8
Yesus no keng go kabung
1 Ku kua luik gono yakena-yakena sono, deguo teguop nguok so Yesus gemang klong. Deguo teguop, nemot go seni: Woy Wali Iram tamlak go blongdon duduing lelemoy go. Andua 12 yam so kuoy go ey Yesus gemang koklong. 2-3 Kabung-kabung gemang keng dali. Kabung-kabung ngga sik sogo naliwabu yat go sadui naklay Yesus lo mo suey. Yangga,
- yakena Makdala sik sogo Maria,
nemot ba sik sogo naliwabu piam go 7 yam so mo yat;
- Kusa go senun Yohana.
Kusa ngge gubernul Herodes go taut yay so susuing go;
- Susana.
Kabung nangglik ngga, Yesus no keng dali go. No, mata dega so kabung temu gemang keng dali. Yesus ey Nemot andua-andua eygo wali nang sogo, nemotnang go taut ey drang eygo lo gemang tetaling.
Didon so bubluim go sedue
4 Yakena-yakena naklay sik sogo sikabung mata so Yesus mit no gemang pluep lak. Ngga ey nemotnang no ngge kalik benuey Yesus lo gemang pen-anawon, 5 “Ku meno so, sedue klaya usu no didon bluim so gemang nawon. Didon bluim-siton go, temu tap ketang no gemang net. Sikabung uwet go masi lo nedik, wi pling go wet golo didon ngga yam so ne dam! 6 Nan demu eygo blo no didon temu gemang pui. Kedaso tip pung go maning kua walong, nan ba no srang kua degut go nogo tandali yam so sak-anatun. 7 Didon temu, teganwong-diding ba no net go tete, wong diding ey kerlam so gemang pung. No, keda so teganwong diding-a walong go, didon tip-a yangu so yeyangu gemang kebong. 8 Nan suey go blo sono didon temu gemang bluim dali. Tip pung go, walong gono mata dega so gemang seni, da 100 yam so gemang tagot-anatun.”
Yam so nebut benuey ngga pen gono, don ey Yesus lo pu go, “Kama nando gemang go benuey ngga go seni tup go, suey so se senong!”
9 Nggano, Yesus sono andua-andua lo gemang usi, “Nebut benuey ngga go seni sogo kalik? Atnang maning kua senong go.” 10 Way so Yesus lo pu go, “Woy Wali Iram tamlak go blongdon duduing, senong ngga, motnang nogo mo iti. No, nebut benuey seguong so sikabung ibe nogo Genam gabe ngunguok. Seni so, nemot-a nemotnang mea ikum, no, yakua senong. Nemot-a nemotnang mea tup, no, yakua keng. Ngga tang so, nebut benuey so genam lo gabe pepen. a 11 Nebut benuey ngga go seni ngge kalik gabe: didon ngga, Ki Walinebut. 12 Tap ketang no pui go didon ngga, banim tup go keng go, tandali nega go sikabung gemang. Yang, Ki Walinebut nemot-a tup go, Genam no dabui iti go keng golo sesuoy genaning so, tandali Ki Walinebut Kupiamgo pung go gemang lek. 13 Sip demu eygo no pui go ngga, senang so waysagi ey kua mlak go kekeng go sikabung. Yang, nemot-a yakay ey Ki Walinebut tup go, kunala-kunala meno lo keda so gemang lek. Nemotnang ngga nan ba sono srang kua degut go di kalik gemang sak. Koywong iseng pung golo, keda so mea nega. 14 Wongdiding ba no net go tete ngga, Ki Walinebut nemot-a tup-nenawon go, no wali genang kunala, taut kunala, kukunan blo yakay kunala lo pok go, nemot go wali seni kua tagot. 15 Nan suey gono bluim go ngga, Ki Walinebut dabui lo tup go, suey so waysagi ey mlak go keng go sikabung. Miam dega ey seni nemotnang gemang tagot.”
Tupduk so Yesus no kekeng go
16 “Se senong dali! Sruabon logo pelita neblong eygo ya kebet? Sip srek masi ba no ya kong? Ngga, sikabung logo, yakua semu! Pelita neblong eygo, blo sono se kong! Neblong ngganemot sikabung meno degut golo ikum sogo. 17 Sogo-sogo kok go gigit, dia sono neblong lo plet-lak go, naklay mea senong. 18 Anduasiyap! Ki Walinebut suey so tupduk go motnang lo se mlak. Se senong: nando lo waysagi ey mlak go kekeng go, nemot nogo seni miam ey mea tagot. No, waysagi ey kua mlak go-a, sogo so nemot lo gemang go, mea nega-sing.”
Yesus go unen ey satyap eygo
19 Sikabung ibe ey nebut so Yesus maning pen-tenawon gono, unen ey ntatonyap ey, Yesus tegu so gemang weng-lak. No, sikabung miam dega go nogo, tegu genang yakua. 20 Ngga ey, Yesus sono ngga sogo sikabung lo gemang we-netenawon, “Aya! Dia so mianang gemang. Mot ey nebutpen so uweng go.” 21 Way so ngge kalik Yesus lo gemang tenguo-nawon, “Ki Wali nebut-a nandonang lo tupduk so pupluok go, ngga Genam go mia ey satyap eygo gemang.”
Bu alui ey kayem ey Yesus lo bebat go
22 Ku meno no, bayi no Yesus klak go, andua-andua gemang keng dali. Yesus lo pu go, “Bu ngga idi sono ya klong go.” Ngga ey, gemang klong-lak. 23 Koklong go, bayi ba lo usene so Yesus-a gemang to-nawon. Ngga ey, beap blo sono kayem dega iti golo bayi ba sono bu ey gemang degut. Nggano pu bayi ya iwot-dak. 24 Yesus usene so srek go andua-andua lo gemang senglok-netenawon, “Aya klui! Aya klui, buong-a! Imot, beap alui lo kekenok go se!” Usene sik so Yesus buong go, nebit bebat-nawon go, kayem ey, beap alui ey gemang tebung-anatun. 25 Nemot go andua-andua no ngge kalik Yesus lo gemang pu-nawon, “Sogo temoy no, motnang dabui lo kua keng-keto?” No, beap alui tebung go ikum go, kuikui go way-way so gemang pen-netenawon, “Nemot ngge, nando? Bebat-won gono, bu yalui ey, kayem ey nemot no gemang tupduk.”
Nan Gerasa sedue naliwabu sik so plet-dak go
26 Nggano, andua-andua ey Yesus bayi lo koklong go, nan Gerasa no, nan Galilea nemudi so gemang uneng-nenawon. 27 Metuik sono klak gono, yakena sik sogo, naliwabu lo degut go sedue, Yesus sono tap lo gemang kap weng. Seni so, ku nago yam so, amka kua goso sedue ngga wet go. Yap ba nogo kua suing, demuput ba lo, simu blo lo banom srek klong. 28 Yesus ikum gono kayang ey gemang klik-nawon. Ngga ey, Yesus go masi ba sono kenuon go ngge kalik don ey gemang pu-nawon, “Yesus! Ki Wali Mani Iram go Danon Mot gabe! Sogo so, genam ey Mot weng go tegu? Iseng eygo genam nogo kua taling!” 29 Yang, ngga kalik pu-nawon go, nemot ba sik so naliwabu yat genang so Yesus lo mo duing. Se senong: ku walong so naliwabu go don lo nemot mo dok. Kuno-woyno, suey so suing genang so, tamasi tegan yakena sikabung lo gemang dodok. No, tegan ngga nemot lo daklaya-daklaya gemang ibot. Ngga ey, sikabung kua go sip sono naliwabu lo gemang lelek. 30 Nggano, nemot ba sogo naliwabu sono Yesus lo gemang usi-nawon, “Mot go sui nando?” Ngga ey, nemot lo pu go, “Genam go sui: Miam eygo!” Yang! Sedue ngga, naliwabu mata sogo lo degut go. 31 Nggano, Yesus no ngge kalik naliwabu lo gemang pu, “Day kangok go ba sono atnang mot go kua klong!”
32 Yang, sip ngganemot sogo, meduim tablang lo nebo b mata so, ten so uwet-netenawon. Nebo ikum go, Yesus sono naliwabu lo gemang pu-nenawon, “Yesus! Ngge suey! Nebo ngga ba sono atnang degut so.” Ngga ey, Yesus lo pu go, “Se klong!” 33 Nggano, sedue ngga ba sik sogo naliwabu pluep go, nebo daley kangok go ba sono gemang degut-lak. Ngganemot no, meduim tablang blo sik so nebo nsrung-nsrung ey kuek go, bu ba sono degut-lak. Nebo betui klaya naklay, bu lo nasup go, se leguot-anatun. 34 Tasam ngga ikum go, suali so nebo yay sogo sedue kuek-nebiwon go, yakena-yakena sikabung no nebut ngge naklay gemang pen-nesiwon.
35 Tasam ngga lemoy go iway sikabung tup go, ikum sogo so Yesus mit no gemang kuek-nekunuon. Yesus mit no pung go gemang ikum-nenawon, “Seni so, sedue yane ba sik sogo naliwabu yat go mo pluep-lak! Nemot seni so mo suey. Amka kok go, kunala suey Yesus ey klay goso got-kletenawon.” Ngga naklay ikum gono, suali kangok so nemotnang gemang tra-nenawon. 36 Sedue yane ba sik sogo naliwabu yat go kua ikum go sikabung no nemotnang tang so ikum go gemang pen. 37 Ngga ey, Gerasa sikabung naklay, suali kangok so tra goso, suey so Yesus no, gemang we-nenawon, “Ngge sik sogo Mot se klong!” Nebut ngga tup gono, tandali klong genang so, bayi no Yesus gemang klak. 38-39 Nggano, sedue mo suey go ngganemot lo Yesus no pu go, “Mot ey genam ya keng go!” No, Yesus lo tenguo go, “Kua! Yap no mot se klong! Nggano mot no Ki Wali Iram lo pluok go tasam-a, naklay se pen.”
Ngga ey, sedue mo suey go ngga, Yesus go nebut no keng go yakena sono gemang klong. Nggano, nemot ba sik so naliwabu Yesus lo yat go, nemot naklay mo pali go ngga, yakena seding sik so seding no gemang pen-asiwon.
Kebong nogo sadui nogo Yesus wengkabui gabe
40 Nan Gerasa sik so, tandali Galilea no bayi lo Yesus weng go nogo, sikabung mata so Yesus so bubung. Pung gono yakay ey Yesus gemang wawi-nenawon. 41-42 Ngga ey sedue meno, nemot go sui, Yairus. Sedue ngge, Yahudi go dewi yap sogo wengkabui meno. Yesus mit no pung gono, masi ba no unuik go, gemang pu-tenawon, “Aya! Genam go yap no namboy se weng!” Se senong: duo kabung denok klaya go, yagui 12 yam nogo, sadui kangok golo i go kebong sogo se!
No, Yesus koklong go, nsrung-nsrung ey sikabung gemang keng-lak. 43 Sikabung nesip ba lo kabung klaya gemang. Nemot kinsadui tra go yagui 12 yam so, duoy ey taut ey mata so sadui suey genang so dokter-dokter no nemot lo mo tega. No, sadui maning kua pali. 44 Taton lo pay gono, Yesus go amka sring no kabung ngganemot lo ta gemang tuing-natun. Tuing-natun go, kekayso nemot go sadui ey se kua-anatun! 45 Ngga ey, sikabung mata sogo no Yesus lo gemang usi, “Genam nogo nando lo tuing-won? Sikabung naklay gemang sayam.” Petrus lo gemang pu, “Aya! Sikabung nesip ba lo banto gono, gemang mo tuing. Sogo so teguopey usi-togoy?” 46 No, Yesus lo pu go, “Seni so, saysuk ba sik sogo don pung go, Genam tra-tu go se.” 47 Kabung ngga senong-natun go, “Genam lo tuing go, Yesus mo senong ba.” Suali tra-natun go, bobong ey weng go, Yesus go masi ba no gemang unuik. Ngga ey, ibe sono gemang pen-anatun, “Seni so, Yesus go amka no genam lo tuing-tu go. Nggeasui go, genam go kinsadui naklay mo tong.” 48 Nggano Yesus lo pu go, “Yang! Genam no dabui don ey klaya iti go keng go tang so debui mo sesuoy gabe! Nggeasui go ngengam yakay ey mot se klong!”
49 Ngga temu ey, Yairus go yap sik sogo, deguo weng go gemang pen, “Tebadali Aya klui usi go kua klong ey! Mot go duo mo ip-batun.” 50 Deguo ngga tup-nawon gono, Yairus no, ngge kalik Yesus lo gemang pu, “Suali kua tra! Mot go dabui-a klaya don ey iti go Genam sono keng go, mot go duo, mea Sesuoy!” 51 Yesus koklong go Yairus go yap no pung go, gemang pu-tebawon, “Yap ba nogo sikabung temu kua degut! No, Petrus, Yohanes, Yakobus, nglangin Yairus unen eygo seguong-a, mea degut.” 52 Sitemoy so uwawi go sikabung mata dega sogo lo ku ey waluk, uyagui so kukluo. Nemotnang sono Yesus lo gemang pu-nawon, “Motnang u kua kluo ya! Duo ngge usne so srek-tun go wa, kua kebong.” 53 No, nebleng seguo-a, Yesus lo pu go nebut sogo gemang betep-nenawon. Nemotnang senong go: duo ngge seni so mo kebong. 54 Nggano, yap ba no degut go, duo ngga go ta no Yesus lo mlak go gemang pu-nawon, “Debui, buong-a!” 55 Ngganemot no, nebuem nebit tandali pung go gemang buong-anatun. Nggano, Yesus lo pu go, “Ten nase iti!” 56 Tasam ngge ikum go Yairus, senun ey gemang kuikui. No, Yesus lo pu, “Sikabung meno, klaya duo nang nogo, ngge lemoy go kua pen!”