Isua azolāi ngāi lungngam asak
14
1 Hatuka:
“Na malung u itēn manbuai nō rase.
Pathian iam u ro.
Hatuka koi um na iam u ro.
2 Ka Pa ina a omna mun ātampa a om.
A om nōk nisela chu kei na man thei u rang kēng ani zei.
Nangni rang mun asin ranga ā sērang ka ni zei.
3 Hatuka nangni rang mun ka vasin suale hong kīr rēt ka ti.
Ka kōma na ruai u ka ti.
Kei omna taka nangnīm nei om thei u na ranga.
4 Hontiang mo kei sē na rang hava lampui chu nangnīn na riat u hale,”
ati na.
Isua hi Pa kōm asēna lampui
5 Thoman akōma:
“Puma,
hon mo nei sē na rang koinīn re mak me,
hontin mo lampui chu nei riat thei rang?”
ati na.
6 Isuan akōma:
“Koi hi lampui,
chongtak le damna ka ni zei.
Koi nōk chu tutē Pa kōma asēna vatung thei nō ni.
7 Koi hi nei na riat u nisela chu,
ka Pa hām nei riat u rang ani na.
Atun āta chu ama na riat u zeia,
hanūk chu nei mu sua ani u zei,”
ati na.
8 Hatuka Philippin akōma:
“Puma,
Pa chu koini kōma na man mu ro,
hava dōr ngal han koini na rang chu ahun zei,”
ati na.
9 Isuan akōma:
“Philip,
hiva dōr pei na bil u na kei om ani zei,
hanum nisela nei na la riat nōk mo?
Tukareng koi ana mu chu Pa āmu ani zei.
Nangin hontin mo:
‘Pa chu na man mu ro,’
nei la ti.
10 Pa kōma koi kei om le Pa koia ei om ti hi la iam mak che mo?
Na kōm u na chong kei ril ngāi hi ka ning āta kei ril om mak tenchu koia a om chian Pa hān asin ei na manthō chachak.
11 Pa na kei om le Pa koia ei om ti hi na iam u ro.
Hano ten asin kei thō ngāi sika luana chu na iam u ro.
12 Taktaka kei na ril ani u zei,
tukareng koi ana iam chu ka sin ei thō rang.
Koin kei thō ngāi anga amām ei thō rang ani.
Hiva ngāi nēka sin ālian ei thō rang ala ni.
Asik chu Pa kōma ā sērang ka ni zei.
13 Hatuka nangnīn ka raminga nei zong u tak pei chu na thō pe u ka ti.
Koi Nāi Pasal tak chunga Pa ei anlian theina ranga.
14 Nangnīn ka raminga nei zong u tak chu hava ha na thō pe u ka ti,”
ati na.
Ratha Ānthiang apēk
rang Isua achongtin
15 “Nangnīn nei na dit u aniten ka chongpēk ngāi hi tel u na ti.
16 Hatuka Pa kōma zong ka tia amān tāituana nangni bila om rang Phūkdāipu angkhat rēt na pe unti.
17 Ama ha Ratha Diktak ha ani zei.
Maniapūr mīn ama chu pom thei mak.
Asik chu ama lei mu thei mak,
lei riat um thei mak.
Nangnīn ama chu na riat u na.
Asik chu ama ha nangni bila a om ani na.
Nangni na bila ei la om um bang rang ala ni.
18 Sakāngchana na māk rak u nō ning.
Na kōm u na hong kīr rēt ka ti.
19 Hun alakte suale maniapūr mīn na mu lāi nō ni.
Tenchu nangnīn chu na mu u na ti.
Kei dam sika hin nangnīm dam u na ti.
20 Sova nikhua tika ka Pa na koi kei om,
nangnīn koia nei om u hanūk chu koi nangni kōma kei om ti la riat u na ti.
21 Tukareng ka chongpēk ngāi adōna ātel tak chu koi anāndit ani na.
Hanūk chu tukareng koi anāndit chu ka Pan um adit inti.
Hanūk chu koi um ādit ka ti,
akōma anlanga om ka ti,”
ati na.
22 Hankēng Iskariot nōk Juda hān akōma:
“Puma,
nangin koini ngāi kōma nei anlang rang,
Tenchu maniapūr mi kōma chu nei anlang nōk rang nei ti hi imo asik?”
ati na.
23 Isuan akōma:
“Koi anāndit tak chu ka chong ātel ani na.
Ka Pan um ama chu ādita,
koinīn ama kōma hong intia,
ama hong ompui intia.
24 Koi anāndit nōk chu ka chong ngāi tel mak.
Nangnīn chong nei riat u ngāi hi koi ka ta ni mak tenchu Pa ana honga tīrpu ta kēng.
25 Nangni ngāi bila kei om a hin hiva chong ngāi hi kei na ril u.
26 Tenchu Phūkdāipu,
Ratha Ānthiang chu Pan ka raminga hong tīr inti.
Amān alom peia na manchū zit unti.
Na kōm u na kei na ril u ngāi dōra na la hong manriat zit unti.
27 Phūkdāina ka na māk pe u.
Ka kōma phūkdāina kēng kei na pēk u.
Maniapūrin ei na pēk anga na pēk u makung,
Na malung manbuai u nō tānla,
āchīm u nō ro.
28 Nangni kei na māka āsē rang ka ni zei.
Na kōm u na hong rēt ka ti.
Hava kei na ti u ha na riat u na.
Nangnīn nei na dit u nisela chu Pa kōma āsē rang ka ni zei kei ti hin na rāi ei sān u rang ani na.
Asik chu ka Pa chu ka nēka ālian kēng.
29 Hiva ngāi dōra ahong atung mān atun āta hin kei na ril ani u zei.
Nangkana ahong atung tika nangnīn nei iam thei u na ranga.
30 Na kōm u na ātam ril lāi nō ning.
Asik chu hi maniapūr rui arilpu chu āhong rang ani zei.
Tenchu ka chunga amān itē ningneina dōn mak.
31 Hanum nisela koiin Pa kei madit le Pan chong ei na pēk anga sin kei thō hi maniapūr mīn ei riat theina ranga kei ti,”
ati na.
Hankēng:
“Tho,
anthui u ro,
hivan āta suak u rei,”
ati na.