3
Ku Sabat no taleng go sedue Yesus lo pali go
1 Ku meno no Yahudi go dewi yap ba no Yesus gemang degut-nawon. Taleng go sedue klaya ngga ba so gemang. 2 Ngga ey, sedue-sedue Parisi gemang dali. Yesus degut goso, neyboy genang so, nemu ey gemang luik-netenawon: sogo kalik, Yesus logo ya semu-yon? Se duing: taleng go sedue ngge mo pali-won go, Ki Wali Iram go ku Sabat ku no, Musa logo demutrui Yesus lo mo kuklue. 3 No, taleng go sedue sono ngge kalik Yesus lo gemang pu, “Ngge sono, nesip ba no weng go pla ip-a!” 4 Nggano, ngge kalik sikabung ngga sogo no Yesus lo gemang usi, “Motnang go demu nogo Sabat ku nogo, sogo kalik go tasam-a, imot logo ya semu? Tasam suey go-a? Piam go-a? Sadui pali genang-a ya pluok? Sedue but go kebong genang-a ya?” No, sikabung ngga nebut kua tuot. 5 Sikabung go wengkabui demu tang so, dabuisagui ey dabui ba u kalik go ey nemu tong-siton go, taleng go sedue no gemang pu, “Ta walong so sra-a!” Nggano, sedue ngga go ta walong so sra-nawon go, kekayso gemang pali-anatun. 6 Sedue Parisi, ngga kalik ikum go, Yahudi go dewiyap itak go, dia sono gemang pluep-lak. Ngga ey, kekayso deguena Herodes no keng go sedue ey ta keduik go, Yesus but genang klay nebut gemang got-nenawon.
Yesus no sikabung mata so keng go
7 Ngga sik so pung gono, Nemot no keng go andua ey Galilea bu ketang sono gemang klong-lak. Ngga ey, Yesus no nan Galilea sik sogo sikabung miam dega ey gemang keng-lak dali. 8 Seni so nan-nan temu sik sogo sikabung mata so gemang pluep dali. Yangga: nan Yudea sik sogo, yakena Yerusalem sik sogo, nan Idumea sik sogo, bu Yordan woyklak idi sik sogo, nggano yakena-yakena Tirus ey Sidon eygo sik sogo, Yesus lo tasam pupluok go tup go tang so, nemotnang naklay pluep-lak go.
9-10 Nsrung-nsrung ey sikabung sadui sogo weng-lak tatui go, Nemot lo pali genang so. Ngganemot sogo so, andua-andua sono Yesus lo pu go, “Bayi meno ey Genam no dali se ikum! Sikabung lo sip kenok go, bayi blo sono Genam-a klak genang.”
11 Naliwabu lo degut go sikabung Yesus ikum go, Nemot go suongku no segabuem u-unuik, ngge kalik kayang ey Yesus sono gemang bebega, “Seni so, Ki Wali Danon Mot gabe!” 12 Ngga tup gono, don ey Yesus lo gemang bebat, “Ibe sono go, Genam Ki Wali Danon sogo kua begaklong!”
Deguo teguop penklong so Nemot go andua-andua mot-dak go
13-15 Ngga temu ey, meduim blo sono Yesus gemang klak. Ngga blo sono go, Nemot lo iwat go andua-andua-a gemang usi-sing. Ngga ey, Nemot go tamot-tamot so lemoy genang, sedue 12-a nemotnang sik sogo gemang kuoy-nawon. Ngge kalik Yesus lo gemang pu, “Genam no se keng-lak; Ki Wali Iram go deguo teguop se penklong; nggano, naliwabu go don seguoy genang gabe iti-situgu.” 16-17 Nemot no keng genang andua 12 kuoy go sui: Simon, Petrus so usi go; Sebedeus go danon namon Yakobus ey Yohanes ey. Nemotnamon so usi go: ‘Boanerges’. Nemot go seni: kukluim danon. 18 Nggano, Andreas; Pilipus; Bartolomeus; Matius; Tomas, Yakobus Alpeus go danon; Tadeus; Simon partay Selot a sik sogo; 19 nggano Yudas yakena Keriot sik sogo, Yesus klaytaduing go.
Yesus ey Kupiamgo ey
20 Ngganemot no, tandali Nemot suing go yap sono Yesus gemang klong. No, sikabung mata so Nemot mit no mo pluep dali. Ngganemot nogo, Nemot go andua-andua ey Yesus tendam, ku yakua.
21 Nemot logo tasam mata sogo ntatonnang tup-nenawon gono, Yesus wawi so gemang nenawon-lak. No, Yesus moysogo, don ey plong go nemotnang lo mea lek. Nemotnang lo duing go, “Yesus mo yane gabe!” 22 Ngga kalik go nebut, Musa logo demutrui so ngunguok go klui, Yerusalem sik so weng-lak golo, gemang pen dali, “Sedue ngge, Kupiam golo b gabe mo degut! Naliwabu don ngga lo gabe yat-ton!” 23 Ngga ey sikabung miam eygo usi gono, nebut benuey so gemang nguok. Yesus lo pu-nawon go, “Sogo kalik so naliwabu logo, naliwabu dali ya yat? 24 Iram klaya go blung, banom-banom so tegek go, blung ngga don eygo yakua suing. 25 Ngga kalik dali, yap tenglam klaya go, klay go nogo yakua suing go, mea suep-lak. 26 Ngganemot kalik dali, naliwabu gemang. Way-way so sagui-a pupluok golo, don suep-lak go mea nega-sing. 27 Yang! Kupiamgo don c senong genang, ngge-a se duing: don dega eygo sedue go yap no degut go, tebadali go taut wom yakua king. No, banim temu no don dega eygo, sedue ngga-a tamasi tegan lo se dok. Ngga ey, nemot go yap ba sogo taut degut go mea king.”
28-30 Yang! Sikabung nemotnang lo pu go, “Yesus lo pupluok go tasam ngge, Kupiamgo sik sogo don lo gabe.” Ngga tang so, nebut ngge Yesus lo gemang pen-awon, “Ngge suey so se senong: nago no, tasam piam go meno-meno naklay sikabung lo mo semu go, Ki Wali Iram wayang piam-piam ngga Ki Wali Iram logo mea suep. No, klaya ngge-a se senong: Ki Wali Waglo nogo nando lo wayang go, sedue ngga nogo suey senang so yakua pung.”
Yesus ntatonyap ey
31 Se ikum! Yesus go unen, ntatonnang ey gemang weng-lak go, dia so bung-netenawon. Nggano, sedue meno pu go klong go, Yesus wawi sogo so. 32 Woy ngganemot nogo, sikabung miam eygo Yesus ey susuing-lak go. Ngga ey nemotnang lo pu go, “Aya! Mot go mia ey kukunuyap ey Mot ey tegu so dia so ngga go!” 33 Ngga tup gono, way so ngge kalik Yesus lo gemang usi, “Genam go mia, nando? Nggano Genam go satyap, nando?” 34 Ngga ey sikabung mata so Nemot mit no susuing go sono, nemu yalap go gemang we-tenawon, “Sikabung ngge-a, Genam go mianang, nggano Genam go satyap gabe. 35 Se senong! Sikabung Ki Wali Iram go duduing no tupduk go keng go-a, seni so Genam go mianang, kabuisroyap, nggano kukunuyap gabe.”