Isua krosa ranga rui achat
19
1 Hasika han kēng Pilatin Isua aruaia nganu ramoi lehan avamanzēm sabaka.
2 Hatuka sipai ngāiin raling lukhum aphan u na aluna ei mankhum u.
Hanūk chu puan senaduk um aman sil u na.
3 Hatuka akōla ahong u na:
“Chibai,
Jihudi ngāi Rēng!”
ati u na.
Hanūk chu akutle ei abēn u ani na.
4 Pilat chu athara avasuak rēta akōm u na:
“En u ta,
ama ei siatna itē mu makung ti nei riat thei u na ranga na kōm u na kei hong suakpui kēng,”
ati na.
5 Hatuka Isua chu raling lukhum le puan senaduk ansila ahong asuaka.
Pilatin akōm u na:
“Hi hile hava miring ha,
hong en u ta ro,”
ati na.
6 Chāizūng ulian ngāi le mi sūr ngāiin amu u le ankhēk u na:
“Krosa tār ro!
Krosa tār ro!”
ati
u na.
Pilatin akōm u na:
“Nangni ngalin ruai u tānla krosa vatār u ro.
Koi chu ama ei siatna itē mu makung,”
ati na.
7 Jihudi ngāiin amasanga:
“Koinīn Dānbu khat na dōna,
hatuka hava Dānbu anga Pathian Nāi ka ni ei anti sika ama chu athat ngēt rua ani,”
ati u na.
8 Pilatin hava chong vāng chu ariat āta āchi riam zeia.
9 Hatuka Pretoriam inpuia avalūt rēta Isua kōma:
“Hovana mi mo na ni?”
ati na.
Tenchu Isuan masang mak.
10 Hankēng Pilatin akōma:
“Ka kōma chong nō ta ni mo?
Nang anān zōk theina ranga ningneina dōn ka ni ti le krosa ana tār theina ranga ningneina dōn ka ni ti hi riat mak che mo?”
ati na.
11 Isuan amasanga:
“Chung tiang āta na kōma ningneina anpēk na ni nōk ten ka chunga itē ningneina dōn mak che.
Hasika han na kuta anān betōkpu masial hi ālian uala,”
ati na.
12 Hatuka hava hun len āta Pilatin Isua chu anzōkna rang apūta.
Tenchu Jihudi ngāi ankhēk u na:
“Hiva mi hi na mazōk anten Kaisar atianga mi ni mak che.
Tukareng aninga rēng ānti tak chu Kaisar ādui kēng ei chang,”
ati u na.
13 Pilatin hava chong ariatle Isua chu ahong asuakpuia.
Hatuka ruirilna sutmun,
mīn “Lung andāp mun” ei ti u na mun han avānsuta.
Hebrai chonga hava araming ha Gabbatha ati u na.
14 Hava nikhua ha Zōkna pānta ranga alei Ansinna nikhua ani na.
Sūn dār aruk dāma Pilatin Jihudi ngāi kōma:
“En u ta ro,
hi hile nangni na rēng u,”
ati na avasuakpuia.
15 Tenchu amāni hān ankhēk u na:
“Ama chu masuak ro!
Ama chu masuak ro!
Ama chu Krosa tār ro!”
ati u na.
Pilatin akōm u na:
“Na rēng u chu krosa mo kei na tār pe u rang?”
ati na.
Chāizūng ulian ngāiin amasanga:
“Koinīn Kaisar nōk chu rēng atei dōn mak me,”
ati
u na.
16 Hatuka krosa ei tār u ranga Pilatin Isua chu amāni kuta abetōka.
Isua krosa antār
Hatuka Isua chu sipai ngāiin alāk u na ei ruai ani u zeia.
17 Ama chu akros anputa mīn “Luru Mun” ei ti u mun han avasuakpui u na.
Hava ha Hebrai chonga Golgotha ati u na.
18 Hava han ama chu krosa atār u na.
Ama bila atei anni ngāi hin tiang khat hin tiang khat atār u na.
Isua chu alāi taka antāra.
19 Hatuka chu Pilatin lekha tār rua khat amaziaka kros chunga atāra.
Hava ha hintin hin amaziaka:
“NAZARETA ISUA,
JIHUDI NGĀI RĀNG,”
ati na.
20 Isua krosa ei tār u na mun ha khopui adēp ei ni sika Jihudi ngāi bila mi tamtakin hava lekha antār ha apore u na.
Hava ha Hebrai chonga,
Grik chonga le Rom chonga ānziak ani na.
21 Hasika han Jihudi chāizūng ulian ngāiin Pilat kōma:
“Jihudi ngāi Rēng,
ati na maziak nō ro.
Tenchu ‘Jihudi ngāi Rēng kēng ka ni ei anti’ ati na maziak ro,”
ati u na.
22 Pilatin amasanga:
“Kei maziak sua chu kei maziak len ani zei,”
ati na.
23 Sipai ngāiin Isua krosa atār sua u le apuan rasil ha alāk u na bong manli aman chang u na sipai ngāiin bong khat seng achang chip u na.
Akultāi anchual um alāk u na.
Hava kultāi ha anchī lui,
arīngbok len āta aloma ankhōng ani na.
24 Hasika han amāni le amāni achong u na:
“Thēt u nō rei.
Tenchu tu ta rang mo achuk,
Ravān enna ranga lekha
kei u rei,”
ati u na.
Pathian Lekhabūna chong anga:
“Ka puan rasil chu amāni ngāi
kāra ansem u na.
Ka kultāi anchual um ravān
enna ranga lekha akei u na,”
(Sām 22:18 )
ti ānziak ani na.
Hiva hi Pathian Lekhabūna ānziak anga ei kip theina rang ani na.
Hava ang taka sipai ngāiin hava ha athō
u na.
25 Hatuka chu Isua kros kōla han anu andinga.
Hanūk chu anu zuarpui le Klopa nungāk Mari hanūk rēt chu Magdalini Mari ngāi um anding u na.
26 Hankēng Isuan anu le azolāi madit ha akōla anding u na amu na.
Anu kōma:
“Nupang,
enta,
so sole na nāi pasal,”
ati na.
27 Hatuka Isuan azolāi kōma:
“Enta,
so sole na nu,”
ati na.
Hasika han hava ahun tak len āta ama chu hava zolāi hān a ina aruaia.
Isua athi
28 Hava suale Isuan alom peia atun chu ākip zit rang ani zei ti ariata.
Pathian Lekhabūna ānziak anga ei kip theina ranga:
“Ka tī anrāl ba,”
ati na.
29 Hava han zu athūr bēl ābit khat ansiak a om a.
Hatuka chu zu thūra ānchia isponz ha husop kuanga amakhop u na,
amūra ei vasiak pe u.
30 Hatuka Isuan zu thūr ha atem suale:
“Anzui zei,”
ati na.
Hatuka alu asuk ei makhāia arang ei chat ani na.
31 Hava nikhua ha Jihudi ngāi pōngansa nikhua ranga alei ansinna nikhua ani na.
Hanūk chu hava pōngansa nikhua ha nikhua lian khīt ani na.
Hasika han,
pōngansa nikhuana ruak ngāi chu krosa ei om chian nōkna ranga Jihudi ngāiin Pilat akōma avazong u na.
Hanūk chu krosa āntār ngāi ke akhiak sua u le ruak ansum ranga avazong u na.
32 Hasika han sipai ngāi chu ahong u na Isua bila krosa āntār ngāi bila mānsapu ake akhiak pe u na hava suale atei khat ake hām akhiak pe rēt u na.
33 Tenchu Isua kōla ahong u le chu āthi sua kēng ani zei ti amu u na,
ake khiak pe u lāi mak.
34 Hanum nisela,
sipai ngāi bila angkhatin seipēr le akāng avit pe na thisen le tī ahong asuak zut lena.
35 Koi āmupu ngēt hīn āriatpui chong kei ril ani na.
Hatuka koiin hava kei riatpuina ha ādik ani na.
Asik chu koiin kei ril hi chongtak kēng kei ril ti hi ka riata.
Nangnīm nei iam thei u na ranga koiin hiva kei riatpuina chong hi kei ril kēng.
36 Pathian Lekhabūna ānziak:
“Ama aru ngāi chu angkhat
ngal akiaka om nō ni”
ti chong hi ei hong kip theina ranga hiva ngāi hi ei hong om ani na.
37 Hanūk chu Pathian Lekhabu khat rēta:
“Amānīn ei vit u ngēt ha la
mu unti,”
(Zek.12:10 )
ati na anziak ani na.
Isua anphūm
38 Hatuka chu hava ngāi suale Arimathāi khuana mi Joseph hān Isua ruak achōi ranga Pilat akōma avazonga.
Hatuka Pilatin alei phala.
Hasika han asēna Isua ruak chu avalāka.
Joseph hi Isua zolāi ani na,
tenchu Jihudi ngāi ei chi sika anthupa om ani na.
39 Hatuka Nikodem um asēna.
Ama hi zāna Isua kōma āhong mānsa ha ani na.
Ama hān marim ahui khat mura le aloe marim ahui le anpol kilogram sōm anthum rangā zotor ahong chōia.
40 Hatuka Isua aruak chu achōi u na Jihudi ngāi anphūm dān anga marim ahui lehan puan annēm le athuam u na.
41 Hava krosa ei tār u na mun kōla han rahuan khat a om a.
Hava rahuana han tutē lān siakna ngāi lui thān khur athar khat a om a.
42 Hasika han hava nikhua ha Jihudi ngāi Ansinna nikhua ei ni sika le thān khur um anāite ei ni sika Isua chu hava han avasiak u na.