti,”
ati na.
59 Kapernaum khuana amanchū lāi han hiva chong ngāi hi Jihudi ngāi ankhōmna ina ei ril ani na.
Zolāi ngāi ātamin anūk ankei u
60 Azolāi ngāi bila ātamin hava chong ariat u le chu:
“Hiva chong hi ariat āntak kēng hile,
tu mo apom thei rang?”
ati u na.
61 Tenchu azolāi ngāi hava ruia ei sang u ti amalunga alei riata,
akōm u na:
“Hiva ruia kei rila hin na malung ei do u lāi nōk mo ani zei?
62 Koi Miring Nāi Pasal hi aphuta kei omna dēna akala na mu u tānla,
imo nei thō u rang?
63 Damna āpēk chu Ratha hi ani na.
Taksa chu itē ei nemna om mak.
Na kōm u na chong kei ril ngāi hi ratha le damna rui ani na.
64 Hanum nisela nangni bila senkhat chu a iam nōk na om u,”
ati na.
Asik chu Isuan tu mo ama a iam nōk le ama ānsūrpu rang aphut āta alei riatsa ani na.
65 Hanūk chu amān ati rēta:
“Hasika han kei na ril ani u zei,
Pain thōtheina apēk nōk ten tutē ka kōma ahong thei om mak,”
ati na.
66 Havan āta chu azolāi ngāi ātamin chu anūk ankei u na,
anūk zī u lāi mak.
67 Hasika han Isuan azolāi sōmleianni kōma:
“Nangnīm ana māk rang mo nei zōt u?”
ati na.
68 Hatuka Simon Peterin akōma amasanga:
“Puma,
koinīn tu kōma mo nei sē rang?
Na kōm kēng tāituan damna chong nei dōn hale.
69 Nang chu Pathian ādam Nāi Pasal,
Krista nei ni hi nei na iama nei na riat ani zei,”
ati na.
70 Isuan akōm u na amasanga:
“Hiva nangni sōmleianni ngāi hi kei na thang ni u mak mo?
Hanum nisela nangni bila diabol khat na la om rēt u na,”
ati na.
71 Tenchu hiva ei ril ngāi hi Iskariot Simon anāi pasal Juda arui kēng ei ril.
Ama hi zolāi sōmleianni ngāi bila angkhat ani na.
Asik chu ama ānsūrpu rang chu ama hi ani na.