21
Andua 7 yam sogo ey Yesus tegu go
1 Ngga blo idi lo, nemot no keng go andua ey, Tiberias bu, nan Galilea no Yesus gemang tegu-nenawon. Ngge kalik gabe lemoy: 2 Ngga sogo, Simon Petrus, Tomas Didimus, Natanael, nan Galilea, yakena Kana sik sogo, Sebedeus go danon Yohanes ey Yakobus ey, nggano Yesus no keng go andua meno namon gemang. Klay goso nemotnang yaluim go got-netenawon.
3 Ngga use go, andua temu no Simon Petrus lo gemang we-tenawon, “Dasi blang so, genam be koklong.” Andua temu lo pu go, “Yu-a ya klong go!” Ngga ey, bayi no klak go nemotnang gemang klong. No, ku klik walong ngga, dasi klaya go nang, kua kuk-nenawon. 4 Wadikua seni go, woytum se tetega, beap keteng no Yesus gemang ip-nawon. No, nemotnang kua senong, ngga Yesus. 5 Nggano, nemotnang no Yesus lo gemang usi-tenawon, “Duo yap! Motnang go dasi gemang?” Way so pu go, “Kua go! Klayanang go kua go se!” 6 Yesus lo gemang bega, “Bayi tasemlea idi sono, motnang go palo-a, betep-a! Se ikum: dasi mea mlak!” Nebut ngga, tup gono, kunala duing kua so, palo tasemlea idi sono gemang betep-nenawon. Palo tandali rlek gono, gemang senong, “Ye, palo tandali lek sogo, atnang don kua go se. Kebapalo ba nogo dasi, mata dega so degut go nogo.”
7 Ngga ey Petrus no Yesus lo klum ey go andua Yohanes lo pu go, “Se ikum: imot go Woy Dem ngga go!” Nebut ngganemot tup gono, amka kangok go, suey so kui no Petrus gemang dok-nawon. Ngga ey, bu ba sono sip go, Yesus ey tegu so, gemang klong-won. 8 Andua-andua temu-a, dasi lo tram go kebapalo ey, ketang sono bayi lo gemang lelek. Seni so, bayi blo sik sogo keteng nogo walong, 100 meter yam no. 9 Bayi blo sik sogo li gono, gemang ikum-nenawon, “Ye! Koynegu blo no dasi dali ta go, loti ey koy mit no gemang tui dali.” 10 Yesus lo pu go, “Dasi demening go, nangglik ey iti go weng dali ya!” 11 Simon Petrus, bayi ba no klak go, dasi kebapalo ey ketui sono, gemang lek-nawon. I-nenawon go, kebapalo ba sogo, dasi miam dega ey, 153 yam so. No, kebapalo kua tegek ne! 12 Nggano, Yesus lo gemang pu-tenawon, “Weng-a! Ten ba dam!” Se senong: andua klaya duo lo usi genang “Mot nando?” ya kua. Nemotnang mo senong: ngga, seni so, Woy Dem! 13 Nggano, loti Yesus lo iti go, wasey go, ngga kalik dasi gemang wasey-nawon dali.
14 Nglong gono, da nangglik tete so andua-andua ey Yesus tegu go gabe.
Petrus so Yesus lo pen go nebutmang
15 Yesus, nemot no keng go andua ey ten yam so dam gono, Simon Petrus no ngge kalik gemang usi-nawon, “Simon, Yohanes go danon! Se pen-sando, ‘Genam nogo mot go klum dabui lo tra go, nemotnang ngge nogo ey kua kerlam?’ ” Petrus lo pu go, “Yang, Woy Dem! Mot mo senong, ‘Mot nogo genam go yakay gabe.’ ” Way so Yesus lo pu go, “Genam go duoyap don kua go nogo tap, suey so se taling!”
16 Da namon tete sogo, Yesus lo usi go, “Simon, Yohanes go danon! Se pen-sando, ‘Genam nogo mot go klum gemang?’ ” Petrus lo pu go, “Yang, Woy Dem! Mot mo senong, genam go yakay Mot nogo gabe.” Way so Yesus lo pu go, “Genam go blung, suey so yay se suing!”
17 Da nangglik tete sogo, Yesus lo gemang usi dali, “Simon, Yohanes go danon! Genam nogo yakay, dabui lo duing-togoy?”
Da nangglik yam so nemot sono Yesus lo usi go nogo, u so Petrus-a se iwot-nawon. Petrus lo wa go, “Yang, Woy Dem! naklay-naklay Mot lo mo senong wa. Mot nogo klum dabui lo gabe duing-tugu.” Way so Yesus lo pu go, “Genam go blung nogo, suey so tap se tetaling!”
18 Petrus! Seni-seni so, mot no gabe pen-asitugu, “Maning ngguot sogo nogo, meno duo logo mot ya kua tebok. Kuibey suey so dok go, nago sono klong genang, mot mea klong. No, srawe-dap logo nogo, mot go ta sedue meno lo iti go, kuibey lo dok go, moysogo sip no wawi go, mot mea klong.” 19 Nebut benuey ngga lo Petrus kebong genang tap Yesus lo taling go. Ngga tang so, Ki Wali Iram go sui iway iti genang.
Ngga ey, Petrus so pu-nawon go, “Mot-a, Genam no se keng!”
Yohanes wali genang sogo nebut
20 Ntaton sono Petrus lekek go, Yesus go andua dem sop Yohanes, Petrus lo gemang ikum. Kua kay: Paska ten so dedam gono, Yesus no tebok go andua dem sop Yohanes lo gemang usi, “Woy Dem! Mot nando lo ya wayang-yon?” 21 Yohanes no duduing goso, Yesus no Petrus lo gemang usi, “Woy Dem! Yohanes nogo, sogo kalik so ya lemoy?” 22 Way so Yesus lo pu go, “Genam lo mo duing go, nemot mea suing, e... Genam tandali pung go, ngga mot kua senong go, nueya! Ngga mot go kebali kua. No, Genam sono mot-a se keng!”
23 Yesus lo pu go nebut ngga tup go nogo, blong duoyap temu lo duing go, “Yohanes mea kua kebong.” No, seni so, ngga kalik Yesus lo kua pen. Nemot lo pu go, “Genam lo duing go, nemot mea suing, e... tandali Genam mea pung. Ngga mot kua senong go, nueya! Ngga mot go kebali kua.”
Nebut yam sogo
24 Yesus logo tasam-tasam ikum go, ibe senong genang so, sam ba no suey so Yohanes ngganemot lo mo klik-angam. Nggano atnang mo senong, “Yohanes lo pen go ngga, seni eygo, imot lo keng genang gabe.”
25 Se senong: Yesus lo taling tasam temu miam ey. Ngga naklay sam-sam ba no sikabung lo klik genang, kukunan blo sogo sip ngga klik genang, ya kua nemot. Yam.