16
Woy Dem Yesus tandali nglong go
1 Sabat yam so semu gono, Maria Makdalena, Maria, Yakobus go unen, nggano Salome, nemotnang didop nemon ey go, Yesus go saysuk temoy no ut genang sogo so, duoy lo idok so gemang klong. 2 Ku Minggu, wadikua, woy masi tetega, nemotnang Yesus temoy tui go sip sono, gemang betun-lak. 3-4 Koklong gono, tap no nemotnang way-way so gemang usi-neton, “Nando lo imot nogo tebok go, demu kangok go put nogo ngga, ya leging-bayon?” Nemotnang pung go, ikum go, demu ngga put sik sogo mo leging. 5 Nggano, Yesus so tui go sip ba sono degut-nebawon go, sedue ngguot meno amka klaut ey kok go, tasemla idi so, got-ton.
Nemotnang ikum go, nemot no pling go, suali ey gemang tra-nenawon. 6 Nggano ngge kalik gemang pu-ton, “Ey, suali kua tra! Motnang Nasaret sik sogo sedue, di no tegak goso, wet-ketegoy? Nemot mo nglong! Nemot so tui go sip-a ikum-a.” 7 Nggeasui go, motnang klong go, Nemot go andua-andua nogo se pen-kebalo! Nggano Petrus nogo se pen dali! Nemotnang no se pu, “Yesus, nan Galilea no, banim mea pung, motnang mesip so se keng! Nggano, Nemot mea ikum-nebayon. Ngga naklay Nemot lo banim so, mo pen go kalik so gemang!” 8 Ngga kalik so tup go, nemotnang sip ngga itak go, suali kangok so, bobong ey tra goso, gemang kuek-nekunon. Nemotnang, suali ey go nogo, sikabung meno no pen genang sogo yakua.
[No, tebot so, Petrus ey andua-andua ey go nogo-a pen go. Nggano, Yesus tang golo, nemot go andua-andua no tebok go, deguo teguop e … seding no-seding no gemang pepen klong.]
Markus go nebut banim go sik sogo ngge no yam!
No, Markus logo yam sogo nebut meno gemang dali. Ngge kalik so.
Yesus, Maria Magdalena mit no pung go
9 [Ku Minggu, wadi kua seni, Yesus, nglong go, Nemot go saysuk, banim seni, Maria Magdalena no gemang taling-nawon. Yesus lo kuasep kua seni go, 7 yam so, nemot ba sik so yat-nayom go, mo pung. 10 Ngga no, Maria Magdalena lo klong go, Nemot go andua temu, genuing so got-neton go nogo, gemang pen-anatun. 11 Maria lo Yesus wali go ikum-batun go, nemotnang no pen go. No, nemotnang tup go, kua keng-nesrenawon.
Andua namon ey, Yesus tegu go
12 Ngga sik sogo, Nemot, saysuk meno so iwot go, namon duo ey gemang tegu-nawon. Namon duo nemot, kota sik so koklong gono, tap no gemang tegu-kenawon. 13 Ngga sik sogo, tandali teguey go, kota sono klong go, nebut ngganemot andua-andua temu no gemang pen-klenawon. No, nemotnang ngga tup go, kua keng-nesrewon dali. 14 Yam seni sogo, Nemot go andua 11 yam sogo, ten so dedam go mit no, pung go, Nemot go saysuk gemang taling-nawon. Nggano, Yesus lo nemotnang no bebat go, gemang pu-won, “Motnang wengkabui demu kalik so! Motnang mot go andua meno lo pen go nebut, tup go, kua tup go kalik so. Seni so, motnang Genam nogo suey so kua duduing.” 15 Nggano gemang pu-tenawon, “Motnang, nan seding no-seding no, kenalo go, sikabung naklay nogo, deguo teguop maning wali so suing go nogo se pepen klong! 16 Nando sedue, maning walinebut ngge dabui ba no mo king go, don so mea lemoy. Nemot tup go, bu degut go, ngga sesuoy, wali sono mea pung-asayon. No, nando, kua tup go keng go, nemot nogo idekeba mea iti. 17 Tasam-tasam ngge, mo keng go sikabung ey, mea koklong dali, ‘Nemotnang lo, Genam go sui ba no, londa pu go mea yat, nebut wot go, nenep sogo nebut so mea pen dali. 18 Nemotnang logo, lema iseng ey go ta lo mlak, nggano, iglom ip drop go nogo, mea kua kebong. Sedue kabung sadui sogo blo no nemotnang lo ta tui go, sedue ngganemot sadui mea suey.’ ”
19 Woy Dem Yesus nebut ngganemot kalik so yam so pen gono, Nemot Wali Sip sono, blo sono klak go, Ki Wali Iram go ta semlea idi no gemang suing. 20 Ngga sik so, nemotnang ngganemot lo, Deguo teguop, masi kap so-kap go, e... nan seding no-seding no, gemang pen klong. Ngganemot ba lo, Woy Dem lo, Nemot go tamot-tamot no tebok go, tasam-tasam kangok go gemang lemoy dali. Sedue kabung ikum gono pu genang, “Nebut ngge seni so, don kangok dega!”]
Markus lo klik go nebut ngge no yam.