13
Ku yam sogo no lemoy genang tasam-tasam
1 Ku meno no Yesusnang, Ki Wali Yap ba sik sogo pung gono, Nemot go andua meno lo Yesus no ngge kalik, gemang pu-tenawon, “Aya klui, ikum-a! Yap ngge dega. Nemot go demu, kangok-kangok golo klik go.” 2 Yesus lo way so tenguo go, “Motnang yap kangok go ngge, nemu se luluik ketogoy! Yap so klik go demu ngge naklay, ku meno no togut go mea net-ayun. Klaya nang go, demu meno-meno blo so itak go gigit go, yakua ikum.”
3 Ku ngganemot nogo, Yesus meduim Saytun blo no klak go pung gono, Ki Wali yap sono, dabui iwot go gemang got-nawon. Nggano, Petrus, Yakobus, Yohanes, Andreasnang-a Yesus ey banom gono, gemang usi-nenawon, 4 “Aya klui! Genamnang nogo se pen-alo! Mot lo pen go ku ngganemot, kaning so ya lemoy-ayun? Nggano, ku ngga pung go nogo, sogo kalik go tasam no, genamnang ya senong-elu?”
5 Ngga sik so, Yesus lo, nemotnang nogo nebutmang, ngge kalik gemang king-nawon, “Kunala temoy no se susuing! Motnang sedue lo, tap meno piam golo taling ey go! 6 Nemotnang lo weng go mata so, Genam go sui no wamoy sogo mea pu-netegon, ‘Genam ngge, Blong Duo gabe.’ Ngga kalik golo, sikabung mata sogo nemotnang lo tap meno piam golo gemang ya tetaling. 7 Nggano, ple nebut, nggano plepung go kluim tup go nogo, motnang dabui belui go, suali kua tra! Ngga naklay mea lelemoy, no, ku ngganemot pung genang, maning gemang. 8 Seni so, saula meno, saula meno ey, nggano nan meno, nan meno ey, ple mea tui-neyon. Nggano, sip naklay nogo, kuysu kangok so mea lek. Nggano, sip meno nogo ten mea kua. Ngga naklay, ku suey go semu genang iseng tang tui go, kabung duo tui sogo so iseng tra go kalik so. 9 No, motnang tang go, kunala temoy no se! Genam tang sogo so, motnang, Yahudi go iram-tegay yaluim go sono, lek go, nggano tegan lo demun mea suey. Nggano saula meno go wengkabui sono motnang tang-usi genang so mea wawi. Ngge lemoy go, motnang se senong. Ngga, motnang lo, Genam go walitap pen genang sogo ku gemang. 10 Seni so, ku ngganemot maning kua pung gono, Genam go wali tap-a, motnang lo saula-saula naklay nogo, banim no se klong go pen! 11 Ngga sogo so, motnang mlak gono, tang-usi go nogo, suali kua tra! Kunala walong so kua duing. Sogo kalik go-a ya pen-nalu! No, woy ngganemot nogo, motnang lo mea kua pen, Ki Wali Waglo lo dabui ba no plok go-a, motnang logo se pen! 12 Esang, ntaton lo nemot go ntaton but go kebong genang sogo, mea iti. Ngga kalik dali so, nglangin ey danon ey go mea lemoy. Nggano, denok lo unen-nglangin nogo wayang go, amble go ta sono kebong genang so mea iti. 13 Seni so, Genam go sui tang sogo so, motnang nogo dabuipiam mea semu-netegon. No, motnang sik sogo suey so don ey got-sayon go, nemot sesuoy so yakay ey mea pung-asayon.
Idekeba kangok go mea pung
14 Motnang suey so se senong: Wali Yap ba no kudemat kong go, ngga Sinebutsi go tasam, ikum gono, motnang ngge se semu! Motnang, Yudea sikabung, meduim blo sono se kuek-lak! 15 Nggano, seboy so susuing go sikabung, yap ba teguop ey kua degut, taut ikak genang sogo. 16 Nggano, usu sogo sikabung, amka ikak sogo, teguop ey kua teguey dali! 17 Esang, ku ngganemot nogo, mianang, duo nu sogo ey duo min so maning leleguit go ey, nemotnang go ide kangok. 18 Ngganemot sogo so, motnang, don ey dewi se pupu, yaguisa dalip kangok go ku no, lemoy ey go. 19 Seni so, iseng kangok go ngganemot kalik go, ku blung kong go sik so, e... nggeasui go ku no pung go, maning kua lemoy. Seni so, ngga blo idi logo, tandali go mea kua lemoy dali. 20 Iseng ku ngganemot, tebot so, Ki Wali Iram lo kua tong mo, klayanang go yakua wali. No, Nemot lo kuoy go sikabung no duing go tang sogo so, ku ngganemot, tebot so Nemot lo mea tong. 21 Ku ngganemot nogo, sikabung lo motnang no pu go, ‘Ba ikum-a! Blong Iram, ngge sogo! Blong Iram ngga sogo!’ Nebut ngga nogo, motnang, kua tup go keng! 22 Seni so, Blong Iram kalik go sedue, nggano tamot piam go wamoy sogo mea pluep-neyon. Nemotnang lo tasam-tasam, mea semu, blong duoyap Ki Wali Iram lo kuoy go, wamoymlue ngga lo, yatrang nega genang sogo so. 23 Ngganemot sogo so, motnang kunala temoy no se! Motnang naklay nogo, Genam lo banim temu no gabe mo pen-ategu.
Blong Dem pung genang nebut
24 Sesat ey bete ey go ku ngga yam go nogo, woy neblong mea kenip, nggano, banu neblong mea kua pli dali. 25 Ut ba sik sogo top, mea net-lak. Nggano, ut ba demat go don suep-lak go, bubong ey mea king dali. 26 Ngga naklay lemoy gono, Blong Dem, don ey Nemot go blong ba lo, kenuim ey uweng go, sikabung naklay, nemot go nemu lo mea ikum-neyon. 27 Ku ngganemot nogo, Blong Dem lo, Nemot go Kiwali tamot, mot go, nan seding no-seding no, klong go, Nemot lo kuoy go blong duoyap, woy sut idi sogo, woy klak idi sogo, dun idi sik sogo, nggano sada idi sik sogo, ut sring-nan sring sik sogo mea pluep-lak. Nemot go blung so lemoy genang sogo.”
28-29 Yesus lo pen go, “Ngga naklay lelemoy go sogo, yatrang ngge se ikum: duot kali sabang woy pli golo, di tuik net gono, tandali go blup mea kong. Ngga sik so motnang mo senong, woy seni mea pli-ayun. Ku lemoy genang sogo tasam, ngga kalik dali se senong! 30 Genam lo motnang nogo, seni-seni so, gabe pen-ategu. ‘Sedue kabung da ngge maning nogo, ngge naklay mea lemoy-ayun.’ 31 Yang! Ut ey nan ey go mea nega. No, Genam lo pu go nebut ngge klaya nang go, yakua nega.”
Blong Iram pung genang ku sikabung kua senong
32 Seni so, ngga lemoy genang sogo, ku ey woy ey, sedue klaya go nang kua senong, Ki Wali sip ba sogo Deguo sedue kua senong, Nemot go Danon tang go, kua senong dali. No, Ki Wali Aya tang so gemang senong. 33 Ku ngganemot lemoy genang, motnang kua senong, nago ku no ya lemoy. Ngganemot sogo so, motnang, wali yay wegeng ey kunala temoy no, se susuing. 34 Genam ngganemot nogo yatrang meno ngge kalik so mea pen-alu: Sedue meno tap masi kukua gono klong go, nemot go yap, yay so susuing go sedue no gemang itak. Nemotnang naklay, nemot go-nemot go kebali taling go, gemang itak-nawon. Nggano yatap yay so susuing gono pu go, yay suey so se susuing! Ngga ey, nemot gemang klong. 35 Mot go wali yay, suey so se susuing. Motnang kua senong, ku nago yam no, yap sedue ngganemot tandali go ya pung-ayon? Woy susut gono, wadi ku nesip yam no, ku nebit yam no, wadikua seni ku maning kua tegek gono, ya pung? Seni so, Nemot weng genang woy, imot kua senong. 36 Esang! Motnang usene so srek go ba no pung ey go! Nggano, nemot ikum go, motnang yay, suey so kua susuing. 37 Nebut ngge motnang nogo seguong so kua pen-sretu, no, sikabung naklay nogo, ngga kalik dali gabe pepen: Wali kebali nogo yay se susuing!