14
Yesus but genang sogo nebut suing-newon go
1 Ku namon dali no, Yahudi go Walop Paska ey, Loti ragi kua go ey dam genang mea lemoy. Ku ngganemot nogo, Yahudi go trang-trang ey Musa go demu so ngunguok go ey, nebut got-nenawon go, Yesus, wamoymlue lo mlak go but genang sogo tap gemang wet. 2 Nemotnang goso duing-nenawon go, “Tasam ngge, walop ba lo yakua semu. Sedue walop so pluep go, tup go, sagui ey go”
Yesus kebong genang sogo mlay, banim temu so ut go
3 Ku ngganemot nogo, Yesus, yakena Betania so, Simon-dem yaulat mo suey go yap ba so, ten so dam-tenawon gono, kabung meno gemang degut-natun. Nemot lo mlay kinemon ey go iti go, samonsuip go blindon bung go, Yesus go wengkabui blo sono gemang pi-situn. Seni so, mlay ngganemot duoy kangok golo iti go 4 Sedue kabung, ngga so got-netenawon go, ngga ikum go temu lo, nemotnang goso dabuipiam ey, way-way so gemang pen-netenawon, “Esang! Ngga kalik tebadali betep go. 5 Mlay ngganemot, duoy nay so iti go, duoy mata sogo ngganemot sikabung taut kua go nogo iti go, ngga suey.”
6 No, Yesus lo pu go, “Esang, nueya! Sogo so, nemot bebat-ketogoy. Nemot lo tasam suey go ngge, Genam nogo so, mo semu-tun. 7 Seni so, taut kua go sikabung, motnang ey, kuno-kuno gabe ya got-ketogoy. Nemotnang tebok genang sogo ku mata so. No, Genam, motnang ey ku no-ku no, senang so yakua susuing. 8 Tasam ngge, nemot lo kunala ba no tra go tang so, dabui lo mo semu-situn gabe. Nemot go seni: Genam maning kua kebong gono, nemot lo Genam go saysuk nogo mlay banim temu so gabe mo ut-situn. Ngga sedue Yahudi go demu kalik, mlay ut-tun go 9 Ngganemot sogo so, Genam seni-seni so, ngge kalik gabe pepen, ‘Nago no deguo teguop, nan seding no-seding no pepen klong go nogo, tasam suey go ngge tang so, kabung ngge go sui, mea pepen klong dali, yakua kay!’ ”
Yudas no klay duoy trang-trang lo iti go
10 Yudas Iskariot, andua 12 sik sogo meno, Yahudi go trang-trang mit no nawon go, Yesus nemotnang go ta no itak genang sogo nebut, gemang pen-nawon. 11 Trang-trang nebut ngga tup-newon go, nemotnang yakay tra gono, Yudas nogo klay duoy iti gemang so gemang pu-nenawon. Ngga sik so, Yesus nemotnang go ta no itak genang sogo, ku suey go, Yudas lo gemang wet-won.
Walop Paska nang sogo ten, Yesus, Nemot go andua-andua ey dam go
12 Ragi kua go loti dam genang walop, ku pung go, sedue Yahudi naklay, walop Paska semu genang sogo domba mea tong. Ngga sogo so, Yesus no Nemot go andua lo gemang usi-nenawon, “Mot lo duing go, nago no imot nogo Walop Paska ten dam genang sip semu gono, ten ya ta?” 13 Ngga ey, Nemot go andua namon no gemang pu-nawon, “Motnamon kota Yerusalem no se klong! Ngga sogo sedue meno, bu buot ey kong go koklong go ikum go, nemot no se keng!” 14 Nggano nemot ey yap ba no degut gono, yap wengkabui no, ngge kalik se usi, “Imot go klui lo usi go: Nago no Genam, andua-andua ey ten dam genang sip dali mo semu? Walop Paska nang sogo ten dam genang.” 15 Nggano degu kangok go, blo sogo dali mo semu go, yap wengkabui lo gemang ya taling. Motnamon, sip ngganemot no Walop ten dali se ta-klenalo! 16 Ngga ey, nemotnamon kenawon go, Yerusalem no pung gono, Yesus lo nemotnamon no pen go kalik gemang ikum-klenawon. Sip ngganemot no, walop ten dali-dali gemang semu-klewon.
17 Ku kiklik gono, Yesus Nemot go andua 12 yam sogo ey, sip ngganemot no klong go, gemang pluep-nenawon. 18 Nemotnang ten so suing-lak go dedam gono, Yesus lo nebut ngge kalik so gemang pen-atenawon, “Seni so, motnang sik sogo sedue meno lo Genam klay gemang ya semu-yon. Esang, nemot, Genam ey klay gono ten gabe dedam.” 19 Ngga kalik so tup-nenawon gono, Nemot go andua-andua u dabui ba logo gemang tra-nenawon. Ngganemot sogo so nemotnang klay-klay lo gemang pu-netenawon, “Esang, genam lo yabung!” 20 Yesus lo pu go, “Yang! Sedue ngganemot motnang 12 sik sogo, Genam go bu drop sip klaya go ba sono loti suik go mea dam.” 21 Nggano Yesus lo pen go, “Seni so, Wali Sam klaut ba no klik go kalik, Blong Dem tandali ngge sik so Ki Wali Sip no tandali mea ip-yon. No, esang! Blong Dem klay so duing go sedue! Nemot nogo idekeba kangok! Kukunan blo nogo kua tui go, nemot suey!”
Blong Dem kua kay genang sogo ten dedam taling go
22 Nemotnang ten so dedam gono, Yesus lo, loti iti go, ta iti suey pu gono, betok go, Nemot go andua-andua no wasey go, ngge kalik gemang pu-tenawon, “Ngge, Genam go saysuk gabe, iti go se dam!” 23 Ngga ey, anggul bu tegun klaya iti go, taitisuey pu gono, Nemot go andua no iti go, naklay gemang drop-nenawon dali. 24 Ngga ey, nemotnang no ngge kalik so Yesus lo gemang pu-tenawon, “Anggul bu, ngge Genam go kin gabe. Ngge, Genam go tegadi dok go kin, ibe nogo so pi go” 25 Motnang nogo, seni-seni so gabe pen-asitegu, “Anggul bu ngge genam tandali go yakua drop, e... Ki Wali Yakena ba no yaluim go ku no, anggul bu inim-a, Genam mea drop.” 26 Ngga sik so, Ki Wali Iram nogo iway lek genang u sam, kluo-nenawon gono, meduim Saytun no gemang klong-lak.
Petrus lo Yesus mea wayang
27 Ngganemot no, nemotnang no, Yesus lo gemang pen-atenawon, “Sam Klaut ba no klik-nengam go, ngge kalik so gabe,
‘Domba yay so susuing go sedue, Ki Wali Iram lo mea but,
nggano nemot go domba suali so, banom-banom mea teglik.’ (Zakharia 13:7)
Ngga sik so motnang nogo ngga kalik so mea lemoy. Kekedik go sik so motnang lo Genam itak go mea kuek-kelo.” 28 No, Yesus lo pu go, “Genam, tandali nglong gono, nan Galilea no banim mea nalu.” 29 Nebut ngga tup gono, Petrus lo Yesus no gemang pu-nawon, “Esang! Nemotnang temu-a, dabui belui go teguey go, nueya! No, genam seguong-a, dabui demu king go, mea kua teguey!” 30 No, Yesus lo way so nemot no ngge kalik gemang pu-nawon, “Petrus, mot nogo-a, seni-seni so, sang, gabe pen-asitugu, ‘Kemaning wadikua gono, ayang da namon tete sogo, maning kua tuot gono, mot lo da nangglik yam so, Genam mo wayang.’ ” 31 Nggano, Yesus lo pu go nebut so, ngge kalik Petrus don ey gemang waydang-nawon, “Seni so, genam Mot yakua wayang! Mot ey go genam mea kebong dali!” Andua temu logo ngga kalik dali gemang pu-nenawon.
Usu Getsemani no, Yesus lo Ki Wali Iram no dewi pu go
32 Nggano Yesus Nemot go andua-andua ey, usu Getsemani no pluep gono, nemotnang no gemang pu-tenawon, “Motnang, namboy ngge so se bung-ketegoy! Genam dewi pu so gabe se tegu.” 33 No, Petrus, Yakobus, nggano Yohanes, Nemot ey klong genang so gemang wawi-nawon. Ngga nogo, Yesus dabui ba don kua golo, bobong ey gemang king. 34 Nggano, nemotnang no gemang pu-tenawon, “Genam go dabui ba lo u kangok so kebong sogo kalik gabe tra-tegu. Motnang ngge sogo, yay se suing!” 35 Ngga kalik pu-won gono, walong so maning kua klong gono, nan blo sono unuik go gemang pui-nawon. Ngganemot no dewi gemang pu-nawon, “Woy ngge lemoy genang sogo tasam, sang kua lemoy!” 36 Nemot lo dewi ngge kalik pu go, “O, Aba, Wali Aya, klayanang go yakua lemoy go, kua. Mot go duduing-a, naklay-naklay se lemoy. Ide keba ngge, Genam blo sik sogo, sang tebo kundo-a! No, Genam go duduing-a kua lemoy. Mot lo duing go kalik so, sang se lemoy!” 37 Yesus, tandali kunuon go, Nemot go andua usene so srek-netenawon go, gemang ikum-nawon. Nggano, Petrus no gemang pu-ton, “Ey, Simon, mot usne-a to-tegoy? Mot nemu sogo woy klayanang go yay, yakua suing? 38 Yay se susuing, dewi se pupu, motnang kuklue ba sono pui ey go. Seni so, duduing-a, suey so gabe. No, saysuk ngge don kua.” 39 Ngga kalik so pen gono, Yesus tandali gemang bewon. Nggano, dewi ngga kalik dali so gemang pu-nawon. 40 Ngga sik sogo, tandali kunuon go, nemotnang usene so tandali srek go, gemang ikum-nawon. Esang, nemu ide ey go sik so, nemotnang nebut way kua tenguo. 41 Ngganemot no, da nangglik tete sogo, Yesus weng go, nemotnang no gemang pu-won, “Esang, nggeasui go motnang maning srek-ketegoy? Nemot lo. Nggeasui go Genam ku gabe mo pung. Ikum-a! Blong Dem sikabung kon ey go ta sono, gabe ya iti. 42 Ip-a, imot ya klong go! Genam klay so semu go sedue gabe mo dagu. Ngga go.”
Yesus mlak-nenawon go
43 Yesus, nebut so maning pepen gono, Yudas, 12 sik sogo andua meno, sedue daley ey gemang weng-lak. Nemotnang, ple ey tengang ey, ta no idok go. Ngga Yahudi go iram-tegay lo mot go, weng go. 44 Klay sedue ngganemot lo, banim sedue daley no mo pen, “Motnang se ikum, genam lo, nebuem kuong tebok go ngga, Nemot gemang. Nemot-a mlak go, suey so yay se suing go klong!” 45 Nggano, pluep-a natun go, Yudas-a kay seguong so Yesus mit no klong go, gemang pu-tenawon, “Aya Klui, suey lo.” Ngga ey Yesus nebuem kuong gemang tebok-nawon. 46 Ngganemot no, nemotnang daley lo Yesus mlak go gemang lek-nenawon. 47 No, ngga so got-netawon go sedue meno lo, tengang sok go, Yahudi go trang meno, Ki Wali yap wengkabui go koy bu ta so semu, kamasua idi, gemang tut-nawon. 48 Ngga ey, sedue daley so Yesus lo, ngge kalik gemang pu-tenawon, “Motnang lo duing go, Genam ngge plesagui sedue? Ngga sogo so, motnang didemun ey tengang ey, Genam mlak sogo idok go kebanto? 49 Genam ku no-ku no, motnang ey Ki Wali yap ba so walinebut so ngunguok go nogo, ngga nogo sogo tang so Genam kua mlak? No, tasam piam go ngge, banim Sam Klaut ba no mo klik-nengam. Nemot go seni, nggeasui lemoy genang.” 50 Ngga sik sogo, sikabung ngga sogo naklay, Nemot-a itak go, gemang kuek-lak. 51-52 Yang! Duo ngguot meno, Yesus ey klay golo keng so duduing go gemang. Woy ngganemot nogo, nemot mlak sogo so kamso semu-nenawon go, no, nemot lo kok go amka tebot-a, nemotnang go ta no gemang itak. Nemot ulue so gemang kap dali.
Yahudi go iram-tegay yaluim golo Yesus neyboy-nenawon go
53 Nggano, Yahudi go trang kangok go Ki Wali yap yay so susuing go mit no, Yesus wawi go gemang-nenawon. Ngga tup go nogo, iram-tegay naklay sip nggano gemang yaluim-netenawon. 54 Petrus, ngga ikum sogo so, mesip so, yakot so gemang keng-nawon, e... Yahudi go trang kangok go, nemot go yap seboy no gemang pung dali. Dalip tra goso, koy dagu no, kebali sedue ey, gemang got-netenawon. 55 Yahudi go trang kangok go ey iram-tegay ey, Yesus but genang sogo kuklue pen genang sogo sedue gemang wet-netenawon. Kuklue ngga tang so, Yesus but go kebong genang. No, sogo-sogo piam go, kua ikum-nesrenawon. 56 Sedue lo Yesus sogo nebutiwot mata so wamoy so pen go nogo, no, nemotnang go nebut klaya goso kua nebuem-srenatun. 57 Ngganemot no, nemotnang sik sogo sedue temu lo ip go ngge kali so wamoymlue gemang pen-nenawon, 58 “Genamnang mo tup, sedue ngganemot lo ngge kalik so pen go, ‘Ki Wali yap kangok go, sikabung go ta lo klik-nengam go ngge, Genam lo mea togut. Nggano ku nangglik ba no, yap demening go-a, sikabung go ta lo kua klik go, Genam lo mea semu.’ ” 59 Nebut ngga pen-nenawon go naklay, nemot go seni, meno duo logo - meno duo logo ey kua kluing-srenatun. 60 Ngganemot no, trang kangok go iram-tegay nesip ba sik so ip go, Yesus sono gemang pu-tenawon, “ Sedue lo pen-neton go nogo, Mot lo sogo kalik duing-teguoy? Mot logo nebut way, yakua pen-srelo?” 61 No, Yesus, yakot so got-tenawon, nebut way kua teguo-srenawon. got-tenawon. Nggano trang ngganemot lo tandali da klaya gemang pu-tenawon, “Mot se pen, Mot ngge, seni so Blong Iram, Ki Wali Aya go Danon, sedue Yahudi ta itak genang sogo?” 62 Yesus lo pu go, “Genam ngge, Nemot lo! Ki Wali Mani Iram go ta semlea idi so susuing go, kenuim ba lo weng go, Blong Dem mea ikum-kelo.” 63-64 Nggano trang kangok go nebut ngganemot tup-won gono, nemot dabui sadui tra goso, nemot go amka tegek-siwon go, ngga ey gemang pu-tenawon, “Motnang kuklue ngganemot mo tup-lak? Nemot Ki Wali Iram ey kerlam goso lemoy go mo pu-won. Imot, nggeasui go Nemot sogo nebut walong bata pen genang yakua wet gabe.” Ngga no iram-tegay klaya goso lemoy go, gemang we-nenawon, “Ngga seni so lo. Nemot but go se kebong!” 65 Ngga ey, iram-tegay temu lo Nemot sono mlabui seguop go, nggano Nemot go nemu amka lo dok go, tadabui lo plapang gono, ngge kalik gemang usi-netenawon, “Ey, nabi, Mot lo senong go, nando lo Mot mo plapang?” Nggano, kebali sedue lo, Nemot gemang but-nenawon dali.
Petrus lo, Yesus wayang-won go
66 Woy ngganemot nogo, Petrus seboy so maning susuing. Ngganemot no, trang kangok go nemot go koybutasemu go kabung meno gemang nategun. 67 Petrus dalip so koy ku no susuing go, ikum-tun gono, gemang pu-tugun, “Mot ngge, yakena Nasaret sik sogo Yesus no keng go sedue dali!” 68 No, Petrus lo pu-won go, “Esang, genam suey so kua senong, mot tebadali, sogo so pen-ategoy!” Ngga sik sogo, Petrus dia sono, seboy no gemang pung-anawon. Woy ngganemot no ayang nebut se tuot. 69 No, kabung ngga, Petrus seboy sogo tandali ikum gono, sikabung temu sono gemang pu-tenatun, “Seni so lo, sedue ngge, nemotnang ey kerlam so weng-lak go dali!” 70 No, ngga kalik tup gono, Petrus tandali gemang wayang-nawon. Ku walong kua luik gono, sikabung ngga sogo lo Petrus no gemang pu-newon dali, “Mot ngge, seni so, nemotnang ey go sedue meno gabe. Seni so, mot ngge, nan Galilea sik sogo sedue, mot go bluem sik so genamnang mo senong-esitu gabe.” 71 Ngganemot sik so, Petrus lo piam-piam so gemang pu-tenawon, “Kua! Genam kua senong seni go! Nemot nando? Woy mo senong, banu mo senong, seni so, ngga kalik so mo go, genam mea kebong.” 72 Petrus nebut wayang ngga so pepen gono, da namon tete sogo ayang gemang tuot. Ngga tup go, Yesus lo pen-nawon go, nebut Petrus gemang duing-nawon, “Ayang da namon tete sogo tuot go, mot lo, Genam da nangglik yam so mo wayang!” Ngga duing won gono, u kangok so gemang kluo-nawon.