Bethesda tīndīla āna
khat Isuan amandam
5
1 Hava suale Jihudi ngāi pānta khat a om a,
Isua chu Jerusalem khopuia asēna.
2 Hatuka Jerusalem khopui han Bera Suakkhār kōla tīndīl khat a om.
Hava raming ha Hebrai chonga Bethesda ati u na.
Asik chu hava han dāmsāl rangā a om ani na.
3 Hava han āna ngāi,
mit achō ngāi,
kekhor ngāi le āzeng ngāi mipui ātampa ei manzāl u chachakna ani na.
Hava ngāi ha tīnsok angāk chachak ani u na.
4 Hohon mo Puma vānpalāi khat tīndīla ahong achuma tī ahong sok chachaka.
Hava taka han tu mo angkhat pei tīnsok lāi taka āchum mānsa tak ha ei natna dōr āta ei dam pe chachak ani na.
5 Hava muna han kum sōm anthum le kum ariat peia āna khat a om a.
6 Isuan hava han ei zāl amu na hanūk chu nikhua sōtpa ei om ani zei ti ariata,
akōma:
“Adam rang na zōt mo?”
ati na arakela.
7 Ānapu hān amasanga:
“Ka pu,
tīnsok lāi taka tīndīla anānsum rang mi ei bui sik ka sē kakār mīn ana lei khēl rēt chachak,”
ati na.
ha anlāiseka adama amunpha adianga kal achōia asēna.
Hava nikhua ha Jihudi
ngāi pōngansa nikhua ani na.
10 Hasika han Jihudi ngāi hān ādampu ranga:
“Avian hin pōngansa nikhua ani na,
na munpha adianga kal achōi hi dānin ei phal ni mak,”
ati u na.
11 Tenchu amān akōm u na amasanga:
“Anāndampu ngēt hān:
‘Na munpha adianga kal achōia sē ro,’
ei na ti,”
ati na.
12 Amāni hān akōma:
“ ‘Na munpha adianga kal chōi ro,’
anatipu ha tu mo?”
ati na arakel
u na.
13 Tenchu ādampu hān ama chu tu mo ti ha riat mak.
Hava han mi tampa ei om sika Isua chu maruka asuak viaka.
14 Hava suale Isuan ama ha Pathian biak ina avamu na,
akōma:
“En ro,
adam kēng na ni zei,
hasik han āsia thō lāi nō ro.
Hano ten na chunga āsa nōk suak riam inti,”
ati pe na.
15 Hatuka ama chu asēna Jihudi ngāi kōma:
“Ama āndampu chu Isua kēng ani zei,”
ati na avarila.
Pathian Nāi Pasal
Isua kōma damna
16 Hasika han Jihudi ngāi hān Isua ansinsaka āthat rang ten peia arok u na.
Asik chu pōngansa nikhuana hava ngāi ha ei thō sika ani na.
17 Tenchu Isuan akōm u na amasanga:
“Atun ten peia ka Pa chu sin ei la thō chian sika koi um sin kei la thō kēng,”
ati na.
18 Hasika han Jihudi ngāi hān āthat ranga arok riam u na.
Asik chu pōngansa nikhua rong ni lāi mak ei masiat tenchu Pathian ha kēng a Pa ei manchanga,
aninga Pathian le anrual anga ei ānbe
ani zei.
19 Isuan akōm u na:
“Taktaka,
kei na ril ani u zei,
Pa asin thō kei mu nōk chu Nāi Pasalin ka theia itē kei thō om mak,
Pain sin ei thō anga koi,
Nāi Pasalin um havan tin dēn kei thō.
20 Pain Nāi Pasal ei madita aloma asin thō dōra ei na man mu.
Hava ngāi nēka sin ālian na la man mu inti,
nangni na boi ei dong thei u na ranga.
21 Pain āthi ngāi ei mathuia damna ei pēk anga,
koi Nāi Pasal um kei zōt tak kōma damna kei pēk.
22 Pain tutē rui ril mak tenchu aloma ruirilna dōra chu koi Nāi Pasal kōma ei na pēk kēng.
23 Mi tinin Pa lalchi ei thō u anga koi,
Nāi Pasal um lalchi ei na thōthei u na ranga hava ha ei na pēk.
Tukareng koi Nāi Pasal lalchi na thō lui chu,
ana honga tīrpu Pa hām lalchi thō lui kēng.
24 Taktaka,
kei na ril ani u zei,
tukareng ka chong ānngāia koi ana tīrpu a iam tak chu tāituan damna aman zei.
Ruirilnana om lāi nō ni,
tenchu thīna nāta damna na ānkān kēng ani zei.
25 Taktaka,
kei na ril ani u zei,
hun ahong atung rang ani zei,
atun um honga tung sua kēng ani zei.
Hava hun tika chu āthi ngāiin koi Pathian Nāi Pasal ka rōl hi riat unti,
hatuka arōl āriat tak chu dam inti.
26 Pain akōma damna racham ei nei anga,
koi Nāi Pasal um ka kōma damna racham anei ranga ei na pēk.
27 Hatuka koi,
Miring Nāi Pasal kei ni sika hin ka kōma ruirilna azēk ranga ningneina ei na pēk.
28 Hava ha na boi mandong u nō ro,
asik chu ahun honga suak rang ani zei,
hava hun tika chu thān khura om ngāi dōra ka rōl riat unti.
29 Hong suak untia,
sin āsa thō ngāi chu damna āchang ranga anthui rēt unti,
āsia thō ngāi chu āsia ānlō ranga anthui rēt unti.
30 Koi ka ninga itē kei thō om mak,
kuara kei riat anga rui kei ril,
hasik han ka ruirilna chu ādik ani na.
Kei zōt anrok hi ni mak tenchu,
Pa ana honga tīrpu ei zōt anrok hi kēng kei zōt,”
ati na.
Isua ruia ariatpui ngāi
31 Hatuka:
“Ka ninga kei riatpui aniten,
kei riatpuina ha ādik ni lāi mak.
32 Ka ninga rui anariatpui chu mi tei rēt khat ani na.
Amān ka ruia ei na riatpuina ha,
hava ei na riatpuina ha chu ādik ani ti ka riata.
33 Nangnīn Johan akōma mi na tīr u na,
amān chongtak
ruia alei anriatpu alei changa.
34 Tenchu koin miring kōm āta anariatpui hi man makunga,
tenchu nangnīn sandamna nei man thei u na ranga hiva chong ngāi hi kei na ril u kēng.
35 Hava Johan ha lēm āchuanga a-ēl zuak ha ani na,
ama ra-ānga hun alakte rāi ānsān rang nei zōt u.
36 Tenchu koi ka ruia anariatpui hi Johan aruia āriatpui nēka ālian kēng.
Pain sin āzui ranga ei na pēk,
ka sin thō ngāi ngēt hān Pain ei na tīr ti hi anariatpui ani na.
37 Hatuka Pa,
ana tīrpu hān ka rui anānriatpui ani na.
Nangnīn chu arōl ngal la re u ngāi mak che,
amēl um la mu u ngāi mak che na.
38 Ama ahong atīrpu nei iam u nōk sika,
ama achong um na malung u
na ei om chian nōk ani zei.
39 Pathian Lekhana chong chu hava han tāituan damna a om nei iam u sika han asa dima nei thūn u chachak.
Hava Pathian Lekha tak ha ka rui anānriatpu ani zei.
40 Tenchu damna nei man thei u na ranga ka kōma hong zōt u mak che.
41 Miring āta anpākna pom makung.
42 Tenchu na sūng u na Pathian anditna dōn u mak che ti ka na riat u.
43 Ka Pa raminga kei hong ani na,
nangnīn na lei pom u mak che na,
mi tei khat ama aninga raminga hong sela chu na lei pom u rang nīnti.
44 Nangni le nangni nei ānpāk u chachaka hin,
hontin mo nei iam u thei rang?
Pathian āta rong āsuak anpākna chu ārok u mak che na.
45 Koiin Pa kōma āsia na man tung u ka ting ti mandon u nō ro,
āsia anān tung u rang chu angkhat a om,
ama ha nangnīn nei anngampui u Mosi ha ani na.
46 Mosi na iam u ten koi um nei na iam u rang ani na,
asik chu amān koi ka rui kēng ei maziak.
47 Tenchu ama ei maziak ngāi ngal na iam u nōk ten hontin mo ka chong ngāi nei iam thei u rang?”
ati na.