Isuan azolāi ngāi ke arasūk
13
1 Zōkna pānta aphāmān Isuan hi maniapūr amāka Pa kōma asēna hun ahong asuak zei ti ariata.
Hi maniapūra ami a om ei dit ngāi chu ahek ten pei ei adittit ani na.
2 Hatuka zān ruti sākna hun ahong asuak zeia.
diabolin aphāmān āta Simon nāi pasal Iskariot Juda chu Isua anbetōk ranga malung alei man vong zēta.
3 Pain akuta aloma ei pēk kēng ani zei ti le Pathian āta Pathian kōm dēn ei kīr rēt rang ti Isuan ariata.
4 Hatuka zān ruti ei sāk u nāta anthuia apanga apuan rasil akheka,
hatuka anhuina puan alāka akōng akhita.
5 Hatuka khēnga tī abuna azolāi ngāi ke arasūk pe na.
Hatuka akōnga puan ei khit lehan ake u ngāi ahui pe na.
6 Hava suale Simon Peter akōm ahonga.
Peterin ama kōma:
“Puma,
nang mo ka ke ngāi anānsūk pe rang ?”
ati na.
7 Isuan:
“Hong mo kei thō hi atun la riat thei nō ta ni,
tenchu nangkana la riatin na ti,”
ati na amasanga.
8 Peterin akōma:
“Nangnin ka ke na rasūk pe thak nō ta ni,”
ati na.
Isuan akōma:
“Ka na rasūk pe nōk ten ka kōm āta itē nei chang rang om mak,”
ati na.
9 Simon Peterin akōma:
“Puma,
hano ten ka ke rong ni mak,
tenchu ka kut le ka lu hīm na rasūk pe ro,”
ati na.
10 Isuan akōma:
“Tī ānbual sua chu ake rong nōk chu atei itē ansūk nāng lāi mak.
Apumpui ānthiang kēng ani zei.
Ānthiang zit na ni u zei,
tenchu na lom u na kei na ti u na ni mak,”
ati na.
11 Asik chu ama ānbetōk rangpu ha alei riat zēt ani na.
Hasika han:
“Na lom u na ānthiang kiar ni u mak che,”
ati na.
12 Hankēng ake u ngāi arasūk pe suale apuan arasila ansut rēt le akōm u na:
“Na chung u na kei na thō pe u hi hong ti na mo na riat thei u mo?
13 Nangnīn Mīnchūpu le Puma nei na ti u ani na.
Ādik ani,
asik chu ka ni tataka.
14 Koi na Puma le na Mīnchūpu u luan na ke u ngāi ka na rasūk pe thei u ten nangni le nangni ngāi um na ke nei ansūk u rang anāng.
15 Na chung u na kei na thō pe u anga nangnīm nei thōthei u na ranga,
a enrua khat kei na man mu u.
16 Taktaka,
kei na ril ani u zei,
suak hi apuma nēka lian ngāi mak,
ātīrpu nēka ei tīrpu hīm lian ngāi mak.
17 Hiva ngāi hi na riata na thō u ten bōrsāng tung u na ti,”
ati na.
Isuan ama ei ansūr
rang rui aphāmān alei ril
Mt.26:17 -25 Mk. 14: 12 -21 Lk.22:14 -23
18 Hatuka amān:
“Na lom u na rui ni mak kei na ril u hi.
Ka mi kei thang ngāi chu ka riata.
Hanum nisela hiva Pathian Lekhabūna chong ei kip theina ranga:
‘Ka bila ruti ana sākpui hān,
ka chunga akepha ālāng zei,’
(Sām 41:9 )
ati na anziak ha,”
ati na.
19 “Hava ngāi ha ahong atung mān,
atun len āta kei na ril u ani zei,
ahong atung tik le hava ha koi kēng ka ni ti nei iam thei u na ranga.
20 Taktaka,
kei na ril ani u zei,
tukareng kei tīrpu āpom chu koi ana pom ani na.
Tukareng koi ana pom chu koi ana honga tīrpu āpom kēng,”
ati na.
21 Isuan hava chong ngāi aril suale chu amalung ana ariata.
Amān anthiang vanga ati na:
“Taktaka kei na ril ani u zei,
na bil u na angkhatin koi hi na betōk inti,”
ati na.
22 Azolāi ngāiin hava ha tu ei ti na mo ati na ei riat thei u nōk sika amāni le amāni an en u na.
23 Hatuka chu azolāi ngāi kāra angkhat,
Isuan ei madit ha Isua arōpa avān boia.
24 Hatuka Simon Peterin ama kōma amit le abiaka:
“Tu rang nei ti na mo na man thei ta,”
ati na arakela.
25 Azolāi madit chu ei om balam a om chiana,
Isua arōpa avān boia:
“Puma,
hanle hava ha tu mo?”
ati na.
26 Hatuka Isuan:
“Ruti pēk khēnga ka phūm suale kei pēkpu tak ha ama ani zei,”
ati na amasanga.
Hankēng ruti pēk chu khēnga aphūm suale alāka Simon anāi pasal Iskariot Juda kōma apēka.
27 Isuan hava ruti apēk suale soitān chu asūnga avalūt pe lena.
Hasik han Isuan akōma:
“Nei thō rang chu anrarapa thō ta ro,”
ati pe na.
28 Tenchu ruti asāka ei ansutpui ngāiin hava ha hong ei ti na mo ati na tutēn riat thei u mak.
29 Senkhatin:
“Juda hān sum anvana marsa ei dōn sika,
Isuan pāntana amang rang nei nāng ei vamanchōk nīnti.
Hano ten,
anriang ngāi kōma hongte mo vape ro ei ti nīnti,”
ati na amandon u na.
30 Hatuka Juda chu ruti pēk alāk suale anrarapa asuak lena.
Hava han zān azīng zeia.
Peterin Isua ei la maniang rang
31 Hatuka ama asuaka asē suale Isuan:
“Koi Miring Nāi Pasal hi atun chu Pathianin ei na manlian ani zei.
Pathian um ka tak chunga anliana om zei.
32 Pathian chu ka tak chunga anliana a om ten Pathian um ka bibila han ka chunga anliana ei om kēng.
Hasika han anrapa na manlian inti.
33 Ka nāi ngāi,
hun alakte na kār u na la om ka ti.
Jihudi ngāi kōma kei ti anga:
‘Nangnīn na rok u na ti,
tenchu kei sē na chu nangni ngāi sē thei u nō ta ni,’
kei ti.
Atun um na kōm u na hava ang dēna kei ti rēt.
34 Na kōm u na chongpēk āthar ka na pēk u.
Nangni le nangni ngāi andit u ro.
Koiin kei na dit u anga nangnīm andit u ro.
35 Nangni le nangni ngāi āndit na ni u ten,
mi dōrān nangni hi ka zolāi na ni u ti hi riat unti,”
ati na.
36 Simon Peterin akōma:
“Puma,
hon tiang mo nei sē rang?”
ati na.
Isuan akōma:
“Kei sē na rang atun nangin na la zī thei nō ta ni.
Tenchu nangkana na la zī thei na ti,”
ati na amasanga.
37 Peterin akōma:
“Puma,
ichang mo atun le kei na zī thei nōk rang?
Nang na sika kei damna ngal ka phal ngam,”
ati na.
38 Isuan akōma:
“Koi ka sika nei damna hi phal ngam tatakin mo?
Taktaka,
kei na til ani zei,
ār akhuang mān voi anthum nei na la maniang rang,”
ati na.