LUKAS
1
Wengkabui Teopilus no walitap Lukas lo taling go
1 Wengkabui Teopilus, mot suey gemang!
Imotnang nesip no, Yesus nogo tasam-tasam lemoy go, sam ba no suey so sedue mata sogo lo mo klik-neyom. 2 Yesus go tasam-tasam takuduen sik so sedue temu tang so ikum go, ibe sono go mo taling. Ngga ey deguo teguop ngga nguok genang tamot so, mo lemoy-lak. 3 Yohanes Busotuigo sik so iti go, e... Ki Wali yakena ba sono, wawi go degut go, tasam ngga naklay suey so genam tang so tandali wet go mo ikum. Genam lo duing go: ngge suey, sam ngge ba no mea klik-silu. 4 Teopilus! Mot nogo so sam ngge, genam lo klik go gabe iti. Mot senong genang: mot no nguok go ngga, seni so mo lemoy gabe!
Yohanes Busotuigo pung genang nebut
5 Kuduong sik sogo, ngge mo lemoy-angum: nan Yudea no deguena so Herodes lo tamlak go nogo, sedueseni meno gemang. Nemot go sui: Sakarias. Ki Wali yap ba no, nemot go wengkabui Abia ey, Ki Wali Iram nogo taitisopuit go trang. Sakarias go senun, Elisabet, babuasi Harun a sik sogo denun dali. 6 Seni so, nemotnamon dabui lo keng go, wali teguop sogo. Ki Wali Iram yakay ey. Woy Wali Iram lo taling go demutrui no suey so nemotnamon lo tupduk go kekeng. 7 No, Elisabet-a duo ibui so duo kua tui. Ngga ey, yam so mo nalo dali.
8 Ku ngganemot nogo, Ki Wali yap ba no, trang Abianang lo taiti puit genang ku gemang pung. 9 Se senong: klaya duo seguong-a, Kiki Sip ba nogo degut go, sikabung Israel naklay nogo taiti Ki Wali Iram sono, puit genang. Ngga nang sogo, demutrui no pu go kalik, demu-a tega-nenawon go, Sakarias no gemang taling. Nggano Ki Wali Iram nogo taiti puit genang so, Kiki Sip ba no Sakarias gemang degut. 10 Taitisopupuit go nogo, sikabung miam eygo-a, ketang no yaluim go, dewi so gemang pu-netenawon.
11 Kiki Sip ba sogo no, taitisopupuit go tasemlea idi no, Sakarias mit no Kiwali tamot ip go kekayso blong ey gemang ngap. 12 Kiwali tamot ikum gono, sadui bong ey pling go, suali gemang tra-nawon. 13 No, Kiwali tamot lo pu go, “Mot suali kua tra! Kuno-woyno mot lo pu go dewi, Ki Wali Iram mo tup. Duo sedue denok-a Elisabet mot go kabung lo mea tui. Yohanes so duo ngganemot se temuit! 14 Ku nemot tui go, dabui yakay kangok so mot ey sikabung temu eygo lo mea tra. 15 Ki Wali Iram go suongku nogo blong dega eygo so duo ngga mea pung. Anggul, nggano bu meno don eygo nemot yakua drop. Seni so, nu ba sik so Ki Wali Waglo lo mo tram. 16 Blung Israel sik sogo miam ey, piam go tap itak go Ki Wali Mani Iram go tap sono tandali wawi genang, duo ngganemot lo mea taling. 17 Nabi Elia go waglodon lo, Ki Wali Iram go tap taling genang tamot so nemot mea got-sayon. Unen-nglangin ey denok ngengam go tap nemot lo mea taling-yon. Kuklue so pupluok go nogo, seni eygo nemudi sogo tap-a, nemot lo mea taling. Ngga ey blung Israel naklay Woy Wali Iram ey tegu genang, dali-dali nemot lo mea semu-sing.” b
18 Kiwali tamot go nebut tup gono, Sakarias lo gemang usi, “Esang! Sogo kalik mot lo pen-ato go ya lemoy? Atnamon mo nalo.” 19 Kiwali tamot lo pu go, “Se tup! Genam ngge, Gabliel! Iram demu mit sogo Genam gabe susuing. Ki Wali Iram lo mot-dak go, mot no deguo suey go ngganemot pen so, genam weng go gabe. 20 Kua keng-sreto goso, tasam ngge-a mea lemoy: nebut kua pen goso mot suing go, e... Ki Wali Iram lo pu go ngge lemoy genang ku no mea pung.”
21 Sakarias, Kiki Sip ba sogo nogo, dia sogo sikabung-a kamso bung-netenawon. Ngga ey gemang duduing, “Sogo temoy no Sakarias walong so degu ba so got-ton?” 22 Se ikum: Kiki Sip ba sik so tandali Sakarias pung go mo mawo, nebut yakua pen. Ngga ikum go gemang senong-nenawon: Kiki Sip ba sogo no, Ki Wali Iram sik sogo gemang mo ikum. Nebut yakua pen go nogo, ta seguong lo Sakarias gemang taling-tenawon. Ku ngganemot sik so, Sakarias nebut kua pepen. 23 Ki Wali Iram nogo taitipuit go ku yam gono, yap sono Sakarias gemang nawon.
24-25 Ku walong kua luik gono, Elisabet, Sakarias senun, duo gemang iti-natun. Banu taidi yam so, dia nogo Elisabet kua pung go. Ngga ey dabui ba no gemang pen-tenatun, “Nggeasui go, genam no Ki Wali Iram lo seni eygo-a mo taling gabe. Duo kua goso genam ibe lo piam go, tandali go yakua pu-netegon.”
Yesus tui genang nogo deguo
26 Elisabet duo iti go banu taidi so klaya tete no, Kiwali tamot Ki Wali Iram lo mot-dak go, nan Galilea sogo yakena Nasaret no gemang kunon. Kiwali tamot ngganemot: Gabliel. 27 Ki Wali Iram logo deguo kaguit meno Maria no pen so, Gabliel kunuon go. Maria, duo ngguot meno no baynang mo dok. Yangga, Yusup, babuasi Daut go mlena walasrang no pung go.
28 Maria go yap no, Kiwali tamot degut go gemang pu-tenawon, “Maria! Suey yakay ey. Teguop so, mot Ki Wali Iram lo mo kuoy. Mot ey klay goso Nemot gabe.” 29 Sadui bong ey nemot no Maria pling go, dabui ba lo gemang usi-natun, “Sogo tang so ngga kalik go, Kiwali tamot logo pu-won?” 30 Maria suali sogo ikum gono, Kiwali tamot lo pu go, “Maria! Suali kua tra. Taitiklum-a, Ki Wali Iram lo mo duing gabe. 31 Se tup: sedue denok-a mea iti-lo. Duo ngga tui go, ‘Yesus’ so se temuit! 32-33 Sui eygo sedue so Nemot mea lemoy. Ki Wali Danon so mea pu-netogon. Nemot sono babuasi Daut logo iramdemu, Ki Wali Mani Iram lo mea itak. Iram so Israel no Nemot lo ta mea mlak. Ngga ey, Nemot go blongdon-a senang so mea gigit.”
34 Nggano, Kiwali tamot no Maria lo ngge kalik gemang pu-natun, “Maning sedue kua iti go, sogo kalik deguo ngga ya lemoy-ayun?” 35 Way so, Maria sono Kiwali tamot lo gemang pu-nawon, “Mot blo sono Ki Wali Waglo li go; Duo mot lo se tui-lo. Ngga tang so, ‘Teguop go’, ‘Ki Wali Danon so’ mea pu-netogon.”
36-37 Tandali Kiwali tamot lo pu go, “Kukunu Elisabet no lemoy go, mot mo tup? Duo ibui so nalo go, duonu ey Elisabet gemang. Banu ngge lo taidiklaya tete sogo gabe. Yang! Sedue go duduing nogo, kua lemoy go, Ki Wali Iram lo iwat go-a mea lemoy.” 38 Nggano, Kiwali tamot sono Maria lo gemang pu-natun, “Yang! Genam ngge, Ki Wali Iram go koybutasemu gabe. Nemot lo pu go nebut lemoy-a!” Ngga temu ey, Maria sik sogo Kiwali tamot gemang bewon.
Glop so Elisabet mit no Maria pung go
39 Ku walong kua luik gono, keda so ip-natun go, duen ba tap lo, yakena meno nan Yudea sogo no, Maria ip go gemang-natun. c 40 Nggano pung go, Sakarias go yap no degut go, suey Elisabet no gemang we-natun. 41-43 Maria go, suey tup gono, Elisabet go duo, nu sogo tamasi lek go gemang tra-natun. Ngga ey, Ki Wali Waglo lo Elisabet tram go, don ey gemang pen-anatun, “Kabung naklay sik so, mot-a Ki Wali Iram lo mo kuoy gabe. Teguop yakay mot ey mot go Duo eygo blo so gabe gigit. Ye, Woy Dem go unen mot ngge gabe! Genam ngge nando? Sogo so mot-a genam mit no mo weng? 44 Yang! Mot logo suey tup go yakay so, at go nu ba sogo duo tamasi lek go mo tra-situ. 45 Mot suey yakay ey gabe! Ki Wali Iram go deguo seni so lemoy genang, Mot lo mo iwat.”
Ki Wali Iram sono Maria lo iway klak go
46 Elisabet lo pen go tup gono, ngge kalik Maria lo gemang pen-atenatun,
“Yang! Ki Wali Iram go sui iway-a
seni so blo sono gabe klak-bitugu!
47 Ki Wali Iram! At go Sesuoy Iram Mot-a gabe.
Ngga tang so, genam yakay dega ey.
48 Genam, Nemot go koybutasemu nogo
suey so Ki Wali Iram lo mo duing.
Yang! Nggeasui go sik so, genam sogo suey yakay ey goso
saula-saula naklay lo mea we-netogon.
49 Tasam kangok go genam nogo
Ki Wali Iram go don dega lo mo taling.
Nemot go sui teguop.
50 Yang! Ki Wali Iram no suali ey nando takong go,
nemot nogo-a Ki Wali Iram go gualaklum,
senang so duono-duono mea gigit.
51 Nemot go blongdon lo gabe mlak.
Ngga ey, dabui-a blo dega sono iti go-a,
banom-banom so Ki Wali Iram lo mea suep-lak.
52 Yang! Iramdemu blo sik sogo deguena-deguena,
ku sono iti go Nemot lo nik go,
way so blo sono sui kua go sedue-a iti go mea klak.
53 Tenday go sikabung Ki Wali Iram logo taiti miam ey mea idok.
No, taut mata sogo sikabung-a,
ta ulue so yat go mea klong-lak.
54-55 Tegadi so babuasi no dok go kalik,
Nemot go dem sop, blung Israel nogo-a mo iwat gabe.
Babuasi Ablaham ey nemot go mlena walasrang eygo no
taling go gualaklum Nemot lo gabe duduing, tong kua tong.”
Iway Maria lo klak go ngge no yam.
56 Se senong: Elisabet mit sogo banu nangglik ey suing gono, nemot go yap no Maria gemang natun.
Yohanes tui go
57 Duo tui genang ku pung gono, sedue denok Elisabet lo gemang tui-natun. 58 Nemot go yap tenglam, kukunuyap, menggo, Ki Wali Iram lo taling go gualaklum tup gono, Elisabet ey tegu go, klay gono yakay gemang semu-nenawon. 59 Saduisuk tong genang, ku taidisonangglik tete no gemang pluep-nenawon. Ngga ey, nemotnang go duduing no, nglangin go sui Sakarias so, gemang temuit-nenawon. 60 No, unen lo pu go, “Ngga kalik kua, Yohanes so se temuit!” 61 Way so tenguo-nenawon go, “Mot go duomenggo, sui ngga kua go.” 62 Ngga ey, nglangin ta lo taling go, gemang usi, “Nando so ya temuit?” 63 Sakarias lo ta-a gemang taling-nawon, “Sam klik-a iti-a!” Nggano, gemang klik-nawon: Yohanes.
Sikabung ikum go, nemotnang ey gemang nega-nenawon. 64 Woy ngganemot dali no, Sakarias lom ngang go, nebleng suey go, nebut gemang tuot. Ngga ey, Ki Wali Iram sono iway gemang iti-nawon.
65 Ngga sogo sikabung, kangok so tawasrang gemang glok nenawon. Ngga sik so, nebut ngge iway, masi kapso-kapgo, nan Yudea sogo kumeduim naklay lo gemang tup. 66 Ngga tup go, walong so kunala duing go, gemang usi-netenawon, “Duo ngga sogo so ya lemoy-yon?” Yang! Duo ngganemot Ki Wali Kumam go ndengtabang lo yay gemang suing.
Ki Wali Iram sono Sakarias lo iway iti go
67 Blung Israel go Ki Wali Iram sono Ki Wali Waglo lo nglangin Sakarias tram go, senongduduing ey iway gemang klak-tenawon:
68 “Ki Wali Mani Iram, blung Israel go Woy Wali Iram!
Mot go sui-a, blo sono se pupu!
Mot go blung taitak genang so, Mot lo mo iwat gabe.
69 Sesuoy Iram don dega eygo-a,
imot nogo so mot-dak go, mo pung gabe.
Yangga, Daut sik so mlena walasrang pung go.
70 Banim dega so, Nemot go nabi-nabi teguop golo,
tegadi ngge Ki Wali Iram lo dok-nengam go:
71 plesi go don sik sogo atnang mea pung.
Koy saula go ta sik sogo, sesuoy so atnang mea uwawi.
72 Ngga kalik golo,
imot go babuasi nogo gualaklum Ki Wali Iram lo gabe tetaling.
nggano dabui klaut no dok-ngam go tegadi ngga,
Ki Wali Iram lo gabe duduing:
73-75 Babuasi Ablaham sono,
Nemot go sui no ta ey nat-ngam go tegadi:
- plesi go ta sik sogo imot plet-dak go;
- suali kua go ey, dabui lo, nemudi so,
Ki Wali Iram ey klay goso imot susuing genang.”
76 Sakarias lo tandali pen go,
“Yohanes, demsop!
Ki Wali Kumam go tamot so mot mea pu.
Woy Wali Iram nogo tap dali kebo genang,
mot-a banim no se besi.
77 Nemotnang go kuklue piam konkebamling
kekayso suep go tang so,
sesuoy tap blung nogo, mot lo se taling.
78 Yang! Ki Wali Iram go gualaklum katu ey go tang so,
Blo sik sogo Blong imot blo sono woy kalik mea ngap.
79 Nemot weng golo, kuklik go ba sogo
kebong go kalik susuing go nogo, blong mea pung.
Ngga ey, ngengam ba no imot mea wali.”
Sakarias go nebut, ngge no yam.
80 Kunala don ey suey so Ki Wali Waglo lo tetaling go ey, Yohanes gemang babu-daptenawon. Sedue so lemoy go, kaseglokpay so gemang wali-daptenawon. E... kebali tamlak genang so, blung Israel no gemang taling.