TAMOT
1
Teopilus dega nogo so Lukas lo klik go sam
1-2 Teopilus dem, mot suey gabe! Kuduong so at lo klik go a sam ba no, Yesus lo nguok-yom go nebut ey tasam-tasam naklay, Nemot kebali tamlak go sik so iti go e... Nemot ut sono klak gono naklay mo klik-yu. No, maning ut sono kua klak gono, Nemot lo kuoy go tamot-tamot no wali genang tap-tap, Wali Waglo go don lo, naklay mo nguok-nayom. Sam ngge ba no ngga gabe klik-situgu.
3 Ngge kalik gabe lemoy: kebong sik so Yesus nglong gono, ku 40 ba no, tamot-tamot sono dialo-dialo Nemot go saysuk mo taling. Ngga sik so mo senong: seni-seni so Yesus gabe uwali. Ngga ey, Woy Wali Iram go blung tamlak genang duduing sogo nebut, naklay mo pen-ayom.
Ki Wali Waglo li genang tegadi
4 Ku meno so, nemotnang yaluim go, atuia-mang, ngge kalik Yesus lo gemang king, “Yakena Yerusalem sik sogo motnang kua klong! Ngge so se bubung, e... Nemot go tegadi so dok go taiti, Ki Wali Aya lo mea iti. Banim nogo motnang no tegadi ngga, Ki Wali Waglo iti genang, Genam lo mo pen gemang. 5 Seni so, Yohanes Busotuigo, sikabung bu lo gemang tui-yom. No, ku tebot ngge ba no, motnang, Ki Wali Waglo lo mea tram!”
6 Yesus nebut atuia, ngga kalik go pen gono, ngge kalik tamot-tamot lo gemang usi-nenawon, “Woy Dem! Nan Israel-a tamlak genang nggeasui Mot lo ya semu-silo?” 7 Nggano, Yesus lo way so pu go, “Nueya! Motnang ku ngganemot, mea kua senong. No, Ki Wali Aya seguong-a, gemang senong! 8 No, Ki Wali Waglo li gono, motnang nogo don mea iti! Ngga ey, Genam sogo nebut motnang lo mea pepen klong. Yerusalem sik so iti go, nan Yudea naklay nogo, nan Samaria, nggano, kukunan seding no mea pung.”
Ut ba sono Yesus klak go
9 Nebut yam so pen-nawon gono, blo sono Ki Wali Iram go don lo Yesus iti go gemang klak. Yesus keklak go nemu so maning bung-netenawon, utkenuim kuntun go, nemotnang go nemu sik sogo Yesus gemang teglue. 10 No, blo sono nemu maning bubung gono, amka klaut eygo sedue namon, pungso-punggo, nemotnang mit no gemang ip-klenawon. 11 Ngga ey gemang pu-kletenawon, “Ey, Galilea sik sogo sedue-sedue! Ut ba sono go sogo nemu so bung-ketegoy? Motnang sik so Ki Wali Iram sono Yesus klak go, ikum-keto go. Klak-biwon go kalik dali, tandali go Nemot mea li-yon!”
Yudas way so taling go tamot
12 Ut ba sono Yesus klak-biwon gono, meduim Saytun sik sogo, kota Yerusalem sono tamot-tamot gemang klong. Meduim sik so Yerusalem sono go dagu so, kilometer klaya yam so. 13 Yerusalem no pung gono, yap meno degu bloda no gemang blengat-nenawon. Ngga tamot-tamot susuing go degu. Tamot-tamot ngga so susuing go, nemotnang go sui: Petrus, Yohanes, Yakobus, Andreas, Pilipus, Tomas, Bartolomeus, Matius, Yakobus Alpeus go danon. Simon tang Selot sik sogo, nggano Yudas Yakobus go danon. 14 Nggano kabung temu gemang dali. Kabung meno ngga, Yesus go unen Maria. Ngga ey, Yesus go ntatonnang ngga so gemang dali. Nemotnang, tamot-tamot ey dabui klaya iti go, dewi so gemang pu-netenawon.
15 Ku meno no, sikabung 120 yam so klay gono yaluim-nenawon go, Petrus ip go, ngge kalik gemang pen-atenawon,
16-17 “Ayanang, mianang, suey gabe! Yudas, atnang ey klay gono kebali semu genang, Yesus lo kuoy go. No, Yudas sogo nebut Ki Wali Waglo lo pu go, nggeasui go lemoy genang, Wali Sam klaut ba no, babu Daut lo mo klik-ngam. Yudas ngga klaysedue. Yesus mlak genang plesedue no tap-a, nemot lo mo taling.” 18 Se senong: plesedue go ta no Yesus iti genang so, duoy mo idok. Duoy ngganemot lo nan meno nemot mo iti. No, nan ngganemot blo no nemot mo kenuong go teguan tegek go, kluitdabui dia no mo pung sang. 19 Kota Yerusalem sogo sikabung, tasam ngga, naklay mo tup. Nggano, nan ngganemot go sui, Iblani nebut sogo, ‘Hakaldama’ so gemang pu. Nemot go seni: kin ey pi go nan. 20 Tasam ngge naklay, ngge kalik sam Masmur ba no mo klik dali,
“Sip ngga itak-a!
Sedue klaya nang go, ngga nogo ya kua suing.” (Mazmur 69:26)
Ngga ey ngge kalik go mo klik dali,
“Nemot logo kebali sip, sedue meno lo mea iti.” (Mazmur 109:8)
21-22 “Ayanang, mianang! Nggeasui go, imot sik sogo andua meno-a se wet! Genamnang ey, Woy Dem Yesus tandali nglong go nebut, ibe nogo nemot lo se pepen klong dali. Andua ngga ngge kalik so se: Yohanes lo, Yesus bu tui go sik so iti go, e... imot nesip sik so Nemot klak go ku no pung go. Tasam naklay Yesus lo taling go nemot mo ikum. Andua ngganemot-a se wet go taling-eyon!”
23 Ngganemot no, sedue namon-a ibe blo no gemang taling-nenawon. Yangga, Yusup Barsabas, Yustus so usi go ey, Matias ey. 24-25 Ngga ey, Ki Wali Iram sono dewi ngge kalik gemang pu-nenawon, “Woy Wali Iram! Yudas go sipsuing mo itak. Nggano sikebong yakena no nemot mo klong. O, Wali Aya! Sikabung naklay go dabui ba Mot lo mo senong. Nggeasui go, genamnang no se taling: sedue namon ngge sik sogo, Yudas way sogo sipsuing tamot lemoy genang, nando-a Mot lo mo kuoy?” Nemotnang go dewi, ngga kalik gemang usi-nenawon.
26 Ngganemot no, demu tega go, i-nenawon go, e... Matias no, gemang taling. Ngga ey, Yesus go tamot temu sono Matius-a gemang tebok. Nemot ngga, 12 tete sogo tamot.