16
1 Hautka:
“Na malung u dok ei chuai nōkna ranga hiva chong ngāi hi na kōm u na kei ril.
2 Mīn ankhōmna in āta na keia na la masuak unti.
ātataka,
nangni ana that tak chu Pathian kōma hasōndom ranga dāli andar anga la be unti.
Hava zāt hun ha ahong asuak rang ani zei.
3 Asik chu amānīn Pa riat u mak,
koi um na riat u mak.
Hasika han hava ang zāt na chung u na ei la thō u rang.
4 Hun ahong asuak tik le hiva ngāi hi kei na ril u kēng ti nei riattit thei u na ranga hiva chong hi aphāmān āta kei na manthei u.
Aphut āta hiva ngāi hi na ril u makung.
Asik chu na bil u na om kei la ni sika.
Ratha Ānthiang sinthō
5 Atun chu anatīrpu kōma ā sērang ka ni zei.
Hanum nisela nangni bila tutēn:
‘Hon mo nei sē rang?’
ati na na rakel u mak che na.
6 Tenchu hiva ngāi kei ti sika na malung u dok chuaina na ābit kēng ani zei.
7 Hanum nisela kei na ril u hi chong tak kēng kei na ril u.
Kei sē hi nangni ranga āsa kēng.
Asik chu ka sē nōk ten Phūkdāipu ha na kōm u na hong nō ni.
Tenchu ka sē tikle na kōm u na hong tīr ka ti.
8 Hatuka ama ahong tika chu āsia thō ruia,
dikna ruia,
ruirilna ruia maniapūr chu āsia ei hong manlō rang ani na.
9 Koi ei na iam u nōk sika amāni chu āsia thō ruia āsia ei hong manlō rang ani na.
10 Ka Pa kōma ā sērang ka ni zei hanūk chu nangnīn nei na mu u lāi nōk rang sika dikna ruia āsia ei manlō rang ani na.
11 Hi maniapūr ruirilpu chu āsia thō sika āsia anlō zei.
Hasika han ruirilna ruia chu āsia ei manlō rang ani na.
12 Na kōm u na aril rua ātampa ka la dōna.
Hanum nisela atun chu hava ngāi ha la nēng thei u nō ta ni.
13 Tenchu hava,
Ratha Diktak ha ahong tika aloma chongtaka na ruai unti.
Asik chu ama aninga chong ni mak ei ril rang.
Tenchu ei riat ngāi dōra kēng ei ril rang.
Rui ala honga tung rang um na la manriat unti.
14 Ratha Diktak hān koi hi na manlian inti.
Asik chu amān ka kōma ka ta ngāi chu lāka hava ha na kōm u na manlang inti.
15 Pan ei dōn dōra hi ka ta ani na.
Hasika han kei ti amān ka ta ngāi chu lāk intia,
hava ha na kōm u na manlang inti.
16 Hun alakte suale chu nangnīn koi hi na mu u lāi nō ta ni.
Hanūk rēt chu hun alakte suale nangnīn na mu rēt u na ti.
Asik chu Pa kōma ā sērang ka ni zei,”
ati na.
Zolāi ngāi annguina
chu rāisānna achang
17 Hankēng azolāi ngāi bila senkhatin:
“Koini na kōma chong ei ril hi imo a omzia?
‘Hun alakte suale nangnīn koi hi na mu u lāi nō ta ni,’
ei ti na hi?
Hanūk chu:
‘Hun alakte suale nangnīn na mu rēt u na ti.’
Hanūk rēt chu,
‘Pa kōma ā sērang ka ni zei,’
ei ti ngāi hi?”
ati u na.
18 Hasika han amāni dēn hān:
“ ‘Hun alakte’ ei ti na hi hong ei ti na mo?
Achong ril hi riat thei lāi mak me,”
ati u na.
19 Amāni hān akōma ankel rang ei zōt u ati na Isuan ariata akōm u na:
“ ‘Hun alakte suale nangnīn koi na mu u lāi nō ta ni,
hanūk chu hun alakte suale nangnīn na mu rēt u na ti’ tia
kei na ril u hi mo nei ankel u?
20 Taktaka,
taktaka,
kei na ril ani u zei,
Ankhēka chap u na ti.
Maniapūr mīn rāi mansān inti.
Na malung na unti,
tenchu na malung ei na u na chu rāisānna chang inti.
21 Nupangin nāiha apuang le achālaka adūk ei na ani na.
Asik chu nāi ei mazir rang hun ei hong suak sika ani na.
Tenchu maniapūra nāi ei hong mazira rāisānna sika adūk ei na dōra amangila.
22 Havan tin anga atun hin na dūk ei na u.
Tenchu nangni na mu rēt u ka ti,
hatuka na malung u rāisān rēt inti.
Hava rāisānna chu tutēn ana lāk pe thei om lāi nō ni.
23 Hava nikhua tika chu nangnīn itē na rakel u lāi nō ta ni.
Taktaka,
Pa kōma ka raminga nei zong u tak amān hava ha na hong pēk unti.
24 Atun ten pei hin ka raminga itē la zong u mak che.
Na rāisānna ei tung thei u na ranga zong u ro man u na ti.
25 Hiva ngāi hi ankhīna lehan na kōm u na chong kei ril.
Tenchu ahun āhong rang ani zei,
hava tika chu na kōm u na ankhīna lehan chong ril lāi nō ning.
Anthiang vanga na kōm u na Pa rui chu na ril u ka ti.
26 Hava nikhua tika nangnīn ka raminga zong u na ti.
Koiin Pa kōma na zong pe u ka ti na ti u makung.
27 Nangnīn koi nei na dit u sika le Pathian kōm āta ahong ka ni ti nei na iam u sika Pa ngētin ei na dit u kēng.
28 Koi chu Pa kōm āta ahonga maniapūra honga chum ka ni.
Atun chu maniapūr amāka Pa kōma ā sērēt rang um ka ni zei,”
ati na.
29 Hatuka chu azolāi ngāiin akōma:
“Enta,
atun chu anthiang vanga chong nei na ril ani zei.
Ankhīna lehan chong ril lāi mak che na.
30 Atun chu nangin aloma na riat zit zei ti na riat.
Tutēn nang anānkel um nāng lāi mak me.
Hasika han Pathian kōm āta āhong na ni ti koinīn na na iam zei,”
ati u na.
31 Hatuka Isuan akōm u na amasanga:
“Atun chu nei iam mo ani u zei?”
32 “En u ro,
ahun ahong asuak rang ani zei,
adika chu ahong asuak kēng ani zei.
Hava tika chu anchēn kiara om u na tia,
na in pan chip u na ti.
Ka theia na māk rak u na tia,
tenchu ka theia a om ni makung.
Asik chu Pa ka bila a om kēng.
33 Ka kōm āta hin phūkdāina nei man thei u na ranga hiva chong ngāi hi na kōm u na kei ril.
Maniapūra hin antakna tiar u na ti.
Tenchu na malung manrāt u ro.
Asik chu koiin maniapūr ka sua zei,”
ati na.