Gerep kung le abāk ngāi
15
1 Hatuka:
“Koi hi gerep kung tatak ka ni na,
Ka Pa hi gerep rahuan āthōpu ani na.
2 Koia a om abāka ānra nōk ngāi chu amān ei tuka ei pei ani na.
Hatuka abāk anra ngāi chu amān ei rathial vang ani na.
Asik chu ātam ei anra riam theina ranga.
3 Na kōm u na chong kei ril lehan atun āta ānthiang kēng na ni u zei.
4 Ka kōma om chian u ro,
koi um na kōm u na om ka ti.
Gerep kung lehan abāk anzom nōk ten atheia anra thei mak.
Nangnīm ka kōma na om u nōk ten mara dōn thei u nō ta ni.
5 Koi hi gerep kung ka ni na.
Nangni hi abāk ngāi chu na ni u.
Tukareng ka kōma a om tak chu,
koi um ama kōma kei omna tak chu ātampa mara dōn inti.
Asik chu koi nōk ten nangnīn itē nei thōthei om u mak.
6 Tukareng koia a om nōk ten abāk anga ei antuka ei anpei rang.
Hatuka chu hava ha chār intia mīn ei mankhōma moia ei hāla ei pei rang.
7 Nangni ka kōm na om u ten hanūk chu ka chong nangni kōma a om ten,
nei zōt u tak zong u ro.
Hava ha na rang u na na thō pe u ka ti.
8 Nangnīn mara tampa nei anra u hin ka Pa chu anliana ei om ani na.
Hanūk chu havan tin han nangni chu ka zolāi chang u na ti.
9 Pan koi ei na dit anga koi um nangni ngāi ka na dit u na.
Kei na dit u na hin om chian u ro.
10 Nangnīn ka chongpēk ngāi dōra hi na tel u ten kei na madit u na hin a om na ni u zei.
Koi um ka Pa chongpēk ngāi dōra kei tela.
ama ei na ditna na hin kei om.
11 Ka rāisānna nangni kōma ei om theina rang le nangni na rāisān u na ei kip theina ranga hiva chong ngāi hi na kōm u na kei na ril u.
12 Hiva hi ka chongpēk:
‘Kei na dit u anga nangnīm andit u ro.’
13 Mīn amal rathūla ei damna aphal diai thei anditna nēka ālian tutēn ādōn om lāi mak.
14 Ka chongpēk ngāi na tel u ten mal na ti u ka ti.
15 Suak na ti u nō ning.
Asik chu suakin imo apumān ei thō riat mak.
Hasik han mal kēng kei na ti u rang.
Asik chu ka Pa kōm āta kei riat dōra
na kōm u na kei na manthei u.
16 Nangnīn nei na thang ni u mak che,
tenchu koiin kei na thang u kēng.
Hanūk chu mara nei dōna na mara u na nei om thei u na ranga kei na phun u ani na.
Hanūk chu ka raminga Pa kōma nei zong u tak ei na pēk thei u na ranga.
17 Nangni le nangni ngāi nei andit thei u na ranga hiva chong hi kei na pēk u.
Zolāi ngāi
maniapūrin amumāk
18 Maniapūr mīn ana mumāk u le ana mumāk mān koi kēng
ei na mumāk mānsa ti hi riat u ro.
19 Maniapūr mi ni u tānla chu maniapūrin ei na dit u rang ani na.
Asik chu ama ta nei ni u sika ei na dit u ani na.
Tenchu nangni chu maniapūr ta ni u mak che na.
Maniapūr āta kei na thang u sika kēng maniapūrin ei na mumāk u.
20 Suak apuma nēka lian ngāi mak ti chong kei na ril u ha mangil u nō ro.
Mīn koi hi na sinsak u sela nangni ngāi um ei na sinsak u ti na kēng.
Ka chong tel u sela chu nangni ngāi chong um ei tel u rang ani na.
21 Hanum nisela ka raming sika hiva ngāi dōra hi na chung u na la thō unti.
Asik chu koi ana hong atīrpu ei riat u nōk sika.
22 Kei hong nōk hi ni sela,
hanūk chu akōm u na chong kei ril nōk hi nisela chu āsia anlō u nō ni.
Tenchu atun chu āsia ei thō u sika anōn rua dōn u lāi mak.
23 Koi anān mumāk tak chu ka Pa hām ānmumāk kēng.
24 Asik chu tutēn la thō ngāi lui sin khat akār u na kei thō ni nō sela chu āsia anlō u nō ni.
Tenchu atun chu aloma hava ngāi dōra amu u zeia.
Hanum nisela ka Pa le koi chu ei na la mumāk rit u ala ni.
25 Tenchu amāni Dān Lekhabūna ānziak:
‘Amānīn itē asik le akong
abuia ei na mumāk u,’
(Sām 35:19, 69:4 )
ati na chong ei kip theina rang ani na.