Isuan aninga rang bōr azong
17
1 Isuan hiva chong ngāi hi aril suale chungvān tiang atanga:
“Ka Pa ahun honga suak zei.
Na Nāi Pasal hi manlian ta ro.
Na Nāi Pasalin um nang ei na manlian theina rang.
2 Asik chu aloma miring dōra chunga ningneina nei na pēk anga hin,
ka kōma nei na pēk ngāi dōra chunga tāituan damna kei pēk theina rang.
3 Hiva hi tāituan damna ani zei.
Nang rong hi kēng Pathian Diktak le nangin nei tīr Isua Krista āriat hi.
4 Nangin sin athō ranga nei na pēk chu ka thō sua zei.
Maniapūra hin nang kei na manlian ani zei.
5 O Ka Pa,
maniapūr a om māna na kōma anlianna kei man le dēn han atun hin um nang na bil ngēta na manlian ro.
Isuan azolāi ngāi
rang bōr azong
6 Nangin maniapūra mi nei na pēk ngāi kōma na raming ka manlang zei.
Amāni ngāi ha nang na ta,
nangin ka kōma nei na pēk.
Amānīn nang na chong ei tel u ani na.
7 Nangin aloma nei na pēk ngāi dōra hi nang na kōm āta āsuak kēng ti hi atun chu ariat u zeia.
8 Asik chu nangin chong nei na pēk ngāi dōra amāni kōma kei pēk rēt.
Hatuka chu amānīn hava ngāi ha apom u na,
koi hi nang na kōm āta āsuak ka ni ti adiktaka ariat u zei.
Hanūk chu nangin nei na tīr ti hām aiam u zei.
9 Amāni ranga bōr kei zong,
maniapūr mi ranga zong makung.
Nangin nei na pēk ngāi rang kēng kei zong asik chu amāni ngāi ha nang na ta ani na.
10 Hanūk chu ka ta dōra chu nang na ta kiar ani na,
na ta dōra chu ka ta kiar ani na.
Amāni tak chunga hin anliana kei om ani na.
11 Koi chu maniapūra om lāi nō ning.
Amāni chu maniapūra la om unti,
koi chu na kōm ahong rēt rang ka ni zei.
Ka Pa Ānthiang,
nangin nei na pēk ngāi ha na ramingle rung ro.
Koini angkhat nei ni anga amānīm angkhat ei ni thei u na ranga.
12 Amāni kōma maniapūra ka om lāi hin na ramingle kei rung u.
Nangin nei na pēk ngāi chu ka rungtit u na.
Angkhatte ngal pei anchang u mak.
Tenchu ānpei ranga nāi rong nōk chu.
Asik chu Pathian Lekhabūna ānziak ei kip theina ranga ani na.
13 Hanum nisela atun chu na kōma āhong rang ka ni zei.
Ka rāisānna amāni kōma ei bit theina ranga maniapūra hiva chong ngāi hi kei ril.
14 Nang na chong ngāi chu akōm u na kei pēk.
Hatuka amāni chu maniapūr mīn amumāk u na.
Asik chu koi maniapūra
mi kei ni nōk anga amānīm maniapūra mi ni u mak.
15 Nangin amāni ngāi ha maniapūr āta ātuang ranga na zong makung.
Tenchu āsia nāta anzōk ranga kēng kei na zong.
16 Maniapūr mi kei ni nōk anga amānīm maniapūr mi ni u mak.
17 Amāni ngāi na chongtak lehan manthiang ro.
Na chong hi chongtak ani na.
18 Nangin maniapūra nei na tīr anga,
koiin um amāni hi maniapūra kei tīr u.
19 Hanūk chu amāni ngāi ranga ānthianga kei ankhāia kei om ani na.
Amānīm chongtak lehan anthiang vanga ei om thei u na ranga.
Isuan aloma aiam
ngāi rang bōr azong
20 Hiva ngāi rang ronga ni mak kei zong,
tenchu amāni achong ril u sika koi ana la iam ngāi rang um kei zong.
21 Alom u na pumkhat ei ni thei u na ranga.
Ka Pa,
nang koia nei om,
koi nanga kei om anga hin amānīm koinia hin pumkhata ei om thei u na ranga.
Nangin nei na tīr ti maniapūr mīn ei iam theina ranga.
22 Hanūk chu nangin anlianna nei na pēk ha,
amāni kōmām kei pēk.
Koini angkhat nei ni anga amānīm angkhat ei ni thei u na ranga.
23 Koi amāni kōma kei om,
nang koi ka kōma nei om.
Havantin anga pumkhata ei om u na,
ei anzui thei u na rang.
Hanūk chu nangin nei na tīr ti le nei na dit anga amānīm nangin nei madit ti maniapūr mīn ei riat theina ranga.
24 Ka Pa,
nangin nei na pēk ngāi hi kei omna taka ka kōma ei om u rang hi kei zōt ani na.
Nangin anlianna nei na pēk ha ei mu thei u na ranga.
Asik chu maniapūr na manding mān āta nei na madit ani na.
25 Ka Pa Diktak,
maniapūr mīn nang chu na riat mak,
koin chu ka na riat.
Hiva ka zolāi ngāi um nangin nei na tīr ti ariat u zeia.
26 Hatuka na raming chu amāni kōma kei manriat,
kei la manriat riam rang ala ni.
Nangin nei na ditna anditna ha amāni kōma ei om theina ranga.
Hanūk chu koi um amāni kōma kei om theina rang,”
ati na.