4
Yesus yatrang mlue go
1 Ki Wali Waglo Yesus blo sono li gono, Ki Wali Waglo go don lo Nemot wawi go, kaseglokpay sikabung kua gono gemang klong. Sip ngga no, Yesus kenuong genang yatrang, Londa Kupiam golo mlue genang, “Seni so Yesus Ki Wali Iram go Danon? Kua?” 2 Sip ngga so genuing-a tenday Yesus lo got-nawon go, kuklik-kublong 40 yam so. Ngga ey, ten kangok so gemang tra-dapnawon.
3 Yesus tentra gono, yatrang mlue genang so Kupiamgo gemang pung-anawon. Ngge kalik Yesus so gemang pu-ton, “Ki Wali Danon seni so mo, nggeasui go pu-silo go, demu ngge-a, ten so se lemoy!” 4 No, way so Yesus lo gemang tenguo, “Wali Sam klaut ba no klik go,
‘Tendam seguong logo-a sikabung yakua wali,
no, Ki Wali Iram go lom sik so pupung go
nebut naklay logo-a mea wali.’ ” (Ulangan 8:3)
5 Ngga ey, kaseglokpay sikabung kuagosip sik sogo, tandali Yesus mlue genang so gemang wawi. Ngga ey, yakena teguop Yerusalem sono kebewon go, Ki Wali yap blo dega no Kupiamgo ey gemang got-klebawon. 6 Ngga ey, ngge kalik Londa Kupiam golo gemang we-tebawon, “Ki Wali Danon seni sogo, ngge blo sik so se sip-silo! Wali Sam klaut ba no ngge mo klik,
‘Demu nogo masi mea kua kling.
No, masi nawit eygo Wali tamot-a,
Ki Wali Iram lo mot-dak go
ta sra go blo no mea pui-nalo.’ ” (Mazmur 91:11-12)
7 Ngga ey, way so Yesus lo tenguo go, “Wali Sam klaut ba no ngge mo klik,
‘Ki Wali Iram nogo yatrang kua mlue!’ ” (Ulangan 6:16)
8 Ngga ey, kumeduim kalong blo dega sogo no Yesus Londa Kupiam golo wawi go gemang klong. Ngga sik sogo, kukunan go nan-nan naklay go blongdon dagu sono mo lek. 9 Yesus sono Kupiam golo gemang pu-ton, “Se ikum! Kukunan go blongdon naklay ngge, Mot go ta sono mea itak-silu. No, susubu-a at sono se wit-sando.” 10 Ngga tup gono, Yesus lo gemang bebat-nawon, “Ngge sik sogo nase klong! Wali Sam klaut ba no ngge mo klik gabe,
‘Ki Wali Iram seguong nogo-a, susubu mot se wit!
Ngga ey, Nemot go sui iway seguong-a blo sono mot lo se i-iti.’ ” (Ulangan 6:13)
11 Ngga kalik don ey suing gono, tandali go Kupiam golo Yesus yatrang go kua mlue-srenawon. Ngga ey, Ki Wali tamot weng-lak go Yesus gemang wawi-nenawon.
Nan Galilea no deguo teguop Yesus lo pen-asiton go
12-13 Ngga naklay lemoy go blo idi lo, Yohanes Busotuigo mlak go nebut, Yesus gemang tup-nawon. Ngga ey, nan Galilea sono Yesus-a gemang son-nawon. Yakena Nasaret itak go, yakena Kapernaum Galilea Bu ketang no, nan Sebulon ey nan Naptali eygo so gemang got-tenawon. 14-16 Seni so, Yesus ngga sogo tang so, nabi Yesaya lo pen go nebut gemang lemoy,
“Saula tang Sebulon ey Naptali eygo!
Bu Yordan ngga idi, beap go tap logo nan Galilea.
Mot ba so susuing go sikabung, Yahudi saula no kua degut go.
Se tup! Blong kangok go ku klik ba sogo blung lo mo ikum.
Kebong lo saguip go nogo, nemotnang sono blong gabe ngengap.’ ” (Yesaya 8:23-9:1)
17 Yohanes Busotuigo mlak go ku sik so, ngge kalik deguo teguop Yesus lo gabe pen-anakam, “Ku mo gabe, Woy Wali Iram ta mlak genang blongdon pung so gabe. Ngga tang so, kuklue, piam konkebamling se itak!”
Yesus no keng genang andua-andua takuduen so usi go
18 Ku meno no, Galilea bu ketang lo Yesus koklong gono, sedue namon, ntaton ey-ntaton ey, gemang ikum-nawon. Dasi kukuk genang, nemotnamon go kebali. Bu ba sono kebapalo so tetega go. Yangga, Simon, Yunani nebut sogo Petrus ey Andreas ey. 19 Nemotnamon so ngge kalik gemang pu-tenawon, “Weng-a! Mot namon Genam no pla keng-a! Nggeasui go motnamon dasi so kukuk go sedue. No, way so sikabung-a kuk go deguo teguop nguok go, dabui lo keng genang so At lo gabe kukuoy!” 20 Ngganemot no, kekayso, dasi so kukuk go kebapalo nemotnamon lo itak go, Yesus no gemang keng-klenawon.
21 Ngga sik so koklong go masi kua walong gono, ntaton namon meno Yesus lo gemang ikum-nawon. Yangga, Yakobus ey ntaton Yohanes ey. Nemotnamon ngga Sebedius go danon. Woy ngganemot nogo, nemotnamon, nglangin Sebedius ey bayi blo so suing go, kebapalo so tandali susuey. Duo namon Yesus lo gemang usi-nawon dali. 22 Kay seguong, nglangin Sebedius-a bayi ey itak go, Yesus no nemotnamon gemang keng.
Deguo teguop ngunguok sadui eygo sikabung pali-sing go
23 Nan Galilea sogo yakena-yakena lo Yesus gemang wet-asiton. Ngga sogo Yahudi go dewi yap sono degut go ngunguokklong. Nggano deguo teguop ngge kalik gabe pepen, “Woy Wali Iram tamlak genang blongdon pung so gabe.” Ngga ey sikabung go sadui-sadui naklay Nemot lo gemang pepali-sing dali.
24 Ngganemot nogo, Yesus sogo iway, nebit lo iti go kalik, e... nan Siria naklay sono go ey gemang pung-abatun. Sadui bumeno-bumeno so iseng tra go, Yesus mit sono gemang wawi go weng. Yangga: naliwabu kuaseni golo degut gono yane go; kebong-nglong so sesemu go; yambi sogo naklay sikabung temu lo king go, Yesus mit no gemang weng. Nggano, nemotnang go sadui Yesus lo gemang pali-nawon.
25 Yang! Sikabung mata so weng-lak go, Yangga: nan Galilea sik sogo, nan Dekapolis sik sogo, yakena Yerusalem sik sogo nggano nan Yudea ey Yordan bu idi sik sogo ey, Yesus no nsrung-nsrung ey keng-lak go gemang koklong.