MARKUS
1
Yohanes Busotuigo lo tap teguop so kebuo go
1 Sam ngge, Blong Dem Yesus, Ki Wali Danon sogo deguo teguop gabe.
2-3 Se senong! Wali Sam klaut ba no tegadi so Ki Wali Iram lo dok go Iram nogo nebut ngge, nabi Yesaya lo mo klik-ngam. Ki Wali Iram lo pu go,
“Ikum-a! Mot nogo walitap dali-dali kebo genang so,
banim no Genam go tamot pu go mea klong!
Sikabung go dabui ba nogo tap suey so
tamot ngga lo mea nebuem-siyon.
Se tup! Kaseglokpay no, sikabung sono
don ey ngge kalik go nebut gemang pepen,
‘Dali-dali Woy Wali Iram nogo tap se kebuo.
Nemudi so walitap ngga se trok!’ ” (Yesaya 40:3)
4 Wali Sam klaut lo pen go, ngge kalik lemoy go: Yohanes Busotuigo pung go, kaseglokpay so ngge kalik pen go, “Mot go wali se iwot-lak! Kuklue piam konkebamling Ki Wali Iram lo suep genang, bu se degut!” 5 Yang! Nan Yudea ey, yakena Yerusalem sik sogo sikabung naklay Yohanes mit no pluep go, kuklue piam konkebamling uwa gono, nemotnang bu Yohanes lo gemang tui-tenawon. 6 Se senong: Yohanes go amka, menay ‘unta’ suk logo, nggano nabi Elia go kalik kuibey gemang dok. Nemot lo dedam go, medop ey duen logo namseguon git ey. 7 Ngge kalik Nemot lo gabe ngunguok, “Genam no keng go, Ki Wali Iram lo mot-dak go Sedue meno, don dega eygo mea uweng. Nemot go taut no ta tuing genang, genam logo yakua! Genam ngge sedue seguay, Nemot ey kua kerlam. 8 Se senong: bu seguong lo motnang at logo gabe tui-situgu. No, motnang Ki Wali Waglo-a, Nemot logo mea tui-sing.”
Yesus bu degut go nogo nebut
9 Yakena Nasaret nan Galilea sik sogo, nan Yudea bu Yordan sono Yohanes Busotuigo nogo, Yesus gemang pung-nawon. Ngga ey, Nemot Yohanes lo bu kenok genang. 10 Bu ba sik so Yesus pupung gono, ut tenuing go, Ki Wali Waglo wi yagui kalik li go, Nemot blo no gualing go gemang ikum-biwon. 11 Ngga ey ut ba sik sogo nebut ngge kalik pu go gemang tup, “Genam go Duo dabuidalip, Mot gabe! Mot nogo-a Genam dabui yakay ey.”
Yesus so yatrang mlue go
12 Kayseguong, kaseglokpay seduekuagosip sono Yesus Ki Wali Waglo lo wawi go gemang klong. 13 Ku seduesinamon yam so, sip ngga so Yesus gemang got-nawon. Ngganemot no, Yesus yatrang sogo Londa Kupiamgo lo gemang mlue. Ngga sogo, menay iseng eygo nesip no Nemot gemang got-nawon. Ku ngganemot nogo Yesus no tebok genang Ki Walitamotnang gemang weng-lak.
Yesus kebali tamlak go
14 Ku meno no, Yohanes Busotuigo Herodes lo gemang mlak. Yohanes mlak go blo idi lo, nan Galilea sono deguo teguop pepen genang so Yesus gemang nawon. 15 Ngge kalik Yesus lo gabe pen-anawon, “Ki Wali Iram ta mlak go blongdon duduing gabe dagu. Ngganemot sogo so, kuklue, piam konkebamling se itak! Deguo teguop no dabui lo motnang se keng!”
Dasisokukgo sedue Yesus lo usi go
16 Bu Galilea keteng lo Yesus wet-asiton gono, bu ba sono kebapalo so Simon ey ntaton Andreas ey betep-kletenawon go, gemang ikum. Nemotnamon go kebali: dasisokukgo. 17 Nemotnamon ikum gono, ngge kalik Yesus lo gemang pu-tenawon, “Weng-a! Mot namon Genam no pla keng-a! Nggeasui go motnamon dasisokukgo sedue. No, motnang nogo sikabung-a wawi go, dabui lo walitap keng genang-a, Genam lo mea taling.” 18 Kekayso kebapalo-a itak go, Yesus no gemang keng-klenawon. 19 Ngga sik sogo koklong go, masi kua walong gono, ntaton namon meno Yesus lo gemang ikum-nawon. Ngga, Sebedius go danon, Yakobus ntaton Yohanes ey. Woy ngganemot nogo, bayi blo so nemotnamon suing go, nglangin Sebedius ey tandali kebapalo so gemang susuey. 20 Kekayso nemotnamon Yesus lo gemang usi dali, “Genam no pla keng-a!” Ngga kalik tup gono, bayi ba so, nglangin kebali sedue ey kebapalo so sebut go, gemang itak. Ngga ey, Yesus sono gemang keng-klenawon.
Yakena Kapernaum no dewiyap ba sono Yesus degut go
21 Yakena Kapernaum no nemotnang pluep go gemang got-netenawon. Ku Sabat pung gono, Yahudi go dewiyap ba no Yesus degut go, sikabung gemang nguok-nawon. 22 Yesus lo nguok-tenawon go tup go, sikabung naklay ey nega go, gemang we-netenawon, “Ye! Sedue ngge lo nguok go nebut seni so don kangok, Musa logo demutrui so ngunguok go klui-klui ey kua kerlam!” 23 Ku ngganemot nogo, naliwabu lo degut go sedue meno, dewiyap ngga ba so gemang dali. Ngge kalik nemot lo gemang bega-tenawon: 24 “Yesus, Nasaret sik sogo sedue! Atnang nogo, sogo kalik so ya semu-lo? Atnang tuk so Mot weng? Genam mo senong: Ki Wali Iram sik sogo Iram teguop, Mot-a gabe.”
25 Nggano, ngge kalik don ey Yesus lo gemang bebat-nawon, “Mot seglaplu! Sedue ngge ba sik sogo se pung!” 26 Ngga ey, sedue ngga ba sogo naliwabu kayang ey mene-mena so teglok go, gemang pluep-lak.
27 Sikabung naklay kuikui go, nemu-a sena go bung-netenawon go, ngge kalik gemang we-netenawon, “Ye! Tasam kangok go ngge, tap demening go gabe! Nemot lo pu go nebut don dega ey. Seni so, naliwabu tup go kekayso mo pung!” 28 Tasam ngga iway, nebit no tui go kalik, keda so nan Galilea sogo sikabung naklay gemang tup-nenawon.
Sadui eygo sikabung mata so Yesus lo pali go
29 Dewiyap ngga ba sik so nemotnang pluep go, kekayso Yakobus, Yohanes, Yesus ey kerlam so, Simon ey Andreas eygo yap ba no gemang klong. 30 Se senong: Simon go unenkabuisegla nengkoy sadui kangok so tra goso, yap ba lo sesrek. Nemotnang degut-nenawon gono, Yesus sono unenkabuisegla sadui sogo gemang pen. 31 Ngga ey, kabung ngga go sip sono Yesus gemang nawon. Ta sra go, kabung ngga, ta no mlak go gemang ip-natun. Ngga ey, kayseguong so nemot go sadui ey gemang kua. Nggano, nemotnang nogo ten-a semu-tenatun.
32 Yam so woy susut gono, sikabung sadui sogo, naliwabu lo degut go, Yesus mit sono sikabung temu lo wawi go gemang pluep-lak. 33 Ngga naklay ikum so, yap seboy no yakena ngga sogo sikabung gemang yaluim-nenawon.
34 Se ikum: sikabung mata so, sadui bumeno-bumeno so tra go, naliwabu lo dok go mata dega so Yesus lo gemang pali-singnawon. Naliwabu so ngge kalik Yesus lo gabe bebat, “Genam sono go motnang klayanang go logo nebut way kua pu!” Yang: naliwabu mo senong, “Tegadi so dok go Iram, Yesus gabe.”
Seduekuagosip no Yesus dewi pu go
35 Ngga utep go, yasunebut no Yesus buong go, yap sik sogo yakena seding seduekuagosip sono gemang nawon. 36 Ngga ey, Simonnang buong dali go, kedaso Nemot wet so gemang nenawon. 37 Yesus tegu gono, gemang we-netenawon, “Aya klui! Mot so sikabung naklay uwet go.” 38 Way so Yesus lo gemang pen-nawon, “Ngge sogo sikabung seguong nogo so, Genam mot-dak go kua weng. No, yakena-yakena meno sikabung nogo deguo teguop mea penklong dali. Weng-a, yakena-yakena temu ngge dagu sogo no imot ya klong go! Ngga nogo deguo teguop nguok dali genang so Genam gabe.”
39 Ngganemot no, Yesusnang ip go, nan Galilea sogo yakena-yakena ngga sogo no gemang pluep. Yahudi sikabung go dewiyap ba no degut go, deguo teguop gemang pepenklong. Yakena-yakena ngga nogo, sikabung ba sik sogo naliwabu mata so, Yesus lo gemang yat-siwon.
Yaulat eygo sedue nogo nebut
40 Ku meno no, yaulat eygo sedue klaya, Yesus mit no gemang kunuon. Yesus go suongku no segabuem unuik gono, ngge kalik gemang pu-tenawon, “Esang Aya! Mot iwat go, genam go sadui se pali.” 41 Sedue ngga ikum go, Yesus klum gemang tra-nawon. Ngga ey sedue ngga sono ta sra go, mlak-siwon gono, gemang pu-tenawon, “Genam gabe iwat. Sadui pali-a!” 42 Woy ngganemot no, sedue ngga go yaulat kekayso kua-anatun go se pali-dapnawon. 43 Ngga ey, sedue ngga nogo nebutmang ngge kalik Yesus lo gemang pu-nawon, 44 “Mot go saysuk no lemoy go ngge, sikabung nogo kua pepenklong!” No, klong-a! Taitisopuit go trang no mot go saysuk-a se taling! Seni so mot pali go sogo, nemot lo yang genang! Ngga ey, Musa logo demutrui kalik, Ki Wali Iram sono taitisuey pu genang taiti, iti go se puit. Ngga taling golo, ibe mea senong, “Seni so, mot go yaulat Ki Wali Iram logo so mo pali.”
45 No, esang! Yesus lo pu go kalik sedue ngga kua keng. No, sedingno-sedingno, nebut walong bata so, nemot go yaulat Yesus lo pali go-a gemang pen-asiwon. Ngga tang so, yakena-yakena nogo nenguon so pung genang Yesus yakua. Wayso, seduekuagosip dia sono Yesus klong go gemang got-tenawon. No, sip ngga nogo, nago-nago sik sogo sikabung, Yesus mit no gemang pluep-lak.