6
Ku Sabat nogo wengkabui Blong Dem gabe
1 Ku meno so, Ki Wali Iram go ku Sabat blong gono, gandum usu nesip lo Yesus gemang koklong. Ngga ey, gandum tayang ey Nemot no keng go andua-andua lo buo go, ta lo ntrui go gemang dam klong. 2 Tasam ngga ikum gono sedue Parisi temu lo gemang pu-netenawon, “Ye! Sabat ku nogo, tasam ngga yakua pluok. Ngge dewi pu genang ku gabe. Kebali kua semu!” 3 Nebut ngga tup gono way so Yesus lo pu go, “Iram Daut lo pluok-ngam go, Wali Sam klaut ba no klik go, motnang maning kua ikum? 4 Nemot go plesedue ey iram Daut ten piam so tra goso, Ki Wali yap ba no degut-nayom go, ngga ba no ta go ten iti gono wasey go gemang dam-nenangam. Nemot-a, demu no pu go ten ngga, Daut logo yakua dam! Taitisopuit go sedue logo so mea dam.” 5 Ngga kalik dali gabe pu-situgu, “Genam ngge Blong Dem. Ki Wali Iram go ku nogo, Genam wengkabui gabe!”
Ku Sabat no sedue sadui sogo meno pali go
6 Ku Sabat meno no, dewi yap ba no Yesus degut go, Ki Wali Iram go nebut gemang nguok-tenawon. Ngga sogo, sedue taleng go klaya gemang. Nemot ta don kua. 7 Ngga ey Musa logo demutrui so ngunguok klui-klui ey, sedue Parisi ey, Yesus sono nemu-a gemang don-netenawon, “Sogo kalik Yesus ya semu-yon? Sedue taleng go ngge pali go, ibe sono mea pu, ‘Yesus lo mo kuklue gabe. Sabat ku ba lo tasam piam go Yesus lo mo pluok. Musa go demutrui nogo Sabat ku nogo kebali yakua semu.’ ” 8 No, Yesus nemotnang go kunala mo senong. Ngganemot sogo so, taleng go sedue sono ngge kalik gemang pu-nawon, “Ngge no, nesip ba no pla ip!” Sedue ngga tup gono, gemang ip-nawon. 9 Ngganemot no, sedue Parisi ey Musa logo demutrui so nguok go klui-klui eygo no Yesus lo gemang usi-nawon, “Motnang go demu nogo Sabat ku nogo, tasam sogo-a, imot logo ya pluok: tasam suey go-a, piam go-a?” 10 Yang! Ngga ey, taleng go sedue no gemang pu-siwon, “Mot go ta walong so sra ya!” Se ikum: sedue ngga go ta walong so sra gono, kekayso gemang pali-anatun!
11 Tasam ngga ikum gono, sedue Parisi ey Musa logo demutrui so nguok go klui-klui ey, Yesus nogo dabui kangok so gemang piam. Nggano, way-way so gemang pen-nenawon, “Sogo-a ya semu-eyon?”
Andua 12 yam so Yesus lo kuoy go
12 Ku ngganemot no, dewi pu so, meduim blo no Yesus gemang klak. Wadi go, dewi-a keklak, ku gemang blong. 13 Wadikua, ku blong gono, Nemot lo iwat go andua-andua seguong-a gemang usi-nawon, “Pluep-lak gono, nemotnang sik sogo sedue 12 yam so gemang kuoy-sing. Yesus lo gemang pu-nawon, ‘Deguo teguop pen klong genang tamot, motnang gabe.” Nemotnang go sui-sui: 14 Simon, Petrus so pu go. Andreas, Simon go ntaton. Yakobus, Yohanes, Pilipus, Bartolomeus, 15 Matius, Tomas. Yakobus, Alpeus go danon. Nggano, Simon, Partay Selot a sik sogo. 16 Yudas, Yakobus go danon. Nggano, Yudas yakena Kariot sik sogo. Nemot ngga, Yesus but genang klaytaduing go.
Sikabung miam dega ey Yesus tegu so pluep go
17-18 Meduim sik so li go, sip bata go dia no nemotnang Yesus ey gemang ip-nenawon. Se ikum: Nemot no keng go andua mata so sikabung ibe miam dega ey Yesus go nebut tup go, sadui-sadui pali genang so mo pluep. Naliwabu lo degut go gemang suey-sing dali. Yangga, nan Yudea sik sogo, kota Yerusalem sik sogo, nggano beap ketang sogo yakena Tirus ey Sidon eygo sik sogo sikabung mo pluep-lak. 19 Yesus go saysuk no tuing genang so, nemotnang naklay lo gemang usey. Seni so, Yesus no tuing go, Nemot go don lo sadui naklay gemang pali.
Teguop yakay dega eygo
20 Sikabung mata so ikum gono, Nemot go andua-andua sono Yesus go nemu yalap go gemang nguok-tenawon:
Nggeasui go, nando taut kua go,
nemot-a Woy Wali Iram lo iwat go, teguop-yakay ey gemang.
Se senong: Ki Wali Iram go blong naklay ngga,
motnang go gemang.
21 Nggeasui go, nando tenday go,
nemot-a Woy Wali Iram lo iwat go, teguop-yakay ey gemang.
Se senong: yansi go motnang nu mea temoy.
Nggeasui go nando unebu ba lo u-uwet go,
nemot-a Woy Wali Iram lo iwat go, teguop-yakay ey gemang.
Se senong: yansi go yakay kangok go ey
nebleng ey motnang mea klik.
22-23 Nggeasui go, Blong Dem tang so nando so
ikle go, tenguo go, sui wayang go,
nemot-a, Woy Wali Iram lo iwat go teguop-yakay ey gemang.
Kua kay! Banim go nabi-nabi
ngga kalik dali babuasi lo mo tenguo-nengam.
Motnang-a suey yakay dega ey usre ey mea pepla.
Nggano, motnang nogo taiti kangok dega-a
Blong dia yakena ba sogo-a mea iti.
24 No, nggeasui go, motnang taut mata dega go,
esang dabui klum!
Nggeasui, teguop motnang tete sogo gabe dedam.
25 Nggeasui go, nu yam so temoy go sikabung,
esang dabui klum!
Yansi go tenday mea suing.
Nggeasui go, tebadali rley-a pepla go, esang dabui klum!
Yansi go u-a kangok so motnang mea kukluo.
26 Nggeasui go, ibe lo tebadali motnang so iway iti go,
esang dabui klum!
Se duing: banim go seni kua go nabi-nabi
iway ngga kalik dali, babuasi lo mo iti-nengam.
27 Motnang! Genam go nebut dabui lo tup go nogo, gabe pen-asitugu, “Plesagui so mot sono kokong go nogo, way so dabui klum-a mot lo se taling; dabui ikle so sesemu go nogo, way so suey-a se semu. 28 Mot so nando lo wayang go, suey-a se pu! Piam-a mot sono taling go, dewi-a se pu. 29 Mot go kadon idi no pang go, kadon idi itak go na pang dali. Mot go amka kangok go mo lek go, amka meno nase itak dali. 30 Taut so motnang no nando lo wadong go se iti. Taut so gugluik go, tandali go kua mlak go weng. 31 Kua kay! Mot lo duing go, ‘Genam nogo teguop so sikabung lo se semu!’ Duo meno no ngganemot-a se pluok. 32 Andua seguong nogo dabuiklum-a taling go, teguop sogo kalik go-a mot lo mo taling? Ki Wali Iram nogo seni seguay. Kua kay! Ngga kalik go klum, kukunan sikabung Ki Wali Iram no kua keng go, gemang pupluok dali. 33 Nggano, mot no tasuey semu go tang so, way taling go, teguop sogo kalik go-a mot lo mo taling? Ki Wali Iram nogo seni seguay. Kua kay! Ngga kalik go klum, kukunan sikabung Ki Wali Iram no kua keng go, gemang pupluok dali. 34 Sedue meno no namboy taut nando lo iti go, ngga ey duing go, ‘Way dali genam sogo go suey so mea iti.’ Ki Wali Iram nogo seni sogo kalik? Kua kay! Ngga kalik go, taybat eygo Ki Wali Iram no kua keng go, gemang pupluok dali.
35 Nemot go nuik seni, ngge kalik gabe: plesi nogo klum-a se taling! Tasuey taling go, way so piam-a kua duing! Taut kua gono namboy iti go duoy, taway wadong genang kua duing! Ngga tang so, motnang nogo teguop kangok dega. Ngga ey, Ki Wali duoyap so motnang mea pu. Se duing: taybat eygo, taitisuey kua pupu go sikabung eygo nogo, klum katu ey Ki Wali Iram lo gabe tetaling!
36 Yang, seni so, sikabung meno nogo motnang go klum, Ki Wali Iram lo klum go kalik se.” 37 “Sikabung meno go kuklue-a motnang kua taling, motnang tang go kuklue Ki Wali Iram lo taling genaning. Se senong! Sogo kalik sikabung meno mot lo neyboy go, ngga kalik dali mot tang go Ki Wali Iram logo mea neyboy. Kuklue ngga sono se kay, kua duing. Mot go kuklue sikabung meno lo kay go itak go kalik. 38 Sikabung meno nogo taiti, dabui lo se uwasey. Taiti way mot nogo mea iti, muk kalik ta logo ey tram go, kuop blo logo ey mea tey! Se senong! Yam mot lo tui go dali lo, mot nogo yam mea tui.”
Walitap piam so koklong go benuey pen go
39 Nemot go andua-andua no nebut benuey so ngge kalik Yesus gemang nguok-nawon, “Sogo kalik nemupung golo, nemupung go dali, tap ya taling? Ngga, put ba lo kerlam so nemotnamon mea kapot-dak.”
40 Benuey meno, “Denok go senong klui blo nogo yakua. Yang! Naklay suey so senong go mlak go-a, klui ey mea kerlam.”
41 Benuey meno, “Dilekop andua go nemu ba sogo-a ikum go, no mot tang go nemu ba sogo ditebot-a kua senong ne. 42 Ditebot mot go nemu sogo kua ikum go, sogo kalik mot lo ya pu, ‘Dilekop mot go nemu ba sogo at lo ya pla go!’ Wamoymlue eygo sikabung, ngge se tup! Banim no, mot tang go nemu ba sogo ditebot-a se wagot! Mot go nemu naklay suey go nogo, andua go dilekop nenguon so ikum go mea tenguo.”
43 Benuey meno: “Di suey go, don piam sogo yakua tagot. Di piam go, don suey sogo yakua tagot dali. 44 Don tang so mea senong: kakuon kua dedam go, udui-a dedam go. Blebong kua dedam, yeule-a dedam go gabe. 45 Nebut benuey ngge go seni: sedue suey go dabui ba sik sogo, suey go-a mea taling. Sedue piam go dabui ba sik sogo, piam go-a mea pung. Seni so, dabui ba sogo suey go-a gigit go, suey go mea pepen. No, dabui ba piam golo damoy go, piam go-a lom ba lo mea mot.”
Tup go keng go ey kua keng go ey
46 Yesus lo bebat-nawon go, “Genam lo nguok go nebut no, motnang kua mlak go, sogo kalik Woy Dem so Genam motnang logo ya pu? 47-48 Se senong: Genam sono weng go, Genam lo nguok go tupduk go tamlak go, kalong eygo sedue kalik gabe. Kutrui dawin eygo blo no klik go yap kalik, nemot gemang. Bu klak go nogo, yap ngge don kangok tutuing kua tra! 49 No, Genam go nebut-a tup go, kua pupluok go, suey so kua klik go yap kalik, nemot gabe. Dawin eygo kutrui blo no kua klik. Bu klak golo, yap bobong ey king go, kekayso truik go mea togut! Genam go nebut suey so tup go, no, ta kua mlak go, nemot go wali mea waluk.”