13
Way-way so anduasiyap logo se tetebok
1 Ku klaya dali walop Paska ya semu gono. Yesus mo senong, “Kukunan sik so tandali Ki Wali Aya sono Genam klong genang ku, gabe mo pung.” Nggano, Nemot ey kukunan blo lo uwet go andua-andua nogo gualaklum gemang taling-nawon. Klum ngga, senang so gigit go, e... i gono mea pung. Ngga naklay Yesus lo mo duing.
2 Nemot go andua-andua ey klay gono ten Yesus gemang dam-tenawon. Ku ngganemot no, Yesus klaytaduing genang so Simon Iskariot go danon, Yudas go dabui ba no Kupiamgo gemang degut. 3 Yesus mo senong, “Don naklay-naklay Genam go ta no Ki Wali Aya lo mo itak.” Nggano, Nemot mo senong dali, “Ki Wali Iram sik so Genam mo weng. Ngga sogo so, tandali mea klong!”
4-5 Ngga senong go tang so, ten so dedam go sip sik so Yesus ip go, amka kangok go sok gono, kebali amka-a, kui no gemang dok-nawon. Ngga ey, wakay no bu sre go, andua-andua go masi bu ulu go, kuibey so dok go amka lo gemang drok. Se senong: Kebali ngga, Yahudi go demu nogo, koybutasemu lo pupluok go. Wengkabui logo yakua! 6 Ngga kalik ulu-siton go, e... Simon Petrus mit no pung gono, Simon lo pu go, “Woy Dem! Sogo kalik go-a genam go masi bu ya lu-silo? Ngga piam wa!” 7 Way so Yesus lo pu go, “Nggeasui Genam lo pupluok go ngge, mot maning kua senong. No, ku santugun gono, seni mea senong-lo.” 8 Petrus lo waydang go, “Kua! Genam go masi, bu Aya logo, yakua ulu seni!” No, way so Yesus lo pu go, “Mot go, masi bu Genam lo kua ulu go, Genam ey klay gono, mot mea kua suing.” 9 Ngga sik so, Simon Petrus lo pu go, “Woy Dem! Ngga kalik go, masi seguong-a kua ulu. No, ta ey wengkabui eygo se ulu-silo dali!” 10 Way so Yesus lo pu go, “Kua, mot bu mo wata! Kon bu yam so mo ulu, masinan seguong-a ya ulu-silu go. Se senong: motnang ngge, mo teguop go, no, naklay kua.” 11 Seni so, sedue Yahudi go ta sono klay taduing go itak genang, Yesus mo senong. Ngganemot sogo so pu-nawon go gemang “No, naklay maning kua teguop gabe!”
12 Masi bu yam so ulu-nawon gono, amka tandali kok go, Nemot go sip no gemang got-nawon. Ngga ey, gemang pu-tenawon, “Motnang no semu-tu go ngge, seni mo senong-keto? Maning? 13 Se tup! Genam so motnang lo u-usi go, ‘Aya Klui, Woy Dem!’ Motnang lo u-usi go ngga, seni. Genam ngge-a, Klui, nggano, Woy Dem gabe. 14 Ngganemot sogo so, gabe pen-asitugu, ‘Motnang go masi, Klui ey Woy Dem eygo, Genam lo ulu go, way-way so motnang go seguong sogo, nase ulu dali!’ 15 Motnang nogo ngge, yatrang-a Genam lo gabe taling-tu. Way-way sogo, Genam lo semu go kalik senang so motnang se pupluok! 16 Gabe pen-asitugu, ‘Koybutasemu logo, wengkabui-a mea kua kenok. Deguena, nemot go tamot logo mea kua kenok dali.’ 17 Yatrang ngga, suey so senong go, pupluok dali go motnang teguop seni.
18 Motnang naklay nogo so nebut ngge kua pen. Seni so, Genam lo kuoy go, Genam mo senong, klaya duo-a kua degut gabe. Se duing: Wali Sam klaut ba no klik go ngge, se lemoy, ‘Genam go ten klay gono dedam go, Genam sogo masi nemot lo mo iti gemang.’ a 19 Yang! Maning nebut ngge kua lemoy gono, gabe pen-asitugu. Ngga lemoy go, motnang senong go mea keng, ‘Seni so, Ki Wali Mani Iram Yesus gabe!’ b
20 Seni-seni so gabe pen-asitugu, ‘Genam lo mot-dak go sedue nando lo wawi go, Genam nemot lo mo wawi gemang. Genam, nando lo wawi go, Genam so mot-dak go Ki Wali Iram, nemot lo mo wawi dali gemang!’ ”
Yudas sogo nebutpen go
21 Nebut ngga yam so pen gono, Yesus dabui ide kangok so gemang tra-nawon. Ngga ey, dia sono ngge kalik gemang pen-nawon, “Motnang sik sogo sedue klaya duo gemang. Sedue Yahudi go ta sono go Genam nemot lo mea iti.” 22 Yesus go andua-andua nebut ngga tup gono, way-way so nemu yalap go, dabui ba lo gemang duing-netenawon, “Ngga kalik go nando lo ya semu-yon?” 23 Se senong: Yesus go ta semlea idi sogo andua meno, Yesus no tebok go gemang. Ngga Yohanes tang go. Seni so, Yesus nemot nogo dabui klum kangok. 24 Andua ngganemot sono Simon Petrus lo ta lo taling go gemang pu, “Yesus no usi-a! Nando lo ya pluok-yon?” 25 Yesus sono andua ngganemot iwot go, gemang usi-nawon, “Woy Dem, nando lo ya pluok-yon?” 26 Yesus lo pu go, “Tegunbu klay go ba sono loti Genam lo iti go suik go, ngga nemot gemang.” Nggano, loti Yesus lo iti go, Simon Iskariot go danon Yudas sono gemang iti-nawon. 27 Loti ngga, Yudas sono iti gono, kayseguong so nemot go dabui ba no Kupiamgo gemang degut. Ngga ey, Yesus lo pu go, “Sogo semu so mot duing go, nggeasui keda so se semu!” 28 Ngga so ten so suing go dedam go kua senong-nenawon, “Sogo nang so ngga kalik Yesus lo pu?” 29 Seni so, andua temu lo duing go, “Walopnang sogo taut idok genang so kuong gemang mo king? Kua go, sedue taut kua gono wasey genang so mo pu?” Yang, nemotnang go duoy so mlak go Yudas. Nemotnang suey so kua senong.
30 Loti iti gono, sip ngga sik sogo Yudas klong go, ku se kiklik.
Demutrui inim Yesus lo nguok go seni
31 Yudas klong gono, ngge kalik Yesus lo gemang pen-nawon, “Nggeasui go, Blong Dem go blongdon gabe ngengap. Nggano Ki Wali Iram go blongdon Nemot lo mea ngap dali. 32 Ki Wali Iram go blongdon, suey so Blong Dem lo ngap go, way so Blong Dem sono Ki Wali Iram tang go blongdon mea itak. Ku kua walong gono, ngga mea lemoy.
33 Dem sopnang! Ku tebot so motnang eygo mea got-eyon. Genam klong go nogo, genam so motnang lo mea uwet. No, Genam klong go sip nogo, motnang ya kua keng go klong. Banim go, sedue-sedue Yahudi nogo nebut ngge, Genam lo mo pen dali.
34 Demutrui inim-a gabe iti-situgu, ‘Way-way klum motnang se tetaling. Motnang no Genam lo taling go klum kalik, way-way so motnang se pupluok dali.’ 35 Way-way so klum motnang lo tetaling go sik so, sikabung ikum go mea senong, ‘Seni so, Yesus no keng go anduasi yap, motnang ngge gabe.’ ”
Petrus nogo nebutmang pen go
36 Nggano, Simon Petrus lo gemang usi-nawon, “Woy Dem! Nago no Mot klong so?” Yesus lo pu go, “Genam klong genang sip sono go, nggeasui go, mot ya kua keng! No, mesip so keng go mot mea klong.” 37 Ngga ey, Petrus lo pu go, “Woy Dem! Sogo tang so, nggeasui go, Mot nogo at ya kua keng? Mot no keng go sogo, genam go wali mea kebong dali!” 38 Way so, Yesus lo pu go, “Seni so, Genam nogo so kebong genang mot duduing? Suey so mot se senong! Nggeasui wadikua go, ayang nebut maning kua tuot gono, da nangglik yam so Genam sogo mot lo mea wayang.”