2
Sedue yambi Yesus lo pali go
1 Ku kata yam so suing gono, tandali yakena Kapernaum no Yesus gemang pung. Yesus pung go nebut, keda seni so seding no-seding no, gemang pen-nesiwon, “Yesus mo weng! Yap ngge ba so gabe.” 2 Ngga ey, sikabung mata so gemang pluep-lak. Woy-banu pluep-nenawon golo seboy yam so kenok go, yatap blo nogo ey gemang ip dali. Deguo teguop-a nemotnang sono, Yesus lo gemang nguok-tenawon. 3 Deguo teguop so maning nguok gono, sedue yambi pat no tong go, Yesus sono andua namon-namon lo lek go gemang nekunuon. 4 No, kamso ikum go, yataput sikabung mata sogo lo mo luep ba! Ngga sogo so, yap bloda sono sedue yambi lek go gemang klak. Ngga ey, Yesus ip go sip blo no, bloda put tong go, pla-nebawon go, sipsrek ey sedue yambi ngga nemotnang tegan lo keduik go gemang rling. 5 Nemotnang dabui lo keng go ikum go tang so, sedue yambi sono ngge kalik Yesus lo gemang pu-nawon, “Dem! Mot go kuklue piam konkebamling mo suep gabe!”
6 Musa logo demutrui so ngunguok go klui-klui ngga sogo, Yesus lo pu go tup gono, ngge kalik dabui ba lo gemang duing, 7 “Ye! Nebut piam go, sedue ngge lo mo pu-siwon! Nemot suali kua go be! Ngga kalik pu golo Ki Wali Iram so wayang go! Sikabung go kuklue piam konkebamling Ki Wali Iram seguong logo-a mea suep.”
8 Nemotnang go kunala ngga, kekayso Yesus mo senong-nawon. Ngga ey, nemotnang no gemang pu-tenawon, “Ngga kalik go kunala dabui ba sogo so duing-ketogoy?” 9 Motnang se pen! Nago-a ide dega ey? Sogo kalik go-a Genam ya pu, “Mot go piam mo suep!” Kua go, “Mot ip go klong-a?” 10 No, nueya, At tang so mea taling. Motnang senong genang: kukunan ngge no weng go Blong Dem no, kuklue piam konkebamling suep genang don mo iti gabe. Nggano, sedue yambi sono Yesus lo pu go, 11 “Ip-a! Sip srek lek go, yap sono mot se klong.”
12 Se ikum! Kayseguong sedue yambi ngga ip go sipsrek lek go, dia sono pung go, woy-banu gemang ikum-nenawon. Tasam ngga ikum go sikabung mata sogo, ta wasrang gemang glok-nenawon. Ngga ey Ki Wali Iram sono iway ey, gemang iti-netenawon, “Ye! Ngge kalik lemoy go tasam, atnang maning kua ikum!”
Lewi keng genang so Yesus lo usi go
13 Yakena Kapernaum sik so, bu Galilea keteng sono koklong go, Yesus sono sikabung mata so gemang weng-lak. Ngga ey, walitap nemotnang no gemang nguok-tenawon. 14 Masi-masi so bu ngga lo naton gono, sedue meno blasteng yap so got-tenawon go gemang ikum. Yangga, Alpeus go danon, Lewi dem. Yesus lo pu go, “Genam no keng-a!” Yap ngga ba sik sogo kekayso Lewi dem ip-nawon go, Yesus sono se keng-nawon.
15 Ku meno no, tendam genang so Lewi go yap sono Yesus andua-andua ey Lewi lo gemang wawi. Se ikum! Blasteng so iyaluim go andua temu, nggano sikabung kuklue piam konkebamling eygo temu usi go gemang pluep-lak dali. Seni so, Yesus sono kuklue eygo sikabung miam ey gemang keng-lak. 16 No, esang! Sedue Parisi sik sogo Musa logo demutrui so nguok go klui-klui ngga ikum go, Yesus go andua-andua no gemang usi-netenawon, “Esang! Sogo kalik go-a, blasteng so iyaluim go ey, kuklue piam konkebamling sikabung eygo klay gono motnang go klui suing go ten ne dedam?” 17 Nebut ngga, Yesus tup gono, way ngge kalik gemang pen, “Se tup! Sadui ey go logo so, sadui susuey genang sedue usi go mea degut. Sadui kua go sedue logo mea kua wet. Ngga kalik dali: naklay dega go sikabung, wet genang so Genam kua weng. No, kuklue piam konkebamling ba sogo sikabung wet go wawi genang so, Genam weng go gabe.”
Genuing tenday susuing go
18 Se senong: sedue Parisi ey, Yohanes Busotuigo go andua-andua ey, nemotnang go dalikalik, tenday genuing so got-neton go. Ku meno no Yesus sono weng go, sikabung temu lo gemang usi, “Sogo temoy no, Yohanes no keng go andua-andua ey, sedue Parisi eygo-a tenday go genuing susuing. No, Mot no keng go andua-andua tenday go genuing kua suing ne?” 19 Ngga ey, way so ngge kalik Yesus lo gemang pu-nawon, “Yatrang ngge no se duing: sedue no, kabung dok genang walop so pluep go, yakay ey, ten-a dedam, bu-a dedrop, tenday go suing genang yakua! Sogo tete so, Nemot go andua-andua genuing eygo ya suing? Yang! Sedue ngga maning gemang go, Nemot go andua-andua genuing yakua suing. 20 No, Nemot go ku gemang! Sedue ngga, nemotnang sik sogo wawi go nogo, kunala duing tang so, tenday go genuing mea suing.” a
21 Se senong! Yesus lo taling go walitap inim, kunala banim go ey klay gono yakua klong. Yatrang ngge-a se tup: nago so mo? Kebabuin put, dan inim don eygo lo sebut go, yakua! Ngga kalik sebut go, kangok dega so keba put mea wok. 22 Ngga kalik dali so, anggul bu don eygo, bot buin go ba nogo yakua sre. Bot banim go ba no sre go, bot tegek go, anggul bu ku no mea pi. Ngga kalik go, bot ey, anggul ey tebadali mea betep. No, anggul inim sre genang, negum inim don eygo dali no se sre.
Ku Sabat nogo nebut
23 Ku meno so, Ki Wali Iram go ku Sabat nogo, gandum usu damoy lo Yesus gemang koklong. Ngga ey, Nemot no keng go andua-andua lo gandum nguok gono, ta lo ntrui go, gemang damklong. 24 Ngga ey Yesus no sedue Parisi lo gemang pu, “Ikum-a! Sogo kalik so, ku Sabat no Mot no keng go andua-andua lo gandum nguok go, ne dedam? Demu, Mot go andua-andua lo seguoy go se!”
25-26 No, way so ngge kalik nemotnang sono Yesus lo pu go, “Iram Daut lo pluok-ngam go, Wali Sam klaut ba no klik go, motnang maning kua ikum? Banim no Abyatar, taitisopuitgo trang dega so got-akam gono, lemoy go. Ngganemot ku nogo, ten piam so tra go so, Ki Wali yap ba no nemot go plesedue ey Iram Daut degut go, ngga ba no, ta go ten iti go gemang dam-nangam. Ngga ey, nemot no keng go plesedue no temu iti-nangam dali. Nemot-a, demu nogo ten ngganemot Daut logo yakua dam! Taitisopuit go trang logo so mea dam.” 27 Nemotnang no ngge kalik Yesus lo gemang pen-tenawon dali, “Sikabung go wali yakay genang, Sabat ku mo itak. No, sikabung-a, Sabat ku go demutrui logo yakua dok. 28 Ngga kalik dali, Sabat ku go wengkabui dega, Blong Dem-a gabe.”