15
Yesus go piam Pilatus lo wet go
1 Ku ngganemot no, maning wadi kua seni, Yahudi go iram-tegay naklay, nebut gemang suing-nenawon. Ngga: ‘Sanhedrin’. Nemotnang klaya goso lemoy go, Yesus kebong genang sogo, gemang pu-nenawon. Nemotnang tang sogo yakua but go kebong. Ngga sogo so, Yesus dok go, wawi go, Roma go wengkabui Pilatus nogo so gemang pu-nenawon. 2 Nggano pung gono, Pilatus lo Yesus no gemang usi-nawon, “Mot ngge Yahudi go Iram nemot seni so?” Yesus lo pu go, “Mot tang so ngga mo pu-nato!” 3 Nggano Yahudi go trang-trang ip go, Yesus go piam ta lo semu go mata so gemang pen-nenawon. 4 Pilatus lo Yesus no tandali gemang usi-nawon, “Nemotnang lo Mot sogo nebut mata so pen-newon go Mot logo nebut way yakua pu-srelo?” 5 No, Yesus nebut way klaya genang kua pu-srenawon. Ngga sik so Pilatus ey gemang nega-nawon, “Ngge, sogo kalik go sedue?”
Yesus ey Barabas ey nando-a ya itak
6 Pilatus mo mlay, walop Paska nang sogo, klaya duo boy ba sik sogo, ta mea itak. Sedue kabung tang so kuoy go, ngga-a mea itak. 7 Ku ngganemot nogo, sedue meno gemang, nemot go sui: Barabas. Nemot sedue temu ey sagui pung go, sedue mo but go kebong. Ngganemot sogoso nemotnang naklay boy ba no mo betep. 8 Walop Paska ku pung go nogo, sikabung mata so weng-lak go, Pilatus no gemang pu-nenawon, “Aya! Mot go mlay go kalik, nggeasui go, tandali se semu!” 9 Pilatus nemotnang go nebut tup-nawon gono, gemang usi-ton, “Motnang lo duing go sogo kalik so, genam lo, Yahudi go Iram ngge-a ya itak?” 10 Seni so, Pilatus mo senong, Yahudi go trang-trang lo, dabui sadui tra go tang sogoso, Yesus nemot go ta no mo itak. 11 Ngga sik so, Yahudi go trang-trang lo sikabung mata sogo nebut lo lekok go, ngge kalik gemang pen-netenawon, “Barabas-a mea itak!” 12 Pilatus ngga kalik tup gono, tandali gemang usi, “Motnang lo pu-ketogoy go, Iram ngge nogo, sogo-a, ya semu-lu?” 13 Iram so pu go tup gono, nemotnang lo gemang bega-netenawon, “Kua, Nemot-a di temoy no se tegak!” 14 Nggano Pilatus lo tandali gemang usi-nawon, “Esang, tasam piam go sogo kalik go temoy no Nemot di nogo ya tegak?” No, nemotnang lo tandali kangok so gemang bega-netenawon, “Nemot-a di no se tegak go kebong!” 15 Sagui ngga ikum gono, sikabung mata sogo lo duing go kalik, Barabas, boy ba sik sogo, ta gemang itak. Nggano nemotnang go ta sono Pilatus lo gemang iti. Yesus-a demun suey gono, di no tegak genang so, nemotnang go ta sono gemang itak.
Roma go plesedue lo Yesus wayang go
16 Ngga sik sogo, Yesus seboy sik so, yap kangok go degu nebut so pupu go, dia sono plesedue lo wawi go gemang degut. Plesedue temu naklay, sip ngganemot sono pu go gemang pluep-nenawon. 17 Nemotnang lo, Yesus nogo Iram go srem kok-nenawon go, nemotnang go demu kalik, amka walong go wot sani suk sogo iti go gemang kok. Nggano teganwong rlok go, nali tete so, wengkabui no gemang kut–nenawon. 18 Nggano, Nemot so ngge kalik gemang waysro-netenawon, “Suey! Mot, Yahudi go Iram naklay go dega!” 19 Ngga kalik so pupu gono, nemotnang lo wotang demun lo wengkabui no bubut, nggano nglabui lo gemang suop-netenawon. Ngga sik so, segabuem unuik go, Nemot no susubu gemang wik-neton. 20a Ngga kalik yam so waysro-newon gono, srem tandali sok go, Nemot go amka iti go, tandali gemang kok-nenawon.
Yesus di no glung go
Markus 13:20b-32
20b Ngganemot no, Yesus di no tegak genang so, wawi go, dia sono gemang pung. 21 Ngga sogo sedue meno gemang koklong. Nemot go sui: Simon, nan Kirene sik sogo. Seni so, sedue ngga Aleksander ey Rupus dem ey go nglangin. Nemot usu sik so demening kota no dedegut gono, plesedue lo mlak go, Yesus tegak genang di lek sogo gemang plong-nenawon.
22 Nemotnang lo Yesus sip meno sono wawi go gemang klong. Sip ngganemot go sui: Golgota. Golgota nemot go seni: ‘wengkabui don sip’. 23 Nggano, Yesus go iseng temu kebui genang sogo so, anggul, mur ey iwot go, Nemot no gemang leguit-nenawon. No, Nemot lo bu ngganemot gemang tenguo-nawon. 24 Ngga ey, Yesus di no tegak-newon go, Nemot go amka wasey genang sogo, undi betep gono, plesedue lo gemang wasey-nenawon. a
25 Yesus, di no tegak-nenawon go, wadikua woy klak go no woy 9 wadikua. 26 Nggano Yesus go wengkabui blo nogo, sam ngge kalik go gemang tebok, ‘Ngge Yahudi go Iram gabe.’
27 Sinebutsi namon ey gemang. Nemot ey kerlam-kerlam so di no tegak dali go, meno ta semlea idi no, meno ta kali idi no.
[ 28 Ngga Sam Klaut ba no klik go ey mo kerlam-anatun, “Nemot si nebut si ey di no tegak go, ngga ey Nemot sedue piam goso mea pu dali.”] b
29-30 Sedue kabung ngga lo koklong go, ikum-neton, susu nglok ey, ngge kalik gemang waysro-netenawon, “Ey, Mot lo pu go, Wali Yap togut go, nggano ku nangglik ba no tandali klik go, Mot go saysuk tang sogo, wali go suey-a! Nggeasui go di blo sik sogo li-ekundo-a!” 31 Yahudi go trang-trang ey Musa go demu so ngunguok ey golo, nemot go seguong so, ngga kalik dali so Yesus sogo gemang waysro-nenawon, “Meno duo-a Nemot logo mo suey! No, Nemot go saysuk tang go, sang yakua suey. 32 Mot ngge Blong Iram, Ki Wali Iram lo kuoy go sikabung Israel ta itak genang sogo. Ngga kalik seni sogo, di blo sik sogo se li-kundo! Ngga ikum go tang sogo so, genamnang naklay, Mot nogo dabui lo mea keng.” Ngga kalik dali, Nemot ey kerlam so tegak go sedue logo, gemang waysro dali.
Yesus kebong go
33 Wabedong go, woy nesip nogo, sip ngga naklay kekayso ku gemang klik-anatun. E... use woy yam no gemang pung. 34 Kiklik go yam gono, ngga woy nangglik nogo, dabui walong so go, Yesus lo ngge kalik so gemang pu-biwon, “Eloi, Eloi, lema sabaktani.” Ya, ngga, Iblani nebut sogo nemot go seni, ngge kalik so, “Aya sop! Aya sop! Sogo so, Genam banom itak-to?” c 35 Ngga so got-netenawon go sikabung, tup go no, Yesus logo nebut suey so kua senong goso, gemang pu-nenawon, “Tup-a! Nemot nogo tebok genang sogo so, Nemot nabi Elia so usi-biton go.” 36 Ngganemot sogoso, sedue klaya duo ip go, keda so ding-kuem gemang iti. Nggano, di no kok-nawon gono, anggul bete ey go ba sono suik go, Yesus go lom sono, Nemot suop genang so gemang leguit-biwon. Ngga ey sedue ngga lo gemang pu-ton, “Imotnang nemu se luik, nabi Elia pung go, Yesus di blo sik so tebuo go, ku sono ya li.” 37 No, i go sogo, kayang klik go, dabui itak-lak go, se kebong-nawon. 38 Woy ngganemot nogo, Ki Wali yap go degu sogo amka glung go, blo sik so tegek go, e... ku no pung go, namon ey gemang lemoy-anatun. Ngga nemot go seni: Yesus kebong go tang so, sikabung naklay Ki Wali Iram ey go, gabe tegu. 39 Woy ngganemot nogo, plesedue wengkabui, Yesus no nemu bung-ton go, Yesus ngga kalik kebong go ikum go, gemang pu-nawon, “Esang, seni so lo! Sedue ngge Ki Wali Iram go Danon.” 40 Nemu so bung-netenawon dali go, kabung-kabung gemang. Nemotnang sik sogo temu, Maria Makdalena, Maria, Yakobus seguay go ey, Yoses ey go unen, nggano Salome gemang. 41 Seni so, Yesus nan maning nan Galilea sogo nogo, nemotnang ngganemot Yesus no mo keng. Nggano Nemot go wali nogo gemang mo tebok. Kabung temu ey mata so ngga kalik mo tebok dali. Nemotnang naklay Yerusalem no Yesus ey keng go uwet-lak go.
Yesus kebong go Nemot go temoy demu put ba no tui go
42-43 Ku Sabat suing genang sogo, mo dedagu goso, sikabung lo, sogo-sogo dali semu go, gemang bung-netenawon. Ku yam so se kiklik, Yusup, nan Arimatea sik sogo, gemang banuon. Nemot ngge, Yahudi go trang kangok go meno. Nemot, Ki Wali Iram go ku pung genang sogo, kangok so duduing. Dabui don kok go, Pilatus mit no bewon go, Yesus go temoy gemang wadong-nawon. 44 No, Pilatus, Yesus kebong go tup go, nemot lo duing go, “Esang, sogo kalik go Nemot keda so mo kebong?” Ngganemot no, plesedue wengkabui tra go gemang usi-nawon, “Yesus seni so mo kebong?” 45 Plesedue wengkabui lo, Yesus kebong go nebut yam so pen go, tup gono, Pilatus, Yesus go temoy tebuo genang Yusup nogo gemang yang-nawon. 46 Ngga ey, Yesus di blo sik sogo, Yusup lo ku sono tebuo go, nggano amka lenan walong go, duoy lo iti golo, temoy gemang pok-nawon. Nemot logo demu put ba no tui gono, demu meno leging go, put gemang wik-nawon. 47 Seni so, Maria Makdalena ey, Maria, Yoses go unen ey, Yesus so tui go sip nemu suey so mo luik-klenatun.