20
Simu ngga ulue so itak go
1 Ku minggu wadikua seni go, ku maning kua blong gono, simu blo sono Maria Magdalena gemang natun. Nggano pung go, ikum-natun go, demu kangok go put so kebet go mo leging. Simu ba ulue so gemang ikum-natun. 2 Ngga kalik ikum gono, Maria Magdalena kap-situn go, Simon Petrus ey, Yohanes Yesus lo klum go andua ey tegu gono, gemang pen-abatun, “Ye... Woy Dem go temoy, sikabung lo iti go se! Nago no tui, genam kua ikum-srenatu go.”
3 Maria lo pen go tup gono, simu sono kekayso Petrus, Yohanes ey gemang kap-klesiwon. 4 Kap-klesiwon go, Yesus go andua Yohanes-a, simu blo no banim gemang pung-nawon. 5 Ngga ey, simu ba sono guoy-siwon go, amka lenan-a gemang ikum-sawon. No, demuput ba sono go-a, kua degut. 6 Nggano, Simon Petrus mesip so pung go, demuput ba sono gemang degut-sawon. Amka lenan Yesus temoy no pok go-a gigit go Petrus gemang ikum dali. 7 Yesus go wengkabui no dok go amka lenan, amka meno ey klay gono kua tui. No, suey so banom-banom padu go gemang gigit. 8 Simu blo no banim pung go andua Yohanes, Petrus no keng go demuput ba sono degut go gemang ikum dali. Seni so, simu ba sogo Yesus kua. Ngga ey, dabui ba no gemang yang-nawon, “Yesus, seni so mo nglong gabe!” 9 Se duing: nsanyom go, e... ku ngganemot no pung go, Yesus nglong genang, Wali Sam klaut no klik go, maning nemotnang kua mlak. 10 Ngga, ikum gono, yap sono tandali nemotnamon gemang kebewon.
Maria Magdalena no Yesus go saysuk taling go
11-12 Se ikum: Maria Magdalena-a, unaduk ey simu blo so maning got-tenatun. Demuput ba sono unaduk ey nemu so tebap-satugun go, Kiwali tamot namon amka klaut ey kok go, gemang ikum-natun. Yesus so tui go sip so, meno masi ku no, meno-a wengkabui ku no. 13 Maria sono Kiwali tamot namon lo gemang pu, “Sogo so unaduk togoy?” Way so Maria lo pu go, “Wom so Genam go Woy Dem, sedue lo iti go se, nago no tuet? Genam kua senong go!”
14 Ngga kalik we-natun gono, taton sono lekek go, Yesus gemang ikum. Nemot-a, ngga Yesus tang go, kua senong-srenatun. 15 Ngga ey, Yesus lo usi go, “Sogo so unaduk-togoy? Nando so wet-togoy?” Seni so, Maria lo duing go, ngge, usu yay sogo sedue. Ngga tang so, gemang we-tenatun, “Aya! Genam sono se pen! Yesus temoy mot lo iti go, nago no mo tui? Genam lo iti sogo!” 16 Yesus lo pu go, “Maria!” Ngga tup gono, keda so iwot go Maria lo gemang wa-natun, “Aya klui sop!” Iblani nebut sogo: Rabuni! 17 Ngga ey, Yesus lo pu go, “Ki Wali Aya sono, maning Genam kua klong go nogo, Genam ta kua mlak! No, nggeasui go, Genam go dem-debui, blong duoyap sono klong go mot lo se pen, ‘Nggeasui go, Ki Wali Aya sono Genam gabe ya klak. Ngga motnang go Ki Wali Aya dali. Yang, Ki Wali Iram sono Genam gabe keklak. Ngga motnang go Ki Wali Iram dali.’ ” 18 Ngga ey, Maria Magdalena natun go, Yesus lo kuoy go andua-andua no gemang pen, “Woy Dem Genam lo mo ikum!” Ngga ey, nemot no pen go nebut naklay gemang pen-anatun dali.
Andua-andua no Yesus saysuk taling go
19 Ku se kiklik, Minggu use go, yap meno no Yesus go andua-andua, trang-trang Yahudi suali sogo so, yataput yam so kadun go, got-netenawon. Se ikum! Yesus-a, nemotnang nesip no pung so pung-anawon go gemang pu, “Motnang ngengam yakay ey gabe!” 20 Ngga kalik pu gono, Nemot go tadabui ey teglo ey, gemang taling-nawon. Woy Dem ikum gono, yakay kangok so gemang tra-nenawon.
21 Tandali Yesus lo gemang pu-tenawon, “Motnang ngengam yakay ey gabe!” Ngga ey Nemot lo gemang pu, “Genam Ki Wali Iram lo mot-dak go li go kalik, nggeasui go, motnang Genam lo gabe mot-dak go klong!” 22 Ngganemot no, nemotnang sono waglo u-siwon gono, gemang we-nawon, “Ki Wali Waglo-a motnang lo se uwawi! 23 Se senong: sedue meno logo piam konkebamling motnang lo suep go, kon ngga gemang ya suep. Nggano, motnang lo pu go, kon kua suep, kon ngga yakua suep!”
Tomas ey Yesus tegu go
24 Yesus go andua 12 sik sogo meno go sui: Tomas, Didimus so pupu go. Yesus nglong go ku nogo, andua-andua ey kuduong so tegu go, Tomas kua. 25 Ngga lemoy go, Yesus go andua temu lo gemang pen, “Woy Dem genamnang ey mo tegu.” Tup gono, deguo ngga, Tomas kua keng-srenawon. Way so nemot lo pu go, “Nemu lo kua ikum go, ta lo, paku sip ey suon put ey go, kua tra go, yakua keng seni gabe!”
26 Minggu klaya meno dali no, yap ngga ba no Yesus go andua-andua gemang yaluim. Nemotnang ey Tomas gemang dali. Yatap maning kadun gono, nemotnang nesip no Yesus pung so gemang pung-anawon. Nggano, gemang pu-tenawon, “Motnang ngengam yakay ey gabe!” 27 Kay seguong Tomas sono Yesus lo gemang pu, “Genam go tadabui put ey teglo put eygo ba lo, Mot go taglang-a kok-sando-a! Tandali go kua wayang-srelo! Mot dabui lo se keng dali!” 28 Yesus lo pu go tup gono, Tomas gemang wa-nawon, “Yang! Genam go Woy Dem, Mot gabe. Genam go Ki Wali Iram, Mot gabe.” 29 Nggano, Yesus lo pu go, “Genam ikum goso, dabui iti go, Genam no mot mo keng. No, nemu lo kua ikum go, dabui lo keng go-a, ngengam-yakay dega ey mea suing.”
Sam ngge go nuik
30 Yang! Yesus go andua-andua go nemu ku no Yesus lo pluok-ngam go tasam kangok go, mata dega so gemang. No, sam ngge ba nogo kua klik gabe. 31 Sam ngge ba no mo klik go ngge, motnang lo senong genang, “Tegadi so dok Iram, Ki Wali Danon, Yesus gabe! Dabui iti go ngga keng go tang so, Nemot go sui ba no motnang gabe uwali.”