28
Yesus tandali nglong go
1 Ki Wali Iram go ku Sabat yam gono, ku klay tete sogo ku Minggu wadikua go, kukluk nogo woy masi se tetega, Maria Magdalena, Maria meno ey Yesus go simu ikum so gemang klong. 2 Se ikum! Kekay so kuysu kangok go gemang lek-anatun. Wali tamot klaya li golo, simu so ketok go demu leging gono, demu ngga blo so gemang got-tenawon. 3 Nemot go nebuemnemu blong ey, amka klaut irop-irop ey. 4 Simu yay so suing go plesedue tamasi bubong ey king go, sedue kebong go kalik kekayso srek-lak. 5 No, kabung-kabung ngga sono Kiwali tamot ngga lo gemang pu, “Motnang suali kua tra! Seni so, genam mo senong: Yesus di no tegak goso gabe wet-ketogoy! 6 No, ngge sogo Nemot kua gabe. Nemot lo pen go kalik, Nemot mo nglong gabe. Weng-a! Nemot so tui go sip-a ba ikum! 7 Kedaso kenalo go, Nemot go andua-andua no se pen, ‘Sedue kebong go sik sogo Yesus tandali mo nglong. banim Galilea sono Nemot gemang mo nawon. Ngga no Nemot eygo mea tegu-kenalo.’ ”
Ngga ey Kiwali tamot lo pu go, “Motnang nogo nebut ngge, mo nemot gabe!”
8 Ngga kalik tup-klenatun go, dabui yakay so idi, suali so idi. Simu sik sogo keda so kap-klebitun, Yesus go andua no deguo ngga pen genang so. 9 Ku ngganemot nogo, Yesus-a pung so-pung go, nemotnang ey tegu go, ngge kalik gemang pu-nawon, “Motnang suey yakay ey!” Ngga tup go nogo, dagu sono nemotnang yaluim go, Yesus go masi ba sono, unuik go teguot-klenatun go, iway gemang kong. 10 Ngga ey Yesus lo pu go, “Suali kua tra! Klong go, andua-andua no se pen, ‘Nan Galilea sono se klong! Ngga no Genam eygo mea tegu.’ ”
Wamoy sogo nebut yay sogo plesedue lo pen go
11 Kabung-kabung tap maning uweng gono, Yerusalem no plesedue temu keda so gemang kuek. Ngga no pung gono, taiti so pupuit go trang-trang dega no tasam naklay gemang pen-nenawon. 12-13 Ngga ey, Yahudi go iram-tegay temu ey nebut pu-nenawon go, ngge kalik duing go gemang pu, “Plesedue ngganemot nogo, duoy mata so se idok!” Nggano ngge kalik nebut gemang semu-nenawon, “Motnang logo se wa, ‘Usene so atnang srek gono, Nemot go andua-andua weng go, Yesus temoy wom so sok go mo kap.’ 14 Nago no, nebut ngganemot Gubernul tup go, nemot eygo suey so atnang lo mea pen. Ngga ey, motnang usene srek go idekeba, yakua taling genang.” 15 Ngganemot no, duoy ngga idok-nenawon go, iram-tegay no keng go, plesedue logo gemang pluok-nenawon. Se senong! Sikabung Yahudi naklay nogo Yesus wom so iti go nebut ngga, bu kalik se bata-anatun, e... nggeasui go ku no gabe.
Deguo teguop pepen klong genang
16 Yesus go andua 11 yam sogo ngga, nan Galilea sono gemang klong. Meduim blo no banim Yesus lo ngunguok go sip no, Nemot ey mea tegu. 17 Yesus ikum gono, ta gemang kong-nenawon. Nemot-a, dabui ba nogo maning lekluik so andua temu tra-netenawon. 18 Dagu sono Yesus-a weng go, ngge kalik gemang pu-tenawon, “Seni so, Ki Wali yakena ba sogo ey kukunan blo sogo eygo blongdon naklay, Genam go ta no Ki Wali Iram lo mo itak gabe! 19 Motnang se klong-lak! Genam no tupduk genang, dabui lo keng go andua-andua so lemoy genang, saula-saula naklay se taling. Bu degut go nogo se pu:
- Ki Wali Aya go sui no,
- Ki Wali Danon go sui no,
- Ki Wali Waglo go sui no,
- at lo gabe tui-situgu. Seni!
Ngga ey, motnang no Genam lo mot-dak go naklay, tupduk go nemotnang lo keng go se pupluok.
20 Deguo ngge pen klong go nogo, se senong: kuno-woyno motnang ey klay golo Genam mea uwet, e... i go ku no mea pung.”